AUTORIDAD NASIONALA DEL LADINO
|
AKI YERUSHALAYIM #86 SENTRO MEMORIAL A LAS VIKTIMAS DE LA SHOA Muy pokos son, en el mundo, los ke saven en ke mizura la Shoa aharvo a las komunidades sefaradis en los Balkanes. Asta pokas diezenas de anyos atras, munchos, mizmo en Israel, no savian kaje nada sovre la suerte de la komunidad djudia de Saloniko, ke mas de 40 mil de sus miembros fueron eksterminados en Auschwitz i otros kampos de triste memoria, Es solo grasias a los esforsos echos por institusiones sefaradis en Israel i otras partes del mundo, i tambien por algunas personas ke eskrivieron sus rekuerdos de esta terrible epoka, ke se empeso a konoser este kapitolo de la Shoa, i a realizar kuanto duramente fueron aharvadas no solo la komunidad en si mizma, sino ke tambien toda la erensia kulturala djudeo-espanyola ke Saloniko era entonses su sentro mas aktivo. Aun menos konosida es la suerte de la komunidad djudia de Makedonia, muncho mas chika ke la de Saloniko ma onde los rezultados de la Shoa fueron ainda mas duras: de las serka de 7500 almas ke kontava esta komunidad, en las sivdades de Skopje, Monastir i Stip, kedaron bivas, despues de la Shoa, a penas 200, en sus mayoria djovenes ke avian reushido a fuir o eskondersen de los nazis i se avian djuntado a los partizanes, kon los kualos kombatieron eroikamnente kontra las fuersas almanas. Ma mizmo para los ke pudieron salvar de esta manera, la vida no fue fasil. Eyos tornaron a sus sivdades, kon la esperansa en el korason ke algun miembro de sus famiya, o un pariente, o vizino pudo salvar de la Shoa... ma bien presto, al pasar los mezes sin ke venga dinguno, se dieron kuento ke sus komunidad avia sido kaje totalmente eksterminada. Los ke avian kedado de la komunidad de Monastir eran tan pokos, ke en fin de kuento desidieron de ir a Skopje, onde djuntaron sus fuersas a los ke tornaron a bivir ayi para bushkar a renovar la vida komunitaria djudia en el lugar. El rejimen komunista ke suvio al poder en Yugoslavia despues de la gerra, onoro la memoria de las viktimas, alevantando mizmo un monumento a la memoria de Estrea Ovadia, una de las eroinas djudias ke lucharon kon los partizanes, ma de otra parte no fue echo ningun esforso para restituir a la komunidad los bienes ke tenia antes de la Shoa. Kale apuntar ke esto no fue a kavza de una diskriminasion de los djudios, sino ke la kosekuensa de la politika interna del rejimen komunista de entonses ke nasionalizo todos los bienes privados, inkluzo de las institusiones relijiozas i komunitarias komo iglezias, meshkitas, kales etc. Esta politika se troko, kon la fin del rejimen komunista en Yugoslavia i, mas tadre, kon la proklamasion de la independensia de Makedonia, se empeso un proseso de "denasionalizasion", restitusion de los bienes privados i komunitarios. El problema era ke, en lo ke toka los djudios, no avia a ken restituir los bienes siendo ke la mayoria de entre eyos avian sido eksterminados sin deshar erederos. No solo esto sino ke a falta de dokumentos sovre la valor de las kazas i magazenes, merkansias, mobles, djoyas i vistimienta abandonados por los djudios kuando fueron arestados i deportados, era tambien muy difisil de kalkular la valor de estos bienes i a kuanto devria yegar la restitusion. En fin de kuento, se yego a una solusion: En baza de una rezolusion del governo de Makedonia, el 23 Avril 2002 fue kreado un "Fondo de la Shoa de los Djudios de Makedonia" ke resivira los bienes, o indemnizasion por los bienes ke no pueden ser restitudios, de las viktimas dela Shoa ke murieron sin deshar erederos. Despues de largas negosiasiones se yego tambien a un akordo sovre la suma a ser restituida: 19 miliones de euros.
El Sentro esta siendo fraguado en la parte de la sivdad onde eran konsentrados los kuartieres djudios, kompletamente destruidos en el terretemblo del anyo 1983, lo ke tiene una grande importansia simbolika no solo para las viktimas de la Shoa sino ke tambien para Skopje i Makedonia, ke podran de esta manera onorar la memoria de sus sivdadinos djudios deportados i eksterminados en 1943. Por las oras fue kompletada la konstruksion del edifisio, del kual damos aki la fotografia de la maketa, i agora se esta lavorando para areglar el interior – ke inkluira, sigun lo apuntimos, una parte dedikada a la konmemorasion de las viktimas de la Shoa, i
un Sentro de Arte i Kultura Este, mos fue eksplikado por la Sra Mizrahi, es un aspekto muy importante del programa de lavoro del Fondo siendo ke, malgrado ke la komunidad djudia de Makedonia konta agora apenas 200 personas, i ke solo un chiko numero de entre eyas konosen el ladino, todos rekonosen ke esta lengua es un faktor muy importante de la istoria de esta komunidad i kale azer un grande esforso para mantener su rekuerdo i enkorajar djovenes estudiantes a estudiar i investigar sus partikularidades. Esta es una tarea a la reushidad de la kuala podemos kontribuir de una manera muy apresiable siendo ke en komparasion kon otros paizes, Israel es el lugar onde, en este kampo se esta lavorando mas intensivamente i mas seriozamente - en la Autroridad Nasionala del Ladino ansi ke en 5 universidades i dos sentros akademikos. Kale adjustar ke la aktividad para el mantenimiento i desvelopamiento del ladino no se limita a estas institusiones solamente, sino ke ya se espandio a numerozos sirkolos del publiko sefaradi en las diversas partes del paiz, ke organizan de sus propia inisiativa konferensias i resitales de muzika djudeo-espanyola, kursos de ladino, festivales de kantes i de kuentos en ladino ets. |
