AUTORIDAD NASIONALA DEL LADINO
|
AKI YERUSHALAYIM #85 LA SHOA I EL MUNDO SEFARADI MI SALONIKO En la primavera del anyo 1943, kuando en la sivdad de Saloniko se konsentia el guezmo del yasemin, i ke de los tiestos de barro i de teneke enkalados, en los kurtijos de las kazas, despuntavan las primeras flores del anyo, nona Sultana, djudia fiera i kreyente, fue arestada i embiada kon uno de los estremesientes vagones de beemot, verso el norte, a la tierra de dezolasion. Entre las kozas ke tomo nona Sultana de la famiya Gilidi, avia metido un poko de kafe i asukar, biskochikos kon savor de kanela i zinchifil; i arekojida en el kantoniko del vagon deshava pasar por su kavesa ideas sovre un mijor avenir, sus esperansas ke "el Kriador del Mundo mos kitara de este vagon". Entre un penserio i otro eya murmureava de si para si las palavras del kante sovre la infanta triste i sovre el amado ke retorna de leshos. Triste estava nona Sultana ma las palavras de este kante, ke sus avuelos trusheron de Espanya, adulsaron un poko este viaje estremesiente i por unos minutos le dieron un poko de esperansa: Triste estava la Infanta - mas triste de kada dia Nona Sultana era una mujer yena de esperansa i a su yegar al kampo de konsentrasion en Polonia trusho kon si un grande sfuenyo: de tornar un dia a Saloniko i kazar su ija kon un "kavayero de la kavayeria". Durante largos anyos avia arekojido en los baules en su kaza un "ashugar de oro lavrado", pasando las largas nochadas de invierno asentada en un kanton, kon dedal al dedo i bastidor en la mano, i kantando romansas de amor i kazamiento. Tres ermanikas eran - tres ermanikas son Nona Sultana no reusho a kazar dinguna de sus ijas i el maraviyozo ashugar ke les avia aprontado fue rovado i trezpizado por los ke vinieron a sakear sus kazas en Saloniko, despues ke los djudios de esta sivdad fueron deportados. En mis guertas kresen flores i en los saksis graveyinas Nona Sultana suvio al sielo, kantando sus romansas, i sovre esta tierra me desho a mi, sonyando sovre su figura i la imajen del Saloniko djudio. Kada uno tiene su Saloniko. Ay ken lo aze de melodias i kantes; otro se akodra de los gizados; un tresero lo ve en la kolor blu de la mar i otros lo topan entre las pajinas de livros de orasion; i ay ken lo ve a traves los malos sfuenyos i las barieras de tel punchonozo del kampo de la muerte de Auschwitz.
I para mi? Ke imajen tiene Saloniko, para un sabra komo mi? Un eko konfuzo de melodias de kantes en ladino; guezmos apenas konsentidos de gizados i kozas de orno; kartas postalas kon la Torre Blanka;î ojas de livros de orasiones; el numero blu tatuado sovre el braso siedro de mis djenitores. De todo esto formo para mi una imajen de Saloniko. De dia i de noche, en dias de fiesta i dias ordinarios, kuando esto solo i kuando esto entre la djente, kon grande pasensia arekojgo un detalio detras de otro para fraguarme de muevo mi Saloniko. Este es mi Saloniko - sivdad de eskarinyo, de distansia, de sfuenyo. I para ke todo esto? Yo nasi aki, en la tierra de muestros padres. Mi nono avria dado todo lo ke tenia para vinir aki ma el no ayego a vinir. Mi nona aprontava dulses de roza i de yasmin para adulsar el viaje de Saloniko a Erets Israel - eya tambien no ayego a vinir. Mis tios i tias kantavan kantes de amor a Sion en los kualos ekspresavan sus amor a la Tierra Prometida - ni eyos yegaron a vinir. Fernando i Isabela arondjaron a mis antepasados de Espanya a Saloniko en akeya terible ekspulsion del anyo 1492. Hitler los deporto kon el kurbach alsado a la tierra entezada de Polonia, sovre la kuala yo sonyo de vez en kuando. A vezes, kuando me desho arastar por la imajinasion, los penserios i el eskarinyo, me imajino a mi mizmo kaminando por las kayes de Saloniko, de esta majika sivdad, de la kuala no kedo nada afuera de las kayes luksuozas i raskasielos ke kresieron sovre los kuartieres djudios de la sivdad. Me veo kaminando por las kayes estrechas del pasado, tokando sus murayas, enkontrando figuras de mi famiya (ke nunka no enkontri ni konosi), avlando kon Aroniko, beviendo kave de la manyana onde Alberto, gostando de las burekitas de una tia Rashel, entrando a la orasion de Arvit en el kal "Beit Shaul" ke fue destruido, i ansina, i ansina, i ansina... Este es mi Saloniko. Una sivdad de pedasos de memoria. La fraguo kada vez de muevo i la destruygo kada vez de muevo. Aboko mi kavesa en los dias de konmemorasion i digo a boz basha el "Yitgadal ve Yitkadash" a la memoria de los miles i miliaras ke suvieron a los sielos por las chimeneas de Auschwitz i de los kualos no kedo nada. Este es mi Saloniko - sivdad de mar i maraviyas i turistas i barieras de tel punchonozo i gaz i krematorios. De todo esto kompozo mi sivdad; palpando kon dedos de espanto fotografias de tiempos atras, yamando kon garon ronko a figuras del pasado, gostando kon amargura de las komidas de fiesta, mirando kon tristeza los numeros blus sovre el braso siedro. Este es mi Saloniko - sivdad de amor i aborresimiento i dolor i karesa i rekuerdos.
SINIZA I FUMO A la memoria de Saloniko Siniza i fumo En la guerta kemada Siniza i fumo Por los sielos, ariva SIETE DIAS ENSERRADOS Siete dias enserrados Madre mia mi kerida Padre mio mi kerido Padre i madre ermanas i ermanikas EL VIOLINISTA DE AUSCHWITZ Kada manyana Me pregunto: El motor aze su ruido monotono La mizma barana La Flama Eterna ¿Ke es esta barana? Yo tanyi aya Ya no ay menester de korrer Oh si! Ya se nono Kon todo esto, ainda akontese Vendre aki Aki apartengo
|
