AKI YERUSHALAYIM #85

FILATELIA SEFARADI
Mordehay Arbell

Sentenario de la sinagoga “Shaarei Tikva” (1904-2004),
en Lisbon, Portugal

En segito al orden de ekspulsion de los djudios de Portugal, firmado por el rey Manuel I (1495-1521), en el 4 de Disiembre 1496, i la konversion forsada de estos djudios en 1497, la vida djudia de Portugal, tan aktiva asta entonses, yego a su fin.

En 1531 el papa Clemente VII autorizo la instalasion en Portugal de la Inkizision, ke su prinsipal aktividad fue la persekusion de los los “kristianos muevos”, o sea los konversos. Segun statistikas, en el periodo de aktividad de la Inkizision, fueron dadas 30.000 sentensias de “autos-de-fe” i 1800 konversos fueron kemados.

Sovre la inisiativa del primer ministro Sebastiao Jose de Carvalho e Mello, Markez de Pombal (1699-1782), las aktividades de la Inkizision en este paiz fueron limitadas i el ultimo “auto-de-fe” tuvo lugar en 1791.

En una letra embiada por el Palasio Real, el 11 de Novembre 1797, i adresada.a los djudios portugezes de Surinam, es dicho:

“...su Maestad noto kon plazer ke la Nasion Djudia Portugeza se akodra de Portugal, i kere ke todos o una parte de eyos retornen a este paiz, ande podran bivir kon seguridad i repozo. Las kavzas de sus destierro no existen mas.....”
El retorno de los djudios a Portugal empeso en el anyo 1800. En un dekreto publikado en 1868, les fue permetido de tener un simeterio; en 1892 la komunidad djudia tuvo el derecho de tener servisios relijiozos i en 1904 fue avierta en Lisbon la sinagoga “Shaarei Tivka”. Kon okazion del sentenario de la sinagoga la posta de Portugal emetio una seria de timbros ke traemos a kontinuasion:

Timbro-bloke por la valor de 1.50 euro. Interior de la sinagoga “Shaarei Tikva”

Timbro por la valor de € 0.30. Detalio del livro “Mishne Tora” del Rambam, imprimido en 1472	Timbro de € 0.45. La Estreya de David en la Biblia de Cervera ke data de 1299
Timbro de € 0.56. La Menora en esta mizma Biblia	Timbro de € 0.72. Piedra tombala, del anyo 482, deskuvierta en Mertola i sovre la kuala esta gravada una menora.
Timbro de € 1.00 euro. Pajina de la Biblia de Abravanel, de Coimbra, del siglo 14.	Timbro de € 2.00. Piedra kon una inskripsion en ebreo.

El sentenario de la sinagoga fue selebrado en prezensia del Prezidente de Portugal, ministros, autoridades relijiozas i politikas, reprezentantes de la akademia i de la komunidad djudia de Lisbon.

Volver