AKI YERUSHALAYIM #84

ARTIKOLOS

(1643)
Akontesimiento en una “aguna” Alisa Meyuhas Ginio
De la revista ממזרח וממערב, ח
Ed.: Universidad Bar Ilan, Ramat Gan

Este artikolo trata de las deliberasiones ke tuvo el rabino Haim Shabtay de Saloniko a la demanda del tribunal rabiniko de Monastir. Este tribunal trato en el anyo 1643 de la suerte de una “aguna” (mujer ke su marido avia desparesido en un viaje, sin ke se sepa si el avia muerto o no, i no podia kazarse asta ke no se sepa kon yena seguridad ke el ya avia murido).
Las deliberasiones tokan a los testimonios arekojidos de siertas persoans sovre la desparision de dos merkaderes djudios ke avian salido de Monastir a Kastoria, i no se supo ke fue sus suerte. No podiendo determinar eyos mizmos si estos testimonios podian ser akseptados del punto de vista de la ley djudia, el tribunal rabiniko de Monastir demando la opinion del rabino Shabtay. El artikolo de la Prof. Alisa Ginio examina la korespondensia ke tuvo lugar a este sujeto entre las dos partes.

Aun ke no ay en esta korespondensia nada sovre la desizion alkansada por el rabino Shabtay, eya es importante porke mos ayuda a aklarar i mijor konoser interesantes aspektos de la vida de los djudios en esta rejion i sovretodo de la mizura en la kuala los rabinos de Monastri dependian, para la solsuion de problemas, partikularmente difisiles, de los rabino de Saloniko ke tenian ams eksperiensa en este kampo.

RAGUSA AND RAGUSAN JEWS
IN THE EFFORT TO RANSOM CAPTIVES
Moshe Orfali
ISSN 09518985
En: Mediterranean Histroical Review Vol. XVII, No. 2, Dec. 2002

En el siglo 16, kuando Espanya era enfrentada kon el Imperio Otomano, empeso una mueva faza en la lucha entre los kristianos i los muzulmanos, ma en desparte a los kombates ke tuvieron lugar entre las dos partes avia tambien grupos de korseres ke luchavan en favor de los intereses del bloko rival. De parte de los otomanos avia los berberes i de la parte del mundo krisitano, los Kavlieros de Malta. Los dos atakava naves de la parte opozada, tomavan sus merkansias i vendian los pasajeros komo esklavos. Merkaderes djudios sufrieron de las dos partes siendo ke eyos viajavan a bordo de naves de kristianos i de muzulmanos. El artikolo del Prof. Orfali trata de los esforsos echos por la republika de Ragusa (oy Dubrovnik) i de los djudios ke bivieron ayi para areskavdar los ke eran kativados por estos korseres.

Un estudio de los dokumentos en los archivos de Ragusa sovre los esforsos para areskavdar estos kativos amostra ke los djudios de Ragusa izieron una kontribusion sinyifikativa en este kampo, sea komo individuales i sea komo komunidad, espesialmente en una epoka de gerras i konfliktos i kuando los djudios servian de mediatores entre el mundo kristiano i el muzulmano.

Si los dirijentes de la republika de Ragusa no eran konsientes de esta kontribusion djudia no se puede eksplikar la konfiensa ke les mostraron i la preferensia ke les dieron sovre kandidatos krisitanos a este rolo de mediator, munchas vezes, malgrado la opozision de la iglezia katolika. Los djudios ke fueron eskojidos para estos postos no deziluzionaron esta konfiensa i se distingieron por sus aktivida en este kampo, indo a vezes asta pagar de sus propios fondos para el arezgatamiento de los kautivos.

Volver