AKI YERUSHALAYIM #84

GASTRONOMIA SEFARADI                         Zelda Ovadia

ARROZ KON TOMAT
(para 4 personas)

Materiales:
1 ½      de arroz basmati o otro
1          sevoya pikada
3          kucharas de azeyte
2          dientes de ajo machakados
1          kuchara de tomatada
3          tomates grandes, rayidos
1          kucharika de asukar
            sal i pimienta

Preparasion:
En una kaldera meter la azeyte i friyir la sevoya asta ke toma una kolor ruvya. Adjustar el ajo, la tomatada ke fue dezecha en un poko de agua, los tomates rayidos, la asukar, sal i  pimienta. Kozer el kaldo unos 10 minutos i adjustar 2 ¼ vazos de agua kaente. Del momento ke el kaldo de tomat empesa a buyir echar alientro el arroz, tapar la kaldera, menguar el fuego i kozer asta ke todo el likido se absorbe. 

BERENDJENA FRITA KON TOMAT
(Para 6 personas)

Ingredientes:

3          berendjenas medianas
4          dientes de ajo pikados fino
4          tomates grandes, mundados i pikados
2          kucharas de vinagre
1          kucharika de asukar
¼         de kucharika de paprika kemando
½         vazo de prishil pikado
             sal
            azeyte para friyir

Preparasion:
Lavar las berendjenas, enshugarlas i kortarlas en revanadas de medio sentimetro de espesor. Meterlas en un kolador, echar por ensima sal i deshar eskurrir por media ora. Enshaguarlas basho la agua koriente i enshugarlas bien. Friyir las berendjenas, kitarlas de la azeyte i meterlas sovre tovajas de papel.

Para la sos, friyir en un poko de azeyte los dientes de ajo, adjustar los tomates rayidos, vinagre, asukar, sal i paprika kemando (fuerte). Kozer unos 20 minutos sin tapar la sarten. Mesklar de vez en kuando. Abashar de la lumbre, adjustar el prishil pikado i deshar yelar.
Servir las berendjenas fritas kuviertas kon la sos de tomat.

KALAVASIKAS KON KEZO
(Para 6 personas)

Ingredientes:
½         kilo de kalavasikas
300      grs. de kezo feta o kezo blanko (bulgaro)
2          guevos batidos
2          kucharikas de anito (tereot) o ojas de menta pikada
½         kucharika de muez muskada 
pimienta a gusto

Preparasion:
 Lavar las kalavasikas, kortar en dos a la larga, i buyirlas en agua i sal por unos kuantos minutos, asta ke se ablandan un poko. Kitarlas de la agua i areglarlas en un paylon ke va al orno.

Dezazer el kezo kon un piron, adjustar los guevos batidos, la pimienta, muez moskada, el tereot o menta i mesklar bien el gomo. Meter sovre kada kalavasika una kuchara yena del gomo i kozer unos 30 minutos en orno ke ya fue kaentado de antes a una temperatura de 180 grados.

Este plato se puede servir kaente o yelado akompanyado de yogurt.

Volver