AKI YERUSHALAYIM #85

LA BIBLIOTEKA DE UN MEDIKO DJUDIO
EN MALLORCA EN EL SIGLO 14
(AY 42, 1990)
Avraam Baruh

La medesina fue una de las profesiones en las kualas los djudios se distingieron mas desde largos siglos atras, kaje en todos los paizes de la Diaspora i ainda mas i mas en Espanya, onde se puede dizir ke en siertos periodos eyos yegaron al mas alto grado de esta profesion, para sus epoka.

Esto puede ser visto entre otras, del fakto ke eyos eran los medikos de los reyes, dukes i otras grandes personalidades, ke se podian permeter de pagar mas para asigurarsen los mijores kudios medikales ke podian ser obtenidos en sus tiempo.

Sus grande prestijio i la estima de la kuala gozavan en estos sirkolos, grasias a sus kapachidad de kurar hazinos mizmo en los kavzos mas difisiles, kuando los otros medikos ya levantavan las manos i deklaravan ke la malatia era inkurable, les ayudo munchas vezes a yegar a postos de los mas importantes, tambien en los kampos de la administrasion del estado, diplomasia etc. Ansi es ke munchas vezes topamos medikos djudios ke eran tambien konsejeros de los reyes o dukes ke servian, o diplomates o mizmo ministros.

El mas konosido de estos medikos djudios ke se distingieron en otros kampos tambien, fue sin duda Hasday Ibn Chaprut, ke sirvio al rey Abdel Rahman III i despues a Al Hakem II, en Cordoba, en la sigunda parte del siglo 10. El empeso su servisio kon Abdel Rahman III komo mediko, ma bien presto fue enkargado kon importantes misiones diplomatikas tambien, fue nombrado komo direktor de las duanas i shefe de protokolo en la korte del rey i kumplio tambien las funksiones de Nasi, o sea shefe de la komunidad djudia i su reprezentante delantre las autoridades.

En desparte de Ibn Chaprut se konosen numerozos otros kavzos de djudios ke empesaron komo medikos ma se distingieron en otros kampos tambien komo la administrasion del estado, las sensias, la literatura o mizmo la relijion djudia. El mijor enshemplo en este ultimo kampo es del Arambam, el Maimonides, ke mantuvo a su famiya lavorando komo mediko, en la korte del sultan de Ejipto, aun ke su prinsipala nombradia es devida a su ovra en el kampo de la relijion, prinsipalmente komo kodifikador de la ley relijioza djudia.

Esta reushidad de los medikos djudios a distingirsen no solo en el kampo de la medikeria sino ke en munchos otros kampos tambien de la aktividad umana, es devida en buena parte al echo ke en desparte de lo ke tenia ke estudiar uno para ser mediko, en akeyos tiempos los djudios estudiavan la Biblia i el Talmud tambien i munchos de entre eyos no se kontentavan kon esto sino ke estudiavan tambien las doktrinas filozofikas de Aristoteles i otros savios gregos, romanos, arabos etc.

Esto mos ayuda a entender mas fasilmente la razon por la kuala entre los medikos djudios topamos munchos ke yegaron a ser de las mas importantes figuras de la kultura djudia i mundiala i ainda mas de esto, ke mizmo los ke no se izieron selebres, en sus grande mayoria eran personas de una ancha kultura, medikala i jenerala tambien.

Una prova de esto mos fue dada ultimamente en un artikolo del Dr. Jose Maria Tejerina, sovre la Medesina Medievala en Mallorca, publikado en el livro "La Historia de Mallorca" koordinado por Jose Mascaro Pasarius, i en el kual son dados detalios muy interesantes sovre la biblioteka del mediko djudio Yeuda Moskoni, ke bivio en Mallorca en la sigunda metad del siglo 14.

Sigun es apuntado en este artikolo, Moskoni ke nasio en 1328 en Ohrida, Makedonia, se aresento en Mallorca onde exerso la profesion de mediko en la kuala se distingio tanto ke fue nombrado mediko del rey Pedro el Ceremonioso.
Ma parese ke mas tadre en su vida el tuvo problemas finansiarios en segito a los kualos duvo irse de la izla, deshando ayi a su mujer ke para pagar las devdas ke avia deshado, tuvo ke vender su kaza i entre otras su kabineto medikal i su biblioteka tambien.

Pokos anyos atras uno de los investigadores de Mallorca, Estanislao Aguilo, ke era el enkargado de los archivos de esta izla, topo un inventario de todo lo ke avia sido metido en vendida, de la kaza de Moskoni, unos 6 siglos atras. Ma komo este dokumento estava eskrito en ebreo lo entrego al sekretario de la Sosietad de Estudios Djudios de Paris, Israel Levy. El examino este dokumento, djuntos kon dos savios ekspertos en esta kestion, Steinschneider i Kayserling, i los 3 publikaron los rezultados de sus lavoro en la Revue d'Etudes Juives. De esto rezulta ke la biblioteka de Moskoni kontava mas de 150 livros, lo ke era una sifra enorme para akeyos tiempos, kuando los livros eran eskritos a mano i kostavan una fortuna. Sigun el artikolo del Dr Jose Maria Tejerina, mizmo las bibliotekas de universidades, en la Edad Media, eran relativamente chikas i raramente depasavan el sentenar de livros.

Este inventario ansi ke otros dokumentos mas ke estan yegando a muestra konosensia agora solo, a mizura ke estan siendo desifrados i examinados mas i mas dokumentos sovre la istoria i kultura de los djudios, en los archivos de Espanya i otros paizes, mos permeten de tener una idea mas klara i konkreta del orizonte kultural i intelektual de la komunidad djudia i de los medikos djudios mas partikularmente, en la sosiedad medievala espanyola.

Volver