LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AUTORIDAD NASIONALA DEL LADINO

SEFARAD

INSTITUTO MAALE ADUMIM

AKI YERUSHALAYIM

ULTIMO NUMERO

TODOS LOS NUMEROS

LIBRERIA SEFARAD

PERIODIKOS

ASOSIASIONES I ORGANIZASIONES

JENEALOJIA SEFARADI

AKI YERUSHALAYIM #89

LOS DJUDIOS DE SALONIKO
PROMOTORES DEL SOSIALIZMO EN GRESIA
Gila Hadar

De la fin del siglo 19 asta el anyo 1924 Saloniko era una sivdad multikultural, multilengual y multinasional. Kada komunidad tenia sus tradisiones, su relijion, su kultura i su lengua.

Los djidios de Saloniko eran el grupo etniko mas numerozo i dominante de todos los abitantes de la sivdad, i eyos formavan serka de sesenta por sien de la povlasion total ma tenian en sus manos noventa por sien dela vida ekonomika. Avía entre eyos rikinyones, rikos i de klasa mediana ma tambien lavoradores i proletariato, adientro de los kualos nasio la voluntad de luchar para mijores pagas i kondisiones de lavoro, lo ke yevo a la kreasion del primer movimiento sosialista en Gresia.

Los fondadores de la Federasion Sosialista de Saloniko eran Avraam Benaroya. ke vino de la Bulgaria, Alberto Arditi, Shemuel Amon, Shabetay Levi, Dimitri Mihalis, Istirio Nikopoulo, Salih ben Abdi, Anjel Tomov, Jak Ventura i Dimitri Belahov. Ventura (djidio) i Belahov (bulgaro) eran deputados de la Federasion en el parlamento turko. David ben Gurion, ke estudio en Saloniko en 1912, eskrivio en sus memorias ke Belahov era el mas sionista de todos los sosialistas djidios de Selanik.

Entremientres, en Estambol i en otras sivdades del Imperio Otomano los bulgaros, gregos, muslemanos, djidios i ermenis fondaron eyos tambien grupos sosialistas i kitaron jurnales sosialistas. Los gregos kitaron el"Ergatis", los djidios el "Jurnal del Lavorador" i los turkos el "Iştirak".

El movimiento sosialista trusho esperansa a los proves, los dezgrasiados i los dezokupados, i les ofresio un muevo i diferente kamino sosial, kultural y linguistiko. La tierra ya estava pronta i las simientes ya avian sido ensembradas. La tierra i las simientes eran los lavoradores djidios ke lavoravan munchas oras por muy poka paga.

El sosializmo se kreo entre las masas lavoraderas, entre los lavoradores i lavoraderas del tutun ansi ke en las fabrikas de filateria, de seda i de kalsas.

Los lavoradores djidios del porto, los hamales de la sivdad i los lavoradores de los echos tradisionales no eran parte de la federasion sosialista. Eyos eran organizados en "taifas".

El buto de la Federasion Sosialista era de organizar los lavoradores, mijorar sus kondisiones de vida, lograrles lejislasion sosial (ley de asiguransas kontra las hazinuras, los aksidentes, la dezokupasion ets.), lograrles derechos, djustisia i igualidad entre todas las rasas ansi ke sufraje universal en la komunidad djudia en el paiz.

Asta 1912 el turko era la lengua del poder politiko. Despues de la entrada de los gregos, el turko fue remplasado por el grego, ma, asta 1924 el deskorso sosial i ekonomiko en Saloniko era en djudeo-espanyol. Una interesante polemika a este sujeto tuvo lugar en el jurnal Avanti, el organo de la Federasion, ke dava muncha importansia a la ovra de edukasion sosialista.

En 1913 se publiko en este jurnal una seria de artikolos sovre la kestion ke lengua devian adoptar las masas djudias - si se devia uzar o no el djudeo-espanyol. Todos estavan de akordo ke en djudeo-espanyol no avia ovras de literatura komo en las otras lenguas, i ke mankavan livros de sensia i sovre otras materias. Segun la idea de los dirijentes de la Federasion Sosialista el lenguaje es un instrumento de lucha i el djudeoespanyol no podia servir para aparejar la mueva jenerasion al fuerte pleto ke eya devia yevar – el pleto sosial i politiko.

Aun kon esto, en fin de kuento fue desidido de adoptar el djudeoespanyol siendo ke, sigun lo fue apuntado por uno de los lideres sosialistas djudios de Saloniko, Alberto Arditi, ",,, la majorita del puevlo reklama el djudeo-espanyol. El uzo de esta lengua sierve los intereses del proletariato i esto es konforme a los prinsipios de la Federasion Sosialista". Elevar a los lavoradores/as en la lengua ke eyos avlan, era aprontarlos lo mas presto posivle al sosializmo i a la aksion internasionala, i esta era una razon mas para uzar el djudeo-espanyol komo lengua de aktividad de la federasion. En desparte de esto, el eskojimiento del djudeo-espanyol tenia razones politikas tambien i era dirijido kontra el renasimiento del ebreo, introdusido entonses en las eskolas komunitarias por los sionistas.

Otras diskusiones tokavan a la politika editorial del jurnal: si este es un medio de edukasion, fue apuntado, el deve tener una parte konsakrada a la teoria sosialista tambien, kon artikolos de diversos eskritores, sovre todo de autores revolusionarios.

La Federasion Sosialista avrio kursos de djudeo-espanyol, fransez i grego, i tambien klasas para militantes marksistas sovre temas komo "La produksion manifakturada", "El salario", "El kapital industrial", "El kapital komersial", "Las krizas ekonomikas i la politika kolonialista", "El pleto de las klasas", "La mujer i el sosializmo" i mas.

La federasion sosialista enfloresio en Selanik i inspiro a todos los partidos sosialistas i komunistas en Turkia i Gresia, ma en 1936 suvio al poder el diktator Metaksas i todos los komunistas i sosialistas tuvieron ke fuyirsen de Gresia, o deritirsen en las priziones en las izlas aegeas. En 1943 mas de 95% de los djidios de Saloniko fueron matados en los kampos de muerte en Polonia i la memoria de la Federasion Sosialista de Saloniko se olvido durante anyos.

Volver