AKI YERUSHALAYIM #84

Don Miguel
Otrun kapitolo del romanso pikaresko inedito
Djoha o Otniel Hodja, el Princhipe Deskalso
Avner Perez

Ombres matan uno al otro en la gerra
i no saven porke.
Les parese ke es por el Sultan, por el Rey,
por la onor i por la fama.
La verdad es ke afuera de feridas
i angustia del alma
no les keda nada.
I el sultan, i el rey, ke le inchen?
Ya estan embelekados kon otra gerra.
                (de: Tredje dichas de Djoha)  

El dia de viernes, 7 de Oktobre 1611 demanyana, poko despues de amaneser, topo a Djoha aparado al lado de la grande sitadela de Lepanto, katando de ayi el golfo. Las nevlinas kaje desparesieron enteras en akeya ora, i el espejo mavi del golfo se via de ayi muy klaro, iluminado por los primeros rayos del sol. La trankilidad al deredor era kumplida. De vez en kuando se oyian los gritos de dos o tres grajas apozadas sovre la sima de un pino en la shara ke entornava la sitadela. En supito se aparesio detras de la muraya un ombre. Era muy alto, muy flako, kon barvika puntuda i mustachos arretorsidos, ke en el pasado fueron pretos karvon, ma agora ya se incheron de ilos de plata. Las arrugas en la frente alta kontavan el kuento de una vida fortunada, yena de akontesimientos i aventuras. La mano siedra era paralizada. Era vestido a la turka ma su fizionomia dezia klaramente ke era ajeno.
Djoha lo saludo en turko ma el ombre no lo entendio i trato de avlarle en arabo kon un aksento mograbi. Viendo ke no reusho, apunto kon su dedo a si-mizmo i disho: "Espanyol". Pishin le dio Djoha los buenos dias i los ojos del estranjero se iluminaron kon una grande sonriza.

- Don Miguel, se prezento delantre de Djoha.

- Otniel, respondio Djoha. De onde viene Vd.?

- So orijinario de Castilla la Vieja, disho el ombre sin eksplikar o dar otros detalios, i Vd?

- So orijinario de Aragon la Antigua respondio Djoha, i viendo la ekspresion de kuriozidad sovre la kara de su oyedor, adjusto: del kal de Aragon en Salonika.

- Oy es exaktamente el dia, disho el espanyol entre si, katando el golfo, undido en sus penserios.

- Si, disho Djoha, 40 anyos exaktamente! No fui nasido entonses ma me kontaron todo.

El ombre arrodeo su kara i fikso su mirada en Djoha.

- Aki se akavo mi mosedad, disho en un tono melankoliko, vini aki a bushkar mi mosedad pedrida.

- Son las mizmas propias palavras del djamdji, disho Djoha. Es de su boka ke oyi sovre la terrivle batalia de Lepanto.

- Ken es este djamdji? demando don Miguel.

- Era un soldado en la armada turka. La verdad es ke su nombre es Salomon ma todos lo yaman "el djamdji".

- I ke sinyifika este nombre?

- Vidrero.

- I es su profesion?

- No. Despues de la batalia de Lepanto se izo un skolario. Muy entendido en la Ley Santa i en todas las sensias. Gran savio en la Kabala, es dizir la sensia mistika i misterioza, ma le agrada pasar lo mas de su vida en las tavernas. Kuando beve demaziado del vino empesa a avlar tonterias. Le parese entonses ke su puerpo es de vidro. No desha ke lo token, no sea ke le rompan los miembros i los guesos frajiles de su puerpo.

- Semos todos viktimas de akeya batalia,  disho don Miguel. Ay ken yeva las yagas por afuera, adjusto el,  amostrando su mano paralizada, i ay ken las tiene adientro del alma. Dezearia enkontrar este ombre. Se puede realizar este enkontro?

- Si, disho Djoha. Abasharemos abasho i se lo amostrare en la meane de Han Mushon.

- I avla el tambien este espanyol tan ermozo?

- Todos avlamos el espanyol en la meane de Han Mushon. Es muestra lengua.

- Muy estranyo", penso don Miguel ma no disho nada.

En la eskuridad de la meane, en un kanton apartado de la djente ke inchia el lugar, toparon al djamdji, arrodeado de redomas de raki i un livro avierto delantre de el.

- Han Salomon, disho Djoha, kero prezentarvos a don Miguel. Es un espanyol ke partisipo a la batalia de Lepanto i vino a bushkar aki su mosedad pedrida.

- En vano i debaldes vino, disho el viejo. La suya i la mia fueron despedasadas ayi kon las naves. Don Miguel lo eskucho enkantado, meneando su kavesa. No le dio la mano, ma se asento en frente i los dos bevieron i platikaron por oras. Avlaron de literatura, mensionando ovras famozas, de la filozofia i de la vida, nunka mensionando la gerra terrivle ke su rekuerdo estremesiente los persigia dezde kuarenta anyos. Djoha eskucho kon interes grande la konversasion sin avrir su boka. Don Miguel era tresalido de la agudez, la hohma i la saviduria de este eskolario. En el korso de la konversasion apunto al livro i demando ke ovra era.

- Es una piesa de teatro de Bartolome de Torres Naharro, se yama Akilana.

- Enkontri sus ovras kuando estuvi en Italia, disho don Miguel i espandio su mano para aferrar el livro, kudiando no tokar por azardo la mano del djamdji.

- No es espanyol,  disho.

- Si, es espanyol! Ma esta eskrito en letras ebreas, las mizmas letras kon las kualas fue eskrita toda la Biblia.

Entre otras, le demando don Miguel komo es ke un espanyol gerreo en el lado de los turkos. "Ay sien i vente anyos del dia ke deshi Espanya" le disho el djamdji. "Eya me gomito i me echo de su kara. No tengo ningun eskarinyo para esta patria falsa i madrasta. Los espanyoles son krueles. Si estava ayi agora ya me rompian mis guesos. Aki todos tienen kavod para mi, turkos, gregos i djudios. Solo los ijikos me sigen i me arrondjan piedras.

Algo ke avia oido don Miguel en su chikez le paso agora por el tino.

- Oyi algo de esto de mi aguelo, disho don Miguel

- Los aguelos nunka kontan todo a sus inyetos. Kontan algo i lo demas enterran al fondo de sus almas, para no danyar i no manchar demazia sus almas tiernas.

Kon lagrimas en sus ojos se despidio don Miguel de el i de Djoha. Djoha lo akompanyo kon sus ojos asta ke este se aserko a la puerta de la meane. Kuando ya estava para salir le grito "Da saludes a la Castilla la Vieja". El ombre se abolto i kon una sonriza iluminando su kara respondio: "Ya se los vo dar seguramente…"

Volver