AUTORIDAD NASIONALA DEL LADINO
|
AKI YERUSHALAYIM #86 CASA SEFARAD-ISRAEL La kultura sefaradi es un tema ke esta interesando a loss espanyoles desde la fin del siglo 20 i se puede mizmo dizir kada anyo mas ke antes. Esta aktitud ke empeso kon el intereso de algunos investigadores de la literatura espanyola komo Ramón Menendez Pidal, Manuel Alvar, Arcadio Larrea Palacín i otros mas, al ver kuanto tenian en komun el romansero espanyol i el djudeo-espanyol, se kontinuo kon la kampanya del senador Angel Pulido para un renovamiento de las relasiones entre Espanya i el mundo sefaradi. En el korso de las ultimas diezenas de anyos, despues de la II Gerra Mundiala, la Shoa i la kreasion del estado de Israel, este intereso se intensifiko ainda mas i se espandio a kaje todos los sirkolos de la sosiedad espanyola: la prensa, las universidades, las fondasiones kulturales, las autoridades munisipales de munchas sivdades i mizmo organizmos governamentales komo el Instituto Cervantes i mas... El ultimo aniyo en esta larga kadena de faktores ke estan ovrando para un aserkamiento de los espanyoles a la kultura sefaradi es Casa Sefarad-Israel ke fue fondada unos 2 anyos atras ma ya tiene a su kredito una seria de importantes proyektos i aktividades.
En la seremonia de inaugurasion ofisiala de Casa Sefarad-Israel, ke tuvo lugar en Madrid, en prezensia de los ministros de eksterior de Espanya i de Israel, el Sr Miguel Angel Moratinos i la Sra Tsipi Livni, el Sr Moratinos disho ke se konsiente orgoliozo de aver sido uno de los promotores de esta institusion ke en desparte del estudio i investigasion de la erensia kulturala sefaradi, inkluyendo el ladino, ayudara tambien a avrir muevos orizontes en las relasiones israeli-espanyolas. Para mozotros es muy importante i sinyifikativa la imprtansia akordada por Casa Sefarad-Israel al estudio de la kultura sefaradi, inkluyendo el ladino, komo parte integrala i biva de la kultura espanyola – proyekto en el kual podran kolaborar munchos faktores i aun mas i mas la Autoridad Nasionala del Ladino i su Kultura ke fue fondada en Israel espesifikamente para este buto. Uno de los primeros pasos del direktor de Casa Sefarad-Israel, el Sr Diego Ojeda, en una vijita ke izo en Israel en el anyo 2008, fue de enkontrarse kon el prezidente de la ANL, el sr Yitzhak Navon, i invitar a la Autoridad a azer parte del Konsejo Institucional de esta institusion . La invitasion fue akseptada kon plazer i en efekto, en la sesion inaugurala de este konsejo, la ANL fue reprezentada por su vise-prezidente, el Sr Moshe Shaul. En kuanto a las posibilidades de kolaborasion entre las 2 partes, ay aktualmente 2 proyektos ke son examinados:
|
Sigun podemos verlo en la rubrika "Quienes somos – Presentacion" del sitio web de Casa Sefarad-Israel, esta institusion fue kreada por
el Ministerio de Eksterior de Espanya,
la Komunidad de Madrid i la Munisipalidad
de esta sivdad, kon tres butos: 
Casa Sefarad-Israel tiene numerozos proyektos mas, no solo en lo ke toka a la kultura sefaradi sino ke en munchos otros kampos de la vida sosiala, politika i kulturala de Israel. No podremos enumerarlos todos aki, ma los interesados pueden resivir la informasion ke dezean, konektandosen kon el muy interesante sitio de internet www.casasefarad-israel.es i tambien a traves de la revista Alef ke sale kada 2 semanas, kon una rika seleksion de artikolos i novedades sovre lo ke es echo en Espanya i en otras partes del mundo kon relasion a la kultura djudia i sefaradi mas espesialmente, sigun puede ser visto del No. 23 de la revista ke salio en Oktobre, anunsiando kon un grande titolo, el kongreso organizado por Casa Sefarad-Israel i el Instituto Cervantes, en el siklo "Sefardíes de Oriente", sovre las komunidades sefaradis de los Balkanes.