AKI YERUSHALAYIM #85

JACOB RODRIGUEZ PEREIRA
Prekursor de la ensenyansa a los sodros-mudos
(AY 34-35, 1987)

El filmo australiano “Children of a lesser God” ke su prinsipala aktrisa resivio oganyo el Oskar por su interpretasion del rolo de una sodra-muda a la kuala se bushka a embezar a avlar, permetio a los milyones de personas ke lo vieron de mijor entender la dura suerte de los ke nasen sodros o se ensodresen de chika edad i no pueden embezarsen a avlar komo kada uno de mozotros.

Grasias a los grandes progresos echos en este kampo, oy dia el problema ke enfrenta a los sodros-mudos es muncho mas fasil a rezolver ke en los siglos pasados. En la mayoria de los paizes adelantados ay eskolas o institusiones espesiales ande eyos pueden embezar a avlar, a entender lo ke les es dicho i mantener relasiones mas o menos normales kon el resto de la djente.

Muy pokos saven, djuntos kon esto, ke el primero a aver dezvelopado un metodo ke permetiera a los sodros-mudos de avlar i no solo darse a entender kon sinyos de la mano, fue Jacob Rodriguez Pereira, un konverso de Espanya ke, fuyendo de la Inkizision se aresento en Bordeaux, en la primera metad del siglo 18.

Detalios de grande intereso sovre la vida i los alkanses de Rodriguez Pereira mos yegaron ultimamente, en un artikalo publikado en la “Revista de Estudios Extremeños” por Alberto Garcia Torres, de la Fakultad de Teolojia en la Universidad de Granada.

El artikolo empesa kon la istoria detaliada de la famiya Rodriguez Pereira ke, al ser proklamado el Edikto de Ekspulsion de los Djudios de Espanya, en 1492, se refujia en Portugal. Ma las persekusiones relijiozas ovligan a los Rodriguez Pereira a salir de este paiz tambien. Eyos tornan a Espanya ande se konverten al kristianizmo (por la forma solo siendo ke en el sekreto de sus kaza eyos kontinuan a observar los mandamientos de la relijion djudia) i se aresentan en Berlanga, en la rejion de Extremadura.

Jacob Rodriguez Pereira ke nase en esta sivdad en 1715, parte de ayi a la edad de 17-19 anyos i se aresenta en Bordeaux. Ay ken dize ke fue yamado ayi por parientes suyos ke ya bivian en esta sivdad ma ay tambien ken pensa ke el abandono Berlanga por espanto de la Inkizision. Ya se save, en efekto, ke algunos parientes suyos, en Espanya, fueron djuzgados por el “Santo Oficio”. En Bordeaux, de otra parte, los djudios portugezes i espanyoles gozan de la mayor parte de los derechos siviles ke tienen los otros abitantes. Despues de 1723 eyos ya no son mas ovligados a eskonder sus verdadera relijion i pretender ke son kristianos. En un dokumento firmado en este anyo por el rey Luis 15, eyos son dezinyados publikamente komo djudios i desde entonses pueden observar sus relijion libremente i aviertamente.

Aun ke Jacob Rodriguez Pereira era muy kapache en kestiones de finansas, el konsentra todos sus esforsos en la bushkeda de un metodo ke permeta a los sodros-mudos de avlar.

Ke es la razon ke se dedika a este tema djustamente? Sigun Rodriguez Pereira el mizmo, el fue pushado a investigar esta kestion por el intereso ke tenia por una sierta persona. El no presizo ken era esta persona ma se pensa ke se trata de una ermana sodra-muda ke el tenia i a la kuala keria embezar a avlar.

Despues de varios anyos de estudios i investigasiones kon sodros-mudos, en 1745 el ya perfeksiona su metodo al punto ke puede dar rezultados impresionantes. Su primera reushidad fue kon un ninyo djudio, Aaron Beaunarin, sodro de nasimiento ke despues de unas kuantas lisiones ariva a prononsar diversas palavras i frazas.

Poko despues le es trayido un otro ninyo, M. d’Azy d’Etavigny, ke era el tambien sodro-mudo. En 5 dias de lisiones Rodriguez Pereira reushe a azerle prononsar 50 palavras diferentes i en el espasio de pokos mezes el ninyo ya tiene un vokabulario kon el ayudo del kual puede ekspresarse i darse entender.

Este ultimo alkanse asigura a Jacob Rodriguez Pereira el rekonosimiento ke tanto dezeava alkansar, en primero de la Akademia Real de Beyas Artes de Cannes, despues de la Akademia de Sensias de Paris i enfin del rey Luis 15 el mizmo, ke lo resive en audiensia i delantre del kual aze una demonstrasion de su metodo: su elevo d’Azy d’Etavigny prononsa unas kuantas frazas i a la demanda del rey, resita una orasion.

Despues vienen, una detras de la otra, entrevistas kon personalidades i shefes de estado komo los reyes de Polonia, Suedia, Danimarka i mas, ke kedan maraviyados por sus alkanses i le ekspresan sus admirasion.

En 1780, Jacob Rodriguez Pereira muere en Paris, aedado de 65 anyos i kon la satisfaksion de ver su metodo rekonosido i apresiado. La rekonosensia ke le es devida por sus esforsos fue muy bien ekspresada por un jurnalista ke, ainda en 1747, despues de los primeros alkanses kon los ninyos Beaunarin i d’Etavigny, eskrive ke “El echo ke Rodriguez Pereira aiga topado un metodo para azer avlar a los sodros-mudos, ke es mas fasil i efikas de los ke avia de antes, ya le basta para mereser un lugar de onor entre los benefaktores del djenero umano”.

Volver