LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AUTORIDAD NASIONALA DEL LADINO

SEFARAD

INSTITUTO MAALE ADUMIM

AKI YERUSHALAYIM

ULTIMO NUMERO

TODOS LOS NUMEROS

LIBRERIA SEFARAD

PERIODIKOS

ASOSIASIONES I ORGANIZASIONES

JENEALOJIA SEFARADI

AKI YERUSHALAYIM #88

ANTOLOJIA DE LITERATURA DJUDEO-ESPANYOLA

LA ERMOZURA DE LA NOVIA
 (Kante de boda, del livro de A. Galante: "Histoire des Juifs d'Izmir", paj. 346)

Dize la muestra novia  komo se yama la kavesa?
Esto no se yama kavesa sino torondja de torondjal
A mi torondja de torondjal, a mi kampo espasiozo.
Biva la novia kon su novio.

Dize la muestra novia  komo se yaman los kaveyos?
Esto no se yama kaveyos  sino briles de lavrar
A mis briles de lavrar, a mi torondja de torondjal,
   a mi kampo espasiozo... …

Dize la muestra novia  komo se yama la frente?
Esto no se yama frente  sino espada reluziente
A mi espada reluziente, a mis briles de lavrar …

Dize la muestra novia  komo se yama la seja?
Esto no se yama seja  sino arko de tirar
A mi arko de tirar,  a mi espada reluziente ...

Dize la muestra novia  komo se yaman los ojos?
Esto no se yama ojos  sino rikos esmeraldares
A mis rikos esmeraldares,  a mi arko de tirar …

Dize la muestra novia  komo se yama la nariz
Esto no se yama nariz  sino pendola de eskrivir
A mi pendola de eskrivir, a mis rikos esmeraldares ...

Dize la muestra novia  komo se yaman las karas?
Esto no se yaman karas  sino rikos masapanes
A mis rikos masapanes, a mi pendola de eskrivir ...

Dize la muestra novia  komo se yaman los bezos (lavios)?
Esto no se yaman bezos  sino rikos merdjanes (korales)
A mis rikos merdjanes, a mis rikos masapanes ...

Dize la muestra novia  komo se yaman los dientes?
Esto no se yaman dientes  sino perlas de enfilar
A mis perlas de enfilar, a mis rikos merdjanes.

Dize la muestra novia  komo se yama la alguenga?
Esto no se yama alguenga  sino pala de enfornar
A mi pala de enfornar, a mis perlas de enfilar ...

Dize la muestra novia  komo se yama la garganta?
Esto no se yama garganta  sino redoma de plata
A mi redoma de plata, a mi pala de enfornar …

Dize la muestra novia  komo se yama la pechadura?
Esto no se yama pechadura  sino tavla de kontar
A mi tavla de kontar, a mi redoma de plata …

Dize la muestra novia  komo se yaman los pechos?
Esto no se yaman pechos  sino limones del limonar
A mis limones del limonar,
a mi tavla de kontar, a mi redoma de plata,
a mi pala de enfornar, a mis perlas de enfilar,
a mis rikos merdjanes,  a mis rikos masapanes,
a mi pendola de eskrivir, a mis rikos esmeraldares,
a mi arko de tirar, a mi espada reluziente,
a mi torondja de torondjal, a mi kampo espasiozo, 

Sovre la ermozura de la novia
en algunas de muestras kantigas

*Sos muy ermoza, blanka komo la roza…
*Arvolikos d'almendra ke yo planti,
por los tus ojos vedrolis…
*Morenika a mi me yaman, yo blanka nasi…
*Pasharo d'ermozura, linda la tu figura …

 

Volver