AUTORIDAD NASIONALA DEL LADINO
|
AKI YERUSHALAYIM #87 LETRA DEL REDAKTOR En estos dias en los kualos luchamos duramente para asigurar la kontinuidad de la kultura djudeo-espanyola i el renovamiento de su kreasion literaria i jurnalistika, kada muevo livro, kada muevo numero de una revista o de un jurnal, kada mueva pajina en uno de los foros de internet en ladino son okaziones para ekspresar alegria i kontentez i tambien muestra apresiasion por el esforso ke rende posibles estos alkanses. Aun mas i mas devemos alegrarmos kuando podemos markar el kumplimiento de un periodo sinyifikativo en la aktividad de uno o mas de estos medios de komunikasion, sigun lo azemos aki, avriendo este numero de Aki Yerushalayim kon palavras de apresiason al foro de internet LadinoKomunita, al kumplir sus 10 anyos de aktividad, i tambien a la revista "El Amaneser" ke ya tiene agora 5 anyos. Les embiamos muestras mas kalorozas felisitasiones i dezeos de "Kada anyo mijorado". Avlando del esforso ke es i fue echo para la konservasion i promosion de muestra kultura, no podemos inyorar la importante kontribusion de la revista La Lettre Sepharade ke durante largos anyos djugo un rolo muy importante en este kampo. En el artikolo ke publiko en el ultimo numero de esta revista, eksplikando las razones por las kualas no podria kontinuar a ser publikada, su fondador i redaktor, Jean Carasso, avia apuntado ke la Lettre Sepharade avia sido una "ermoza aventura"; aventura ke sigun lo eksplikamos en un artikolo ke dedikimos a este tema, se esta kontinuando ainda, aun ke no en el kampo del jurnalizmo sino ke en otros kampos muy importantes de la aktividad kulturala djudeo-espanyola. Esta es tambien una buena okazion para saludar a los 2 boletines elektronikos, Diyalog i eSefarad, ke vienen de djuntarsen ultimamente a los sitios, foros i otros medios de komunikasion en ladino ke estan aprovechando las posibilidades ke mos ofrese la Internet para poder yegar a un numero kada vez mas grande de personas interesadas en la kultura djudeo-espanyola.
|
