AKI YERUSHALAYIM #85

LOS PASEOS AL BOSFOR
(AY 68, 2002)
Zelda Ovadia

Kada uno de entre mozotros ke nasio i se engrandesio en Estambol i bivio ayi en los anyos 50 - 60 i antes de esto, se akodra sin duda de los paseos ke se azian al Bosfor en los mezes d’enverano.

En akeyos dias kuando dinguno no se sonyava de dar un salto, por 3-4 dias, a uno de los paizes de Evropa, sin avlar de viajes a las Amerikas, al Oriente Leshano i mas ande no.., para mozotros las kreaturas, estos paseos eran komo el mijor viaje del mundo. La alegria era muy grande i ainda mas la emosion...

Kuando muestros djenitores kedavan de akordo kon otras famiyas mas de salir a un semejante “piknik” asperavamos kon despasensia ke despunte el dia.
Todos los aparejos se azian la noche de antes: sovre la meza de la kuzina o de la kamareta de komer se metian los chinis, los pirones i kuchiyos, un mantel, una redomika de vinagre mesklado kon azeyte para la salata, un fregon i shavon, para lavar los platos i las kupas, (siendo ke en akeya epoka no avia ainda  platos i vazos de karton), una bala, una kuedra para saltar ke servia tambien para azer una kuna i una manta para la kuna.

El menu de estos paseos era bien riko: para el dezayuno mos yevavamos burekas de kezo, kezadikas de berendjena i bulemas de espinaka, sin olvidar el kezo blanko, el kashkaval, las azetunas pretas i los guevos haminados. Las komidas preferadas en estos paseos eran las albondigas de karne fritas, arroz kon kaldo de tomat fresko, pimyentones reyenados kon arroz, berendjena frita, pishkado frito, diversos djeneros de salami, i pipinos i tomates para la salata ke se aprontava en el lugar, i si todo esto no abastava avrian tambien kutis de sardela...

Esto todo se metia en chantas i a las 6 de la manyana o “a las siete madrugadas”, komo dizia mi nona Zimbul, saliamos a kamino.   Estos paseos eran komo una aventura. En akeyos dias ken tenia otomobil privado? I tan demprano no avia ni un taksi, ni otobuses. El solo remedio era de azer el kamino a pie asta el kiupri – el ponte de Galata onde se topavan las eskalas para el Bosfor - i alkansar al primer vapor para pueder profitar del dia. Ni los chikos ni los grandes se keshavan del pezgo de las chantas i del largo kamino  ke se azia asta el kiupri, abashando por Yuksekkaldirim.

Despues ke se merkavan los bilyetos asperavamos al lado de las kandjelas de fierro, ke en efekto eran dos grandes puertas ke se avrian kuando el vapor akostava a la eskala. En akeyos dias los vapores eran chikos i no muy rapidos i akostavan a todas las eskalas en las dos kostas del Bosfor aziendo un zig-zag. Este era un viaje maraviyozo ke a las vezes durava mas de dos oras en una  sola direksion.

Los lugares preferados para estos paseos eran Hünkar i Circir ande avia manaderos de agua buena i Rumeli Kavak, la ultima eskala en la parte evropea del Bosfor, ande las aguas de la mar Marmara se bezan kon las aguas de la Mar Preta.

Vista del Bosforo, kon el kastiyo de Rumeli Hisar

No emportava si muestra destinasion era Hünkar o Circir, ke se topan  en las kolinas de Buyukdere, uno de los  lugares mas ermozos del Bosfor o Rumeli Kavak,
al  bodre de la mar, onde puediamos banyarmos tambien. Abashando del vapor la primera koza era de merkar karpuzes i pan fresko. Para suvir a Hunkar o a Circir se alkilava un payton o talika komo lo yamavan en Estambol, i despues de oras en el kamino se yegava enfin al lugar del piknik. Estos eran grandes kafes kon mezas i siyas, i un restorante o mas djusto dizir lo ke yamamos oy kafeterias, onde se puedia merkar beverajes kaentes i yelados o adjustar algo a las komidas ke se traian de kaza. Las aguas de los manaderos  korrian entre los arvoles i las plantas ke kuvrian las kolinas, i yegavan asta las mezas onde mos asentavamos. Los karpuzes se metian alientro de estas aguas freskas para yelarlos.

Se disho paseo, se disho komer. El dia empesava kon el dezayuno. Asta la komida de medio dia pasavamos la ora djugando, kaminando entre la arvoleria i arankando flores ke traimos a kaza kuando ya estavan amurchadas. Los “grandes” djugavan kartas, tavli (shesh-besh) i azian sohbet. Entre un pranso al otro se metia sovre la meza igos freskos i dulses komo la miel, sheftalis, el karpuz ke entremientres ya se avia yelado i otras frutas mas,  para mojar la boka. Oras de tadre, antes de salir a kamino, se komia lo ke kedo del dezayuno. En el kamino de retorno las chantas ya estavan mas livianas ma mozotros estavamos un poko mas pezgados.  Tornavamos a kaza kuando ya eskuresia, kansados ma muy kontentes i alegres, asperando kon despasensia al sigiente paseo.

Volver