AKI YERUSHALAYIM #85

PAJINAS DE POEZIA

Kada Persona Tiene Un Nombre
Teksto ebreo: Zelda Shneurson
Traduksion al ladino: Zelda Ovadia

Kada persona tiene un nombre
ke le dio el Altissimo
i ke le dieron su padre i madre
Kada persona tiene un nombre
ke le dieron su estatura
i su sonriza
i su vistido
Kada persona tiene un nombre
ke le dieron las muntanyas
i le dieron sus murayas
Kada persona tiene un nombre
ke le dieron las estreyas
i le dieron sus vizinos
Kada persona tiene un nombre
ke le dieron sus pekados
i le dieron sus dezeos
Kada persona tiene un nombre
ke le dieron sus inimigos
i le dio su kerensia
Kada persona tiene un nombre
ke le dieron sus fiestas
i le  dio su ofisio
Kada persona tiene un nombre
ke le dieron las sezones del anyo
i le dio su siegura
ke le dio la mar
i ke le dio
su muerte

Kualo va kedar
Viviana Rajel Barnatan

Kualo va kedar
Kuando te vayas
De los amaneseres en tus ojos
Del viento tokando tu piel,
De tus tristuras...
Puede ser
Ke yo sinti lo mezmo
En este igual momento
Ama tambyen devere partir...

Kualo va kedar
Entonses
De mis nochadas penseriozas
De todas mis kozas...
De lo ke pedri...
De fotos i letras ke boladas
En una kasha kedaran ulvidadas...
Kualo va kedar
De mis dolores
De los amores...

Kualo va kedar del avenir
Si no te topas kon mi...
Kualo va kedar
De mi puerpo avejentado
De mi korason gastado
Del brilyo ke fuye de mis ojos.
Penas...Sentires
Iluziones... Alegrias...
Puede ser las letras
No dispareskan
I kuenten lo mijor de mi
A ken las tope...

Poemas de Estambol
Denise Leon

La piedra minudika
Del silensio,
La kamareta de mi madre,
La yavedura blanka
Ke mira a la kamareta.
Los talones de mis piezes
Ke dezean
I no ayegan a la ventana.
El empiezo  de todas las kozas.
La palavra ke kita el miedo
I una boz
Ke es la manyana. 

Komo una solombra
pasan
los dias.
Kaje ke no pasan.
Los enyevran tus dedos;
yardanes de narandjas

Volver