AKI YERUSHALAYIM #87

LADINOKOMUNITA KUMPLE SUS
10 ANYOS DE AKTIVIDAD

Me parese komo ayer, la fondasion de este foro. Komo no mos konsintimos ke el tiempo pasa tan presto?!. Komo no felisitar a Rachel i a los moderadores  por el lavoro ke azen dizde 10 anyos?. Mis mijores sentimientos a esta union, ke es unika.   Una lingua para ke este biva no solo kale avlarla, ma en mizmo tiempo kale eskrivirla i meldarla. L.K. es el mijor exempio de este fakto                                                                                     
                                                                                                           Selim Salti

A la okazyon de los diez anyos de Ladinokomunita, no tengo biervos para dizir todo el bien ke penso de este foro, i para rengrasiar  komo se deve a su fundadora Rachel Bortnick, ke no mos manke, i a sus keridos moderadores Rosina, Yehuda i Guler.
Mis mas kalorozos dezeos de salud i de vida para LK i los i las ke lo azen bivir, kyero dizir su fundadora, sus moderadores i tambien mozotros todos ke eskrivimos aki i azemos arrebivir muestra ermoza lingua. Para munchos i buenos!
                                                                                                   Edmond Cohen

Vos eskrivo de mi korason, ke este foro troko la vida de munchas personas ladino-avlantes ke ya se olvidaron todo i kon el nasimiento de LK, puedieron avansar i akodrar todo lo ke ambezaron en sus chikez....i mas!  Grasias a Moshe Shaul, David Siman de bendicha memoria, Rachel Bortnick i todos los moderadores ke lavoran tanto para ke mos avlemos en la internet. 
                                                                                                  Daisy Newell
***
Rengrasyo a todos los ke me eskrivieron por sus ermozos biervos sovre LK. i rengrasio de todo korason a Rosina, la moderadora ke tiene lavorado mas muncho de todos (desde 2002, si no me yerro) i ke siempre mira a animar muestro foro kon eskritos enteresantes kuando mos ve un poko "kayadikos".
Vos ago akodrar ke la idea de un foro de korespondensia en ladino fue de Moshe Shaul, en su konferensia durante el kongreso en Yerushalayim  al kual asisti yo tambien, en Oktobre de 1999, sovre la grafia del ladino en letras latinas. El avia dicho ke el Internet mos da la oportunidad de promover una grafia standardizada. Yo solamente desidi a azerlo, i lo ize kuando abolti a kaza.
Tenemos oy 1234 miembros, pujados i no menguados. Tengo de nota ke en Desiembre de 2004 teniamos 587 miembros. (Lo mas de akea lista, grasias al Dio, estan ayinda kon mozotros.) Uno le diziya al otro, i ansina mas munchos se adjuntavan.
En LK , un 65-70 % de los miembros son de famiyas totalmente o en parte sefaradis. Kijo dizir tenemos munchos amigos de la lingua
sefaradi ke son ashkenazis o non-djudios. Tenemos miembros de 38 paises, de Almanya asta Venezuela. Unos 53% de los miembros konosen el espanyol. (Esto bazandome en los kestionarios ke fueron inchidos, ma me parese ke la proporsion es mas alta.)
Del prensipio avizimos, en el sitio de LK, ke tenemos tres butos :
      1. Promover el uzo del ladino.
2. Uzar un sistema standardizado de ortografia para el ladino kon 
     letras latinas.
3. Demandar i difundir enformasiones sovre la lengua, kultura, istoria i tradisiones de los sefaradis, i diskutir otros sujetos de entereso a los miembros.
Desde entonses, LK ayego a kumplir no solo esto, sino muncho mas.  En kurto tiempo el foro se transformo en una komunidad virtual sefaradi, ande se arekojeron los ijos i inyetos de los sefaradis esparzidos en el mundo entero.  Aki se toparon miembros de famiyas i amigos ke estavan pedridos dezde munchos anyos. Tanbien, djudios i non-djudios enteresados en la lingua se adjuntaron de todos lados del mundo.
Desendientes de konversos en paizes ispanos i en el Sud de los EEUU toparon un nido aki, i un sentimiento de rekonektar kon sus raizes de famiya.
LK inspiro a munchas personas ke no tenian avlado el ladino desde munchos anyos, i ke nunka tenian eskrito ni un biervo en esta lingua, a eskrivir rekuerdos, kuentos, saviduria, poezias. Esto izo ganar eskritores para las publikasiones sefaradis, i mezmo ayudo al establesimiento de la revista El Amaneser. Las publikasiones sefaradis ganan abonamientos i apoyo de entre muestros miembros.
Ademas, akademikos uzan los archivos de miles de mesajes (agora tenemos mas de 30.000 mesajes)  para sus investigasiones, i mandan sus kestionarios a muestros  miembros. I mozotros tambien profitamos de sus savidurias.
 El primer i uniko diksionario elektroniko de Ladino kon tres otras lenguas (kastilyano, inglez, i turko), se izo aki kon la inisiativa de un profesor de espanyol en Japon, Antonio Ruiz Tinoco, en kolaborasion kon muestra amiga Güler Orgun de Estambol.
LK avrio tambien el kamino para dos otros foros en ladino: el primero, (Tapuz), siendo para eskrivir en ladino kon letras ebreas, mientres ke el otro, (Sefaradimuestro), se fondo el anyo pasado.
Las amistades i konosimientos ke izimos no kedaron solo en el kampo virtual,  si no ke se konvertieron en enkontros personales tambien, en viajes a los kualos partisiparon miembros de LK de paizes diversos:   el primer fue a Israel en 2007,  despues fuimos a Turkia en 2008, i en 2009 izimos un viaje a Arjentina ke para mi fue la mijor manera posible de fiestar el diezen aniversaryo de la fondasion de LK.
                                                                                   Rachel Amado Bortnick

Volver