|
AKI
YERUSHALAYIM #85
GASTRONOMIA SEFARADI
Zelda Ovadia
GEYNA KON BERENDJENA ASADA
Materiales: (para 4-5 personas)
1 geyna
1 sevoya
4 berendjenas grandes
¼ de vazo de azete
1 kucharika de sal
1 kucharika de asukar
Preparasion
Despues ke fue bien alimpiada i lavada, meter le geyna en una kaldera, kuvrir de agua, adjustar la sevoya mundada i la sal i kozer a lumbre basha unos 45 minutos.
Entremientres asar las berendjenas sovre la lumbre del gaz o en el gril del orno. Pelar el kuero ainda kuando las berendjenas estan kaentes (de esta manera la tarea es mas fasil), pasarlas por la agua koriente i desharlas eskurrir en un tripito unos 10 minutos. Para transformarlas en puree, las berendjenas se pueden meter en el food processor (aki se deve azer atension de no moler demazia las berendjenas, aziendo funksionar el food processor en kurtos pulsos) o se pueden tartikar kon un kuchiyo sovre una tavla, asta ke se obtiene una puree bien omojena sin bultikos o pedasikos de berendjena.
Meter la puree en una sarten kon bodres altos, adjustar la asukar i la sal. Kitar la geyna del kaldo, kortarla en pedasos i meterla sovre la berendjena. Adjustar el kaldo de geyna a la puree i kozer a fuego muy flosho unos 15 minutos. Este plato se sierve kon arroz blanko.
*Al ke koze i amasa todo le pasa
*Ninguno save lo ke ay en la oya
sino la kuchara ke lo menea
*Kalavasa no embarasa,
berendjena para la sena, tomat para reynar
*Este pan para este kezo
*Ken tiene ambre i piedras kome |
ALBONDIGAS DE PATATA KON KARNE
Materiales:
½ kg. de karne molida
2 safanorias
3-4 patatas
1 vazo de prishil pikado
2 guevos
Sal i pimienta
1 vazo de arina
azete para friyir
Preparasion:
Mundar la safanoria i las patatas, kortarlas en pedasos, meterlas en una kaldera, kuviertas de agua i kozer asta ke se ablandan. Kitar de la agua i azerlas puree.
Mesklar bien la puree kon la karne molida, el prishil pikado, los guevos, sal i pimienta asta ke se obtiene una “masa” omojena. Aprontar las albondigas, pasarlas por la arina i friyirlas en azete bien kaente, dos minutos de kada vanda.
SIGAROS DULSES
Materiales: (para 20 sigaros)
10 ojas de fila
1 ½ vazos de muez mulida
2 kucharas de pasas
3-4 kayisis sekos kortados en pedasikos muy chikos
1 kucharika de kashkara de portakal rayida
½ kucharika de kanela, a gusto
¼ de vazo de azete
Para el sirop:
1 vazo de asukar
1 vazo de agua
Preparasion:
Mesklar la muez molida, pasas, kayisis, kashkara de portokal i kanela.
Meter dos ojas de fila una ensima de la otra, untar un poko de azeyte entre eyas i kortarlas en kuatro, de manera a obtener kuatro karós. Meter una kucharika del gomo en kada uno de los karós, duvlar la fila sovre el gomo i arodearla de manera a obtener la forma de un sigaro. Ovrar de esta manera aste ke se terminan las ojas de fila.
Kuvrir una tavla de orno kon papel pergamino, pozar los sigaros sovre el papel i ornar unos 10 a 15 minutos en orno ke ya fue kaentado de antes a 180 grados o asta ke los sigaros toman una kolor dorada. Kitar del orno i deshar yelar.
En una kacharola azer buyir endjuntos la agua i la asukar, todo en mesklando asta ke la asukar se dezaze kompletamente i se forman en el sirop chikas buchichas. Kitar de la lumbre i deshar repozar el sirop por unos kuantos minutos.
Meter los sigaros en el sirop, tres o kuatro a kada vez, aboltarlos de las dos vandas afin ke esten bien empapados en el sirop. Estos sigaros dulses se pueden servir akompanyados de krema freska tambien.
LA SAL I SUS UZOS
La sal es un mineral kristalizado formado prinsipalmente en segito a la evaporasion de lagos o de aguas marinas i es el kondimento mas komun uzado por los seres umanos desde largos siglos i asta oy dia.
Eya da savor a muestras komidas, sierve a konservar peshkados (salamura) i karnes por largos periodos i mas.
En diversas kulturas, ansi komo en el djudaizmo tambien, la sal tiene un rolo muy importante. Eya es uzada para salar karne antes de ser gizada, kitandole de esta manera la sangre.
En la Biblia la sal es akodrada por primera vez en la istoria sovre la mujer de Lot ke se transformo en un “pilar de sal”.
La konsomasion exajerada de sal puede kavzar danyos a la salud komo problemas de alta tansion o la formasion de piedras en los renes.
La sal tiene un rolo importante en todo lo ke toka las superstisiones tambien: eya es uzada kontra el ojo malo i en prekantes, prinsipalmente dezaziendola en un poko de agua afin de dezazer, de esta manera, el aynara i echarlo a las profundinas de la mar. |
Volver
|