AKI YERUSHALAYIM #84

MADAME TAPON I MONSIEUR TAPON

Konoses a madam Tapon? Es esta una ekspresion, una formula, una kurioza manera de avlar ke mi padre i mi tia uzavan frekuentamente i ke, traversando las jenerasiones, es uzado ainda por mis sovrinas.

Estavamos entornados de madamas i madmuazeles “Tapon”. Podiamos mozotros tambien  devenir una madam Tapon, dependiendo de las sirkonstansias i del estado de animo de muestros parientes. Se uzava, en tono de burla, para serrarmos la boka. I avia tambien, naturalmente, ombres ke resivian este titolo i ,mizmo los enigmatikos “Tapon-sistron”.

Ay naturalmente tapones de ustensiles, de bokales i mizmo de mezas ma para entender el verdadero senso kon el kual era uzado, kale azer parafrazas, siendo ke su sinyifikasion depende del konteksto. Ansina es ke tapon puede sinyifikar madmuazel-yo-se-todo, madmuazel-de-todo-me-mesklo, madmuazel-ke-se-da-ayres, ke pensa ser lo ke no es i ke muy presto kale meter en su lugar.

“Madam Tapon” era uzado entre los adultos ma lo mas frekuentamente de adulto a ninyo; nunka de un ninyo a adulto porke el buto era djustamente de meter a kada uno en su lugar. Madam Tapon o Musyu Tapon se kayavan entonses, kedavan de gritar i dezmodrarsen, se apresuravan  de azer lo ke devian.

El “Madam Tapon” no era un termino ke arebashava, ni brutal. El podia mizmo ser karinyozo diziendo simplemente ya se ken sos i no me puedes enganyar.

1. Ya estas pronta, madam Tapon? Kuando el tiempo pasado a admirarse   delantre un espejo ya avia turado demazia.

2. Ya puedes meter la meza, madam Tapon? Kuando a la vista la sinyora Tapon no estava pensando a azer esto.

Avia tambien la mimika ke dava mas fuersa a esta formula, medio severa, medio sonriyendo, una seja levantada, la solombra de una sonriza de una kara serioza, i a vezes un ayre de burla. Las madam Tapon se djuntavan entonses a todos los otros adjektivos uzados en semejantes okaziones komo “maredo”, “bastadra”, “zingana”, “mamzer o mamzera” i mas.

Volver