AKI YERUSHALAYIM #87

DISKOS

MAFTIRIM
Kantes de Sinagoga Turko-Sefaradis
Kantados por David Behar, Hazan Isak Macorro, Hazan David Sevi
Ed. Gözlem Gazetecilik Basim ve Yayin A. Ş.
 www.gözlemkitap.com
 Sentro para la Investigasion de la Kultura Sefaradi
 www.istanbulsephardiccenter.com

El livro Maftirim, del kual ya tratimos en muestra rubrika "Livros.." es akompanyado por 4 diskos kompaktos (CD) i un DVD ke mos dan la posibilidad de konoser este djenero de la muzika liturjika sefaradi de tres puntos de vista ke se kompletan entre eyos:
*El livro - ke mos da una ancha informasion sovre lo ke son los maftirim ansi ke los tekstos i las partituras de estos kantes;
*los 4 diskos - en los kualos se pueden oyer 60 kantes de maftirim, areglados sigun el orden de los makames kon los kualos son kantados;
*i enfin el DVD - en el kual pueden ser vistos i oyidos los ke kantaron i enrejistraron estos kantes.
Aun ke ay muncho mas ke los 60 kantes de maftirim inkluidos en estos diskos, eyos ya bastan para darmos una idea de la rikeza, ermozura i orijinalidad de estos kantes ke ya estavan kaje kompletamente ulvidados i ke pudieron ser salvados del ulvido grasias a la inisiativa i al lavoro de los ke tomaron parte en la realizasion de este proyekto.

DE LAS ALTAS MARES
Grupo Arboleras
Ed. Barlovente Musicas
 Barlovento-musicas@gmail.com www.barlovento.com

La komunidad djudia de Rodes, ke sus empesijos datan del II siglo A.C. i se engrandesio i dezvelopo despues del 1492, kon el arivo de los djudios ekspulsados de Espanya, fue muy duramente aharvada en la Shoa: de los 1673 djudios ke bivian en esta sivdad asta el anyo 1944, pudieron salvar de la barbaria nazista menos de 200. 150 pudieron salir bivos de los kampos de konsentrasion i 43, ke tenian suditansa turka, fueron salvados grasias a la intervension del konsul turko en Rodes, Salahattin Ülkümen.

Ma ainda antes de esto, komo konsekuensa de presiones politikas i ekonomikas, munchos rodeslis ya avian emigrado a otros paizes, espesialmente en Afrika i en las Amerikas, kreando ansi una diaspora ke mantiene bivo el rekuerdo de esta komunidad, de su istoria i kultura i sovretodo de sus romansas, koplas i kantigas ke fueron transmetidas durante serka de 5 siglos, de una jenerasion a la otra.

La muzikologa Shoshana Weich Shahak enrejistro munchos de estos kantes de informantes rodeslis de Israel, Argentina, Fransia i Beljika. En los 2 diskos del album "De altas mares" el grupo Arboleras prezenta 40 de los mas ermozos de estos kantes, ke konstituyen una buena muestra del folklor muzikal sefaradi: romansas, koplas i kantigas (kantes lirikos, kantes de boda, kantes kumulativos etc.).

El grupo Arboleras, ke se formo en 1984 para interpretar kantes del repertorio muzikal sefaradi, aserkandose en la mas grande mizura posible al estilo autentiko sefardi, reushe a prezentarmos en este album de 2 diskos una muy ermoza seleksion de kantes ke se oyen kon plazer i emosion, de mizmo ke, asta 66 anyos atras, azian vibrar de alegria los korasones de los djudios de Rodes.

Volver