AUTORIDAD NASIONALA DEL LADINO
|
AKI YERUSHALAYIM #85 IMPORTANSIA DE LA Serka de 20 anyos atras una profesora de espanyol me propozo de akompanyarla a Sarajevo onde keria enrijistrar a sefaradis kantando romansas djudeo espanyolas i este fue mi primer enkontro kon el ladino. De retorno a Dubrovnik empesi a lavorar en el archivo istoriko de la sivdad kon dokumentos de los siglos 16 i 17 i a mi grande sorpreza topi ayi numerozos dokumentos eskritos en ladino. Entonses, i puedo dizir ke agora tambien, el solo livro sovre los djudios de Dubrovnik avia sido publikado en 1937 ma ya era klaro ke por falta de konosensia del ladino, no avia en este nada sovre los dokumentos ke mensioni ariva. Es grasias a las investigasiones ke ize desde entonses ke pudi tener un mas ancho konosimiento sovre los 500 anyos de prezensia djudia en mi sivdad. Estranyamente los antiguos istoriadores, de los siglos 16 i 17, mensionaron apenas la prezensia djudia en Dubrovnik i kuando lo izieron fue solamente para tratar de los prosesos o de las leyes de la iglezia kontra de eyos. Mizmo algunos istoriadores mas resientes no mensionan del todo a los djudios en sus livros sovre la istoria en Dubrovnik, malgrado ke tenemos dokumentos ke informan sovre la prezensia de djudios en esta sivdad desdel siglo 14, prinsipalmente merkaderes i medikos ke vinieron de Albania, Malta, Provence i Catalunia. Los djudios ekspulsados de Espanya viajaron por diferentes kaminos en bushkedad del paiz onde podrian bivir en paz. Uno de estos paizes era el Imperio Otomano i numerozos sefaradis bushkaron a yegar ayi traversando el mar Adriatiko, desde Italia asta el porto de Ragusa de onde kontinuavan por kamino de tierra. Algunos de estos refujiados djudios kedaron en Ragusa i bien presto formaron ayi una de las komunidades sefaradis mas importantes i prosperas de la rejion. Este fue el empesijo de la komunidad djudia de Ragusa ke, aun ke menguo muncho, existe asta oy. Kuando los sefaradis se aresentaron en Ragusa esta chika republika se topava en su periodo de mas grande prosperidad. Sus naves navigavan a lo largo de todas las kostas del Mediterraneo mientres ke al interior de la rejion de los Balkanes, sus merkaderes tenian buenas relasiones komersiales merkando i vendiendo todo modo de materias primas. Poko tiempo despues de sus arivo, los sefaradis se integraron en la aktividad komersiala de Ragusa, todo en metiendo tino a no tener embrolios kon los merkaderes lokales. Grasias a los atadijos ke tenian kon otros merkaderes djudios en el Este i el Oeste del Mediterraneo, eyos reusheron a krear bien presto una red de karavanas i de komersio maritimo. De Bosnia, Serbia, Bulgaria, Makedonia etc. los djudios de Ragusa eksportavan a paizes oksidentales todo modo de kueros i samarras, sera, peshkados, vino i espesias mientres ke importavan de ayi seda, vistidos, tekstiles, papel, djoyas i mas. Las taksas de duana i los dasios ke pagavan para estas merkansias enrikesieron konsiderablamente a la Republika de Ragusa. Los djudios de Ragusa no se distingieron en el kampo ekonomiko solamente. Avia ayi medikos djudios ke kuravan no solo a los miembros de sus komunidad sino ke a los kristianos tambien. Es interesante notar, a este sujeto, la kurioza aktitud de los raguzianos enverso los medikos djudios: de una parte los invitaron a venir i lavorar en esta sivdad ma de la otra parte, el Senato kito ordenes defendiendoles de lavorar. En 1543 el governo de Ragusa nombro al djudio Isaac komo mediko de la sivdad, kon una paga de 170 monedas de oro por 6 mezes de servisio. De otra parte, kuando en 1557, el doktor Isaac tuvo un konflikto kon su kolega kristiano, el Dr. Jacob Pacino sovre la diagnoza de la malatia de uno de sus hazinos, el Senato de Ragusa defendio a los medikos djudios de lavorar ayi. Ma un anyo solo despues, en 1558, el governo de Ragusa tomo otra vez a su servisio komo mediko un otro djudio, Avraam. Este mediko reusho tanto ke el fue embiado por el governo a kurar unos kuantos “beyes” otomanos i le fue permetido de avrir una “klinika” afuera del geto afin de poder kurar ayi hazinos de kualkera relijion ke demandavan sus servisios. Los dokumentos en los archivos istorikos de Dubrovnik tienen una rika informasion sovre la vida de djudios individuales i de famiyas sefaradis komo: Coen, Pappo, Maestro, Atias, Abenun, Naamias, Franco, Levi, Luzena, Oef, Campo, etc. Munchos de eyos eran patrones de naves, se okupavan se aseguransa maritima, tenian kazas i magazenes i mizmo fueron konsules de Ragusa en el estranjero; algunos de eyos salvaron mizmo kristianos tomados en kaptividad por los turkos; otros krearon muevos portos, komo Daniel Rodriga ke kreo el porto de Split. Todo esto da una imajen bien impresionante de lo ke fue la komunidad sefaradi de Ragusa, ma la verdad es ke la yena imajen de esta komunidad no puede ser topada en un solo archivo o en un livro. Es solo por medio de investigasiones seriozas en los archivos de todos los paizes del Mediterraneo ke podremos tener una imajen konforme a la realidad de la istoria, la vida diaria i las aktividades de los djudios de Ragusa/Dubrovnik.
|
