AUTORIDAD NASIONALA DEL LADINO
|
AKI YERUSHALAYIM #87 LA PRIMERA KONFERENSIA INTERNASIONALA DE LA DIASPORA DJUDIA SEFARADI DEL CARIBE En los ultimos anyos se nota un despertamiento del Djudaizmo del Caribe ke fue i es ainda un importante sentro del Djudaizmo Sefaradi. En las komunidades i en las universidades lokales ansi ke en Estados Unidos, Ingletierra i Fransia, son echas investigasiones sovre las komunidades sefaradis del Caribe, sus istoria, vida, kultura i identidad. Partisiparon mas de 200 investigadores de las universidades de la Sorbonne, Princeton, Brown, CUNY i Londra para mensionar las prinsipales solamente, i tambien el prezidente de la asosiasion "Sefarad" de Israel, el embasador Modechai Arbell, ke durante tres dias dieron i oyeron konferensias sovre los temas ke mensionimos mas ariva. Las sesiones fueron muy interesantes i fueron resividas kon grande entuziazmo. Muy emosionados fueron los reprezentantes de Jamaica, Barbados, Surinam, Guiana i las Islas Virjinas. Los konferensiantes rekonosieron a la unanimidad ke la investigasion del Djudaizmo de los Caribes se deve a Arbell ke fue el ke empeso estos estudios. Se desidio de konvokar la segunda konferensia en el anyo 2012, en St. Thomas, en las Islas Virjinas. |
La konferensia sovre la Diaspora Sefaradi del Caribe tuvo lugar en Kingston del 12 al 14 de Enero, sovre la inisiativa de la komunidad djudia de Jamaica, la Universidad de las Indias Oksidentales, la Federasion Sefaradi Amerikana, la Universidad de la Sivdad de Nueva York, el Konsejo del Commonwealth Britaniko i la Embasada de Fransia en Jamaica.