AKI YERUSHALAYIM #83

KARMONA EL KALAYLADJI
Graciela Tevah de Ryba

Pasa el tiempo i van desparesiendo kozas i ofisios komo el kalayladji,  ke la tekonolojia de agora no tiene menester de el.

Vo a kontarvos kualo es kalayladji: estanyador, el ke kuvria kon kalay (estanyo) los ustensiles de kovre kon los kualos muestras madres uzavan gizar las komidas.

En la kaleja Camargo de Buenos Aires, morava i lavorava el kalayladjí  Migel Karmona, djidio orijinario del kuartier de  Karatash, Izmir, djuntos kon su mujer Mazalto i sus ijos Daviko i Grasia.

Se ambezo este ofisio desde mansevo, de su padre ke era muy bueno en esto.
Karmona  era benadam kon la djente, siempre pronto a servir a los klientes ke traiyan los tifsines, paylones, tifsin-burakados i kacherolas de kovre  para  atakanarlos.Tenie su atelie al fondo de la kaza i me akodro de el, metiendo el kalay a kaentar para echarlo al burako ke kalia tapar i el ruido ke esto azía. Munchas vezes se le tomava la boz del umo i del guezmo ke salian de ayi; i este no era un lavoro ke se azia pishin, al momento... a vezes avia menester de desharlo unos dias.

Dona Mazalto, su mujer, savia bien azer makrame.  A munchas  mujeres del kuartier  ke aprontavan sus ashugar les izo bodres de makrame en las savanas, kolchas, tapetes i manteles. Tenia el dono de ser benadam i kumplida: diez dedos - diez marafetes.

Tornando al kalayladji, a vezes kaminava por las kalejas aharvando las puertas i demandando si avia menester de atakanar algo.

Un dia el paylon ande mi madre azía el dulse de kayisí i mimbriyo tenia dos burakos.

Esperando el momento ke venga Karmona para areglarlo, na ke el aharvo a la puerta i mi madre fue a traerlo, ama kuando lo vido pishín  le disho:

- Luna este paylon no tiene arreglo. Tantos i tantos burakos tiene ke parese un tifsin burakado...

Mi madre kedo demudada. Alevantando la kara i mirandolo a los ojos le disho:

- Karmona, este paylon es rekodro de mi madre ke lo trusho de Izmir, komo vo a azer agora si no tiene arreglo?

Kedando en silensio unos minutos le disho:

- Luna, no te inierves, lo vo a yevar al atelie i vere kualo puedo azer, ainda mas saviendo  ke es un rekodro de famiya traido de Turkía.

A la semana viniente mi madre fue asta el atelie a demandar si avia hayre kon  el paylon. Karmona se alevanto de la siya ande estava lavorando i trusho el paylon areglado.

Volver