AKI YERUSHALAYIM #87

OTRO ANIVERSARIO MAS
"EL AMANESER" YA TIENE 5 ANYOS

Despues de anyos de preokupasion por el futuro del ladino i de su kultura, de frustrasion al ver ke los jurnales en esta lengua se serravan uno detras del otro, asta ke "Aki Yerushalayin" avia kedado komo la sola revista a ser publikada enteramente en ladino, el 2 de Marso 2005 podimos ver una vez mas kuanto de verdad tiene el refran ke dize" Kuando mas eskurese es para amaneser".

En este dia fue publikado el primer numero de la revista mensuala El Amaneser, traendo-mos la albrisia de una mueva epoka en la aktividad jurnalistika en ladino.
Publikada al prin-sipio kon 12 pajinas , El Amaneser yego bien presto a tener 24 pajinas, yenas de artikolos, entrevistas, kuentos i poezias ansi ke rubrikas regolares, todas en ladino, fruto del lavoro devuado de las redaktoras Karen Gerson Sarhon i Güler Orgun– i tambien de los numerozos kolaboradores de Turkia i del estranjero tambien, ke forman djuntos un maraviyozo ekipo, yeno de talento i entuziazmo.

A todos eyos muestras mijores felisitasiones i dezeos ke kontinuen i dezvelopen ainda mas la aktividad jurnalistika djudeo-espanyola para munchos anyos mas.

Volver