AUTORIDAD NASIONALA DEL LADINO
|
AKI YERUSHALAYIM #85 EL BANYO DE LA NOVIA Komo se pasava la seremonia de banyo de novia en Izmir? Todos los preparativos de boda ke empesavan mas o menos un mez antes de la boda komo: lavar de blankeria, enkolgar anshugar, banyo de novia, tafi*, todo era muy alegre, kon kantes i bailes, komeres i beveres. Ma la seremonia de Banyo de la Novia era una koza espesial - kon la tevila*, la roska, las berahot i mas. Yo me akodro de esto kon muncha nostaljia porke una tala koza ya no existe mas. En el anshugar, ke se kortava i brodava durante anyos, para las ijas ke devian kazarsen kuando vendria la ora buena, se aprontava tambien el Bogo de Banyo. Este bogo era espesial porke era lavrado de mano, o era kroshetado, o tenia randas.
El dia de banyo se preparava el bogo de la novia kon munchas hadras. Se aresentava en el, el chamashir* - ke era de seda blanka brodado de mano, la kamiza de banyo - tambien de seda i brodada, tas*, shabuluk* i estregador, shavon d’almiskle, tokador kon randas i pules*, kapot* o piludos - ke eran jeneralmente blankos. Se uzava tomar tres piludos: uno grande ke se metia del bel* para abasho, uno mas chiko para enriva de los ombros i un otro para la kavesa. Atras munchos anyos se uzava meter en el bogo de la novia tambien galechas ke eran un djenero espesial de takos: la bareta ancha ke abrasava la kara del pie era de kuero kon velur brodado de sirma*. Para entrarse al banyo, la novia se vistia una kamiza espesial, de seda brodada o kon randa. Lo mizmo azian las ke venian kon eya: madre, tias, suvrinas, ermanas i mas. Kuando entravan a la sala kayente del banyo, antes ke se asentaran sovre las lajas de marmole, vinia la teleka*, tomava sus kamizas i las kitava afuera para ke no se mojen. Entonses empesava la alegria entre el estregar i el shavonar, se kantavan kantes de boda en djudeo-espanyol komo: Morenika a mi me yaman, Ansi díze la muestra novia, Madre demesh la lesensia i mas. Avia famiyas ke traiyan pandero mizmo i se akompanyavan kon el en sus kantes. Despues ke shavonavan bien a la novia, devian kortarle las unyas de los pies i de las manos, ke no kede ni un milimetro, kitarle todos los kaveyos del puerpo, i entrarla en la tevila. Ayi le entravan siete vezes la kavesa alientro de la agua i dizian berahot. Al salir de la tevila ya tenia pronto el kapot kon el tokador, si era rika, i si no, los tres piludos. Despues ke se los vistia, se aserkava de eya una de entre las mujeres - madre, tia o suvrina – i le partia enriva de la kavesa una roska grande kon almendras blankeadas, dezeandole todo lo bueno: Blanka i alegre, pasadia buena, aijada... i mas. La roska era siman de blankura i artura. Blankura - kere dizir “kon marido” i artura - “parnasa buena”. Despues de partir la roska, se dava un pedaso a kada una de las ke se topavan en el banyo i todos auguravan pasadia buena. Todo esto, o sea el shavonar, el kortar las unyas, tevila i partir roska, devia ser echo por mujeres “bien kazadas” kere dizir ke tenian todo lo bueno en la vida: marido, ijos i parnasa. Muncha djente traiyan al banyo a komer tambien. Si era tiempo de lakerda, traiyan lakerda kon muezes i pan blanko i fresko, lo ke yamavan “frandjola”, si no kolyos o todo otro peshkado salado ansi ke portukales, para arefreskarsen.. Kuando todo esto se terminava, la teleka traiya a kada una los piludos, las mujeres salian a la sala no tan kayente i de ayi ivan a las kamaretas ke avia al deredor de la sala del banyo i se asentavan a deskansar, ma los kantes kontinuavan kon intervalos. Se despartia tambien todo modo de kozas dulses: mogados, maronchinos, sharope, bonbones d’almendra... todo kalia ke fuera blanko. Kuando ya deskansavan, todos se vistian, se abrigavan bien para no yelarsen i se ivan a la kaza de la novia. Ayi kontinuavan, todo en aziendo los ultimos aparejos para la noche de tafi, a kantar i a bailar, akompanyandosen kon pandero o dumbelek.
___________________________ tafi: Seremonia ke se azia la noche ke al dia devia tener lugar la boda.
|
