AKI YERUSHALAYIM #87

FILATELIA SEFARADI
Mordehay Arbell

La posta de Jamaica emitio un timbro amostrando la "Devon House" (la kaza Devon), una de las mas famozas kazas en la kapitala, Kingston. Esta kaza ke su nombre es de una rejion de Ingletierra, sierve oy komo un sentro kultural, kon galerias de arte, ekspozisio-nes i restaurantes.

Fraguada en 1881 por un milionario, George Stibel, ijo de un djudio alman i su servidora jamaikana, la Kaza Devon fue merkada en 1928 por Don Cecil Lindo, ijo de la famoza famiya sefaradi Lindo. El la transformo en un palasio familial onde azia resepsiones, konsertos de piano i otras aktividades kulturales. El tenia ayi, entre otras, 19 servises de te de plata pura, ke son ekspozados ayi asta oy.
La istoria de los Lindos de Jamaica empeso kon Lorenso Rodrigues Lindo (1638-1712) ke nasio en Badajoz en Espanya, de onde fuyo, komo konverso, a las Islas Canarias. En 1664 el i su mujer Perpetua fueron arestados por la Inkizision komo djudaizantes, ma despues de dos anyos eyos reusheron a fuyirsen a Londra onde Lorenso troko su nombre al de Isaac.

La famiya de su ijo Elias paso a Bordeaux i en 1780 sus inyetos Abraham i Jacob se aresentaron en Jamaica. Un otro ijo, Alexander, nasio en Venezia en 1666 i paso a Amsterdam en 1706. Su inyeto Abraham se aresento en Jamaica, en 1765. Ayi la famiya se unio de muevo i tuvo grandes plantasiones i kazas de komersio. Cecil Lindo, el patron de Devon House, paso largos anyos en Costa Rica, de onde torno a Jamaica kon grandes rikezas. En la istoria de Jamaica la famiya Lindo kedo muy famoza i proeminente. 

Volver