AKI YERUSHALAYIM #85

MADRES DJUDIAS DE SULTANES
EN EL IMPERIO OTOMANO
(AY 80, 2006)
Zelda Ovadia

Ultimamente estan teniendo lugar en Turkia diversos evenimientos ke estan markando los 700 anyos de la fondasion del Imperio Otomano. Kon esta okazion fueron publikados tambien munchos livros sovre aspektos menos konosidos por el ancho publiko de la istoria de este imperio, lo ke permetera a los lektores de mijor konoser esta istoria i sus sekretos.

Uno de estos livros yeva el nombre de “Padişah Analari” (madres de sultanes) de Ali Kemal Meram. El livro ke empesa kon la istoria de la fondasion del Imperio Otomano, examina profondamente las epokas de todos los sultanes desdel primer, Osman, ke dio su nombre al Imperio, i asta el ultimo de eyos - Vahdettin.
En desparte de los evenimientos ke akontesieron durante los 600 anyos de este imperio, el livro, segun lo indika su nombre, se esta konsentrando sovre las madres de los sultanes. De este livro sovresale ke dinguna de las madres de los sultanes no eran turkas muzulmanas, sino ke eran de orijin grega, bulgara, serba, djudia, rusa, franseza i mas, aun ke, kon sus yegada al palasio todas avian resivido nombres turkos.

Sinko de estas madres eran de orijin djudia i a lo menos una de eyas, Hürrem Sultan, tuvo una muy grande enfluensa no solo sovre todo le ke tenia lugar en el palasio de Topkapi, ke era la rezidensia ofisiala de los sultanes, sino ke tambien sovre la politika interiora i eksteriora del imperio.

Segun el orden kronolojiko Ayshe Hafza Sultan, kon su verdadero nombre Helga (1479-1534), fue la primera sultana de orijin djudia. Eya fue la mujer de Yavuz Sultan Selim i madre del mas famozo sultan del Imperio Otomano, Kanuni Sultan Süleyman, (Sultan Süleyman el Manyifiko), ke reyno 46 anyos. Durante su reyno el Imperio avia yegado a su kolmo: los 6.557.000 kms. kuadrados ke eran la superfisia del Imperio despues de la muerte de su padre, Yavuz Sultan Selim, fueron ancheados asta una superfisia de 14.893.000 kms. kuadrados.

Despues de la suvida al trono de su ijo, Süleyman el Manyifiko, eya resivio el titolo de Valide Sultan, Sultana Madre. Su ijo se akonsejava frekuentamente kon eya i atribuiya una grande importansia a sus konsejos.

Ayshe Hafza Sultan murio a la edad de 55 anyos i fue enterrada en la turbe (tomba) ke se topa en la mishkita al nombre de Sultan Selim, en Estambol.
Hürrem Sultan (Hürrem sinyifika en viejo turko “mujer alegre”) fue, si no la mas famoza a lo menos la sultana ke tuvo mas influensa no solo en el imperio sino ke afuera de el tambien.

Eya fue la mujer de Kanuni Sultan Süleyman i es konosida por ser la unika mujer ke fue kazada a un sultan de manera ofisiala. Eya nasio en una famiya djudia de Polonia, i su nombre era Alexandra Lisowska o, komo fue yamada en el mundo oksidental Roxalane (1506-1558). Eya fue arrevatada, en teritorio de la Ukraina de oy, kuando era ainda una ijika chika, i regalada al palasio otomano por el governador de Krimea. Kon su ermozura, intelijensia, kapachedad i seksapil, eya supo atirar la atension del sultan, se gano su konfiensa i amistad i devino su mujer legala. Eya se izo un lugar de onor al seno de las mujeres en el harem tambien. Hürrem Sultan pario al Sultan Süleyman sinko kreaturas. Uno de sus ijos, Sultan Selim II, fue el ke suksedo a su padre.

Hürrem Sultan ke murio a la edad de 52 anyos, sin poder ver la suvida al trono de su ijo, avia apoyado la gerra del Imperio kon Iran i avia reushido a lograr una paz entre Polonia i Rusia.

Eya fue enterrada en el mozoleo ke yeva su nombre en la mishkita de Süleymaniye, en Estambol.

Otra madre djudia de un sultan turko, Rashel (1525-1587), fue arrevatada por pirates otomanos kuando no avia kumplido ainda la edad de 10 anyos, i vendida en uno de los sentros komersiales mas famozos de Estambol a uno de los merkaderes de siervos en Pera.

Aun ke su yeno nombre i el paiz en el kual fue arrevatada no son konosidos, segun manaderos istorikos eya era ija de una famiya djudia.

En su tierna edad eya fue merkada por uno de los enkargados del Sultan i de mizmo ke otras djovenas de su edad eya tambien fue yevada al palasio para servir en el harem.

Malgrado ke era una ijika flaka i sin muncha fuersa, aun ke muy intelijente, Rashel impresiono muncho a Hürrem Sultan ke la embio a Manisa afin ke resiva una buena edukasion. Pokos anyos despues, Hürrem Sultan ke yega a Manisa para una vijita fue atirada por la ermozura de una djovena ke se estava paseando en la guerta. Kuando se ambezo ke esta era akeya kreatura flaka ke avia konosido anyos atras, eya se alegra muncho i deside ke esta sera la mujer de uno de sus ijos. Hürrem Sultan le da el nombre de Nurbanu ke sinyifka :”Reyna ke arelumbra kon la luz del Dio”.

En fin el dezeo de Hürrem fue realizado i Nurbanu se kazo kon Sari Selim (Selim el Amariyo a kavza de la kolor blonda de sus kaveyos), ke no tenia entonses munchas shanses de suvir al trono.

En segito a la muerte de todos sus ermanos, se realizo lo imposible i despues de la muerte de su padre, Süleyman el Mayifiko, el suvio al trono komo Sultan Selim II i por konsekuensa Nurbanu se izo Sultana.

Despues de la muerte de su marido, es su ijo Murat III ke vino a la kavesera del Imperio Otomano.

Nurbanu Valide Sultan izo fraguar entre los anyos 1570-1579 la mishkita Atik Valide Camii, en Estambol. La chika Rashel ke yego a ser Sultana Madre kon el nombre de Nurbanu esta enterrada en el mozoleo de Selim II, en Estambol.

Hatice Muazzez Sultan (?? – 1687) fue la mujer de Sultan Ibrahim I la madre del Sultan Mehmet II. Eya era djudia de orijin polaka i su nombre de nasimiento era Eva. Siendo ke eya no vido suvir a su ijo al trono no resivio el titolo de Valide Sultan. Eya fue enterrada en el mozoleo Kanuni Sultan Süleyman, en la mishkita Süleymaniye, en Estambol.

Bezmialem (Bezm-i Alem) Sultan  (1807-1853) era la mujer del Sultan Mahmud II i la madre del Sultan Abdülmecit. Bezm-i Alem, ke sinyifika “Fiesta al mundo” fue una de las Valide Sultan (Sultanas Madres) mas aktivas del Imperio Otomano. Aun ke no se mesklo personalmente en las kestiones del governo, eya djugo un rolo muy importante komo konsejera de su ijo, Abdülmecit.  Eya fue muy respektada i onorada por todos por su ayudo a los proves i menesterozos.

Bezmialem Sultan, ke respondia al nombre de Suzi, era ija de una famiya djudia orijinaria de Rusia. A la vista ke el nombre de su padre era Leon.

Kuando su ijo Abdülmecit suvio al trono a la edad de 16 anyos, eya tenia 32 anyos i kumplio el rolo de Valide Sultan durante un periodo de 14 anyos, asta su muerte, a la edad de 46 anyos.

Segun manaderos istorikos Abdülmecit, ke keria muncho bien a su madre, se akonsejava kon eya mizmo para eskojer sus ministros.

Bezmialem Sultan apoyo tambien la konstruksion de importantes edifisios en Estambol, i entre eyos el Chalet Dilkusa, en el Palasio Yildiz; las fuentes ke yevan su nombre en Machka, Topkapi i Yildiz; el ospital Gureba i mas.

Bezmialem Sultan murio el 2 de Mayo 1853 en el palasio de Dolmabahche i fue enterrada en el mozoleo Mahmut II, en el Divanyolu, en Estambol.

Esta es la kurta istoria de las sinko sultanas de oriin djudia, algunas de las kualas son akodradas asta oy komo mujeres de valor ke supieron azersen un lugar de respekto i onor en el palasio, malgrado las duras kondisiones ke reynavan ayi en akeya epoka.

Volver