AKI YERUSHALAYIM

Lavar las berendjenas, kortarlas en revanadas, a la larga, sin mundarlas i friyirlas en azeyte kaente de las dos partes. Meter en kada revanada un pedaso de kezo, echar por ensima prishil pikado i arodearlas en forma de rulo. Azer lo mizmo kon el resto de las revenadas.

Meter los rulos en pyrex i ornarlos unos 5 minustos en orno ke fue kaentado de antes a 200 grados. Kitar del orno.

Aprontar la sos mesklando todos los materiales endjuntos i deshar yelar en el frijider por 15-20 minutos.

Antes de servir vaziar la sos sovre los rulos de berendjena i garnisar kon la menta pikada.

TAS KEBAB DE KODRERO (Para 4-5 personas)

Materiales:

2 kgs. de karne de kodrero sin gueso
2 sevoyas pikadas
2 pimientones vedres kortados en tiras
1/2 vazo de salsa de tomat
1 1/2 vazos de agua
1/3 vazo de azete
1/4 de kucharika de kanela
1/2 vazo de prishil pikado
sal i pimienta

Preparasion:

Meter la azete en una kaldera i friyir la karne de kodrero, kortada en kubos, por todas las vandas asta ke toman una kolor dorada. Kitar la karne de la kaldera i en la mizma azete friyir la sevoya i los pimientones. Adjustar la tomatada dezecha en la agua, la sal, la pimienta, la kanela i la metad del prishil pikado. Mesklar i deshar buyir por unos kuantos minutos. Retornar la karne de kodrero a la kaldera, abashar la lumbre i kozer asta ke la karne esta blanda.
Echar por ensima el resto del prishil i servir.

SALATA DE LICHUGA, RAVANO I SAFANORYA

Materiales:

1 lichuga mediana
1 ravano grande
3 safanoryas
10 azetunas pretas
4 kucharas de azete de oliva
sumo de medio limon
sal

Preparasion:

Lavar la lechuga, mundar las safanoryas i los ravanos. En un ermozo plato areglar de manera estetika, komo por exemplo, las ojas de lichuga en medio i a sus deredor el ravano i las safanoryas rayidos (o kada uno a su gusto) .

Asezonar kon la sal, azete i sumo de limon i garnisar la salata kon las azetunas pretas.

KOMPOSTO DE MANSANA, ZIRGUELAS I PASAS

Materiales:

5 mansanas grandes
11 zirguelas sekas i sin kueshko
2 kucharas de pasas pretas o blankas
6 kucharas de asukar
4 vazos de agua
10-12 klavos de komer

Preparasion:

En una grande kacharola meter la agua, asukar i klavos de komer i deshar buyir sovre lumbre mediana asta ke la asukar se dezaze, mesklando de vez en kaundo kon una kuchara de tavla. Entremientres mundar las mansanas, kortarlas en pedasos, kada uno a su gusto, i adjustarlas al kaldo, djuntos kon las zirguelas i las pasas.

El komposto esta pronto kuando las mansanas se ablandan ma kedan firmes. Servir el komposto muy yelado.

EL TOMAT I SUS RAYIZES

Segun investigasiones arkeolojikas, los primeros kultivos de la tomat fueron echos al Sud de Mexico i su nombre proviene de la palavra "tomatl", en nahuati, lengua avlada por los Aztecas en Amerika Sentrala i ke sinyifika algo de "redondo i godro." Aun ke ay diskusiones a este sujeto, la tomat ke es konsiderada por los sientistas komo fruta i no lugumbre, ya existe en muestro mundo desdel anyo 700 A.C.

La tomat yego a Espanya en 1519, munchos anyos despues del Deskuvrimiento. En la metad del siglo 16 el farmasien i botaniko Petrus Matthiolus katalogo la tomat komo produkto komestible inkluyendola a la famiya de la "mandragora", konosida en akeya epoka komo planta toksika. Ma los marineros del Mediterraneo ke avian visto komo en Amerika komian la tomat, la konsomavan eyos tambien sin miedo. En fin, en 1713, no teniendo dinguna prova ke la tomat kontiene toksikos, el botaniko Phillip Millar fue ke alimpio este lugumbre (segun konsierada oy por todos) de su "toksisidad" baftizandola kon el nombre sientifiko "Lycopersicon esculetum" ke en latino sinyifika komestible. Empesando de ayi la tomat se espandio a otros paizes de Evropa i a poko a poko en el mundo entero. No solo la forma i la grandor de la tomat sino ke su kolor tambien era poko konosida. Por exemplo las primeras tomates a yegar a Italia tenian una kolor dorada i ayi fueron yamadas "pommo d'oro".

Oy este lugmbre, ke su kultivo es muy fasil, reyna en muestras kuzinas traendo savor i kolor a muestra vida, konvirtiendose en el protagonista de innombrables platos servidos en muestras mezas dia por dia.

Volver