AKI YERUSHALAYIM #83

GASTRONOMIA SEFARADI
Zelda Ovadia

Al aserkarsen los dias de Pesah vos traemos aki unas kuantas rechetas kon algunos de los platos tradisionales de esta fiesta.

YAHNI DE KODRERO
(para 4-6 personas)

Una de las komidas ke se uza a servir durante la fiesta de Pesah es el kodrero, sea al orno o sea gizado. Aki vos traemos una de las variasiones de komo gizarlo.

Materiales:

2 kgs. de karne de kodrero kortada en grandes kubos
1 sevoya pikada
100 grs. de tomatada
2 dientes de ajo machakados
1/3 vazo de azeyte
½ vazo de agua
½ limon, el sumo
   sal i pimienta a gusto

Preparasion:

En un kaldera yana, kaentar bien la azeyte i friyir los kubos de kodrero unos 10 minutos asta ke toman una kolor dorada. Kitar la karne de la kaldera i en la mizma azeyte friyir la sevoya pikada. Retornar el kodrero a la kaldera, adjustar la tomatada, el ajo, agua, sal i pimienta i el sumo de limon. Kozer tapado, en lumbre muy flosha, unas dos oras asta ke la karne esta muy blanda.

El yahni de kodrero se puede servir kon arroz. Los ke dezean pueden adjustar bezelya (irvia), o avas freskas, ke fueron gizadas aparte i ke son lugumbres de la sezon (aun ke oy se pueden merkar konjelados el anyo entero).

Tres kurtas rechetas para platos de Pesah, muy fasiles a preparar, ke tomimos del livro de gizado “Kon grasia i kon niur” publikada por la famiya de Ester Ventura, de bendicha memoria.

RULOS DE MATSA KON KARNE

Ingredientes:

6 matsot
½ kg. de karne molida
2 sevoyas pikadas
1 guevo
    sal i pimienta a gusto
    azeyte para friyir

Preparasion:

Pasar las matsot basho la agua de la fuente i pozarlas sovre una tevaja limpia. Kortar, kon muncha atension, kada matsa en dos.

Echar 2-3 kucharas de azeyte en una sarten  i sofriyir las sevoyas pikadas, asta ke se azen transparentes. Adjustar la karne pikada i sofriyirla kon las sevoyas endjuntos, todo en dezaziendola kon un piron para ke no keden bultikos. Adjustar sal i pimienta.

Kuando la karne molida troka de kolor i ya esta bien sofrita, abashar de la lumbre.

Meter dos kucharas del gomo en kada una de las medias matsot i arodearlas en forma de rulo. Untar los rulos en el guevo batido i friyirlos en la azeyte ke ya fue kaentada de antes. Servir kaente.

MINA DE KEZO

Ingredientes:

4-5 matsot rotas, mojadas i esprimidas
3 guevos
    meskla de kezos (blanko, kashkaval i otros)
    sal

Preparasion:

Mesklar todos los ingredientes. Untar un paylon ke va al orno kon un poko de manteka o margarina. Echar la meskla al paylon i kozer en orno ke ya fue kaentado de antes a 180 grados. La mina, ke sta pronta kuando tomo una kolor ruvya, puede servir de dezayuno en los dias de Pesah.

GATÓ DE PESAH

En desparte ke los guevos reynan kaji en todos los platos ke aprontamos en Pesah eyos se topan en abundansia en los gatós tambien. Aki traemos la recheta del gató tradisional de esta fiesta: gató kon muezes.

Ingredientes:

7 guevos
250 grs. de muez molida
2-3 kucharas yenas de arina de patata
1 vazo de asukar
   kucharika de kanela (fakultativo)
   pokas gotas de vanila

Preparasion:

Batir la yemas kon la asukar i adjustar las muezes i la arina de patata. En un otro resipiente batir las klaras de guevo kon 3 kucharas de asukar asta ke pujan bien i mos azen akodrar la inieve. Mesklar, kon muncha delikateza, las klaras a la meskla de las yemas.

Untar kon un poko de azeyte o margarina o manteka el fondo de una forma de gató. Echar la meskla i kozer en orno ke fue kaentado a 170 grados.

El gató esta pronto kuando un kuchiyo enfinkado en su sentro sale seko.

Volver