AKI YERUSHALAYIM #84

LETRA DEL REDAKTOR
Moshe Shaul

Keridos lektores,

Una idea en la mizura en la kuala esta pujando el intereso enverso la istoria del djudaizmo sefaradi i su kultura mos es dada por el numero impresionante de livros, revistas i artikolos ke son publikados ultimamente sovre estos dos temas.

Esta puja se refletka muy bien en la rubrika “Livros, revistas i estudios” de este numero de Aki Yerushalayim ke se espande sovre 15 pajinas, o sea serka de 50% mas del presedente numero de la revista onde esta rubrika tenia 11 pajinas solo.

No ay duda ke el numero exakto de estos livros publikados en las diversas partes del mundo es muncho mas grande, siendo ke mozotros tratamos solamente de los livros ke son embiados a muestra redaksion i eyos no son ke una parte solo de lo ke ay en este kampo

Djuntos kon esto devemos dizir ke los livros de los kualos tratamos en este numero ya bastan para dar una buena idea de la kreasion literaria kontemporanea en ladino i de la mizura en la kuala eya mos esta ayudando a mijor konoser la istoria i la kreasion kulturala del mundo sefaradi.

Rekomendamos a muestros lektores de bushkar a merkar i a meldar kon atension, a lo menos una parte de estos livros ansi ke de los ke ya examinimos en presedentes numeros de Aki Yerushalayim, kreando ansi onde kada uno de mozotros una chika Biblioteka Sefaradi, ke ira pujando i engrandesiendose kon el tiempo.

Ay una dicha segun la kuala “No podemos saver ke sera muestro futuro  si no konosemos muestro pasado”. Esto se aplika a mozotros tambien, los amantes de la kultura djudeo-espanyola. No podremos saver onde va muestra kultura i ke son sus shanses de kontinuar a existir si no konosemos lo ke fue kreado por muestros padres en este kampo. Es solamente kuando tendremos un buen konosimiento de este tema, kuando savremos muncho mijor ke agora lo ke izieron muestros antepasados i en ke kampos se distingieron, ke tendremos las kondisiones menesterozas, i espero ke la enerjia tambien, para el grande esforso del kual tenemos menester afin de asegurar ke esta kreasion no sea olvidada, sino ke a la kontra sierva de baza para el empesijo de una mueva etapa,de kreasion jurnalistika i kulturala.

Volver