|
AKI
YERUSHALAYIM #84
LA TOMBOLA
En un artikolo de Gina Camhy, publikado en el No. 34-35 de Aki Yerushalayim, unos 20 anyos atras, aviamos tokado a uno de los djogos mas populares al seno de los sefaradis de los Balkanes: La Tombola (mas konosido en el mundo kon el nombre de Bingo).
Una mizura de la grande popularidad de este djogo es ke era konosido i apresiado por los sefaradis no solo en Sarayevo onde nasio i se engrandesio la Sra. Camhy, sino ke en munchas otras komunidades tambien, aun ke klaramente en kada lugar podian aver diferensias sovre los terminos ke eran uzados. Por enshemplo, la Sra. Camhy eksplika en su artikolo ke en este djogo los partisipantes resivian kada uno un karton sovre el kual estavan eskritos numeros i ke metian fijonikos sovre los numeros ke eran anunsiados, despues de aver sido travados de una talega; de otra parte, en un mesaje del Sr. Albert N. Contente, ke fue publikado en Ladinokomunita, es dicho ke en Izmir, onde el nasio, lo ke se travava de la talega eran “bidines”, un termino kaji deskonosido oy por la mayoria de la djente i ke se refera a la vista a unos botones de tavla redondos, sovre kada uno de los kualos estava eskrito uno de los numeros de la tombola.
Otra diferensia toka a uno de los aspektos mas atrayentes de este djogo: los nombres umoristikos dados a kada numero i ke eran proklamados a boz alta por el rijidor del djogo. Ansi es ke en el artikolo de la Sra. Camhy (eskrito sigun el dialekto partikular de los djudios de Yugoslavia), topamos los sigientes nombres para una parte de los numeros de tombola:
ochu biskochu
diez minyan
dodji trivos de Israel
dizisiete siman tov
diziocho la hupa
dizimueve dizi ke no veye
vente i uno ventura buena
vente i dos dos palazikas
setenta i siete dos pachaikas
ochenta la vava
noventa el papu
A este sujeto topamos en el mesaje del Sr. Contente los sigientes nombres:
Uno Primer ladron de la marina
Dos Ladrones de kuzina
Tres Tre pe te tre (el tartamudo)
Kuatro Las pachas del gato
Sinko Livros de la Ley
Sesh Media duzinika
Siete Dias de la semana
Ocho Biskocho – medio krudo medio kocho
Mueve Mezes de la prenyada
Diez Minyan
Onze Dos pinos altos
Dodje Una duzinika
Tredje Kumple minyan
Disiete Dize ke no siente
Vente i uno Ventura Buena
Vente i dos Dos patonikas
A estos numeros-kon-nombres podemos adjustar unos kuantos mas de los kualos mos akodramos asta oy, komo: 77 – las pachas de Bulisa; 70 – ke no se asenta; 99 - Tarapapu ets.
Todos estos eran nombres ke provokavan rizas onde los prezentes i kreavan una atmosfera de alegria i buena umor, en lo ke kada uno markava sovre su “kartela” los numeros ke tenia de entre los ke eran anunsiados. Kuando ya avia markado de esta manera sinko numeros en una de las linyas de la kartela, el gritava ”Kinta!” i resivia un kuarrto de la suma ke se avia arekojido de lo ke kada uno avia metido al prinsipio en la kasha del djogo. El resto, o sea 3 kuartos de la suma, era pagado al ken reushia a inchir todas las linyas de la kartela.
La tombola es un djogo universal, sigun puede ser visto del fakto ke es djugado en munchos paizes i ay mizmo salas espesialas de “bingo”, onde el publiko puede ir i pasar la ora. Si ay algo ke este djogo tiene de spesial onde los sefaradis, es a la vista este uzo de apegar a algunos numeros nombres umoristikos, ke reflektan tambien en una sierta mizura el folklor espesial de muestra komunidad.
Regretablamente tenemos estos nombres umoristikos solamente para una parte de los numeros de la tombola i no es klaro si para el resto de los numeros no se uzavan tales nombres, o ke ya avia ma mo los olvidimos kon el tiempo.
Si ay entre muestros lektores ke se akodran de mas nombres de los ke dimos aki, les rogamos de embiarmolos afin de poder kompletar muestras konosensias en este kampo.
Volver |