AUTORIDAD NASIONALA DEL LADINO
|
AKI YERUSHALAYIM #83 MUNCHOS I BUENOS! Aun ke uvo serka de 300 jurnales en ladino, publikados en la epoka ke empesa en 1842 kon la aparision en Izmir del primero de estos jurnales, la “Mueva Esperansa”, solo pokos de entre eyos tuvieron larga vida. Algunos duvieron ser serrados despues de la publikasion de pokos numeros, otros pudieron rezistir unos kuantos anyos, ma muy pokos solo kontinuaron a ser publikados mas de 10 anyos. Sovresale de entre eyos, de este punto de vista, el Şalom ke fiesto ultimamente sus 60 anyos de publikasion. El primer numero del Şalom aparesio el 20 de Oktobre 1947, despues ke la aktividad jurnalistika en ladino avia menguado muncho, komo konsekuensa del proseso de olvido i eskayimiento de la lengua djudeo-espanyola ke ya avia empesado al prinsipio del siglo 20. Despues del serramiento del jurnal El Tiempo, en 1930, el uniko periodiko en ladino ke era ainda publikado en Turkia, era la Boz del Oriente ke pudo rezistir asta el anyo 1939. Es solo en 1947 ke se noto un renasimiento de la aktividad jurnalistika en ladino kon la publikasion en Estambol de tres jurnales en esta lengua: El Shabat, La Luz, ke troko despues su nombre a La Vera Luz, i el Şalom. Las difikultades i los ostakolos kon los kualos tuvo ke luchar el Şalom fueron pujando i agravandosen i a eyos se adjusto kon el tiempo el problema de la edad i la salud de Avraam Leyon; en 1983 el ya avia yegado al punto de admeter ke sus fuersas ya no le bastavan mas para kontinuar la publikasion del jurnal i ke devria serrarlo. Esto pudo ser evitado grasias a una solusion ke permetio de entregar el jurnal a un grupo de djovenes volontarios djudios de Estambol ke akseptaron de tomar sovre si la tarea de kontinuar en su publikasion. La sola diferensia fue ke el jurnal basho la muevo direksion fue publikado kaje enteramente en turko, kon la eksepsion de una sola pajina en ladino, lo ke permetio al Şalom de ser meldado kon mas fasilidad por las muevas jenerasiones de la komunidad djudia de Turkia, ke ya no konosen el ladino tan bien komo las presedentes jenerasiones. El entuziasmo i devuamiento de este grupo de djovenes, enkavesados por Silvio Ovadya i Naim Güleryüz, ansi ke Salamon Bicerano ke tomo sovre si la responsabilidad por la pajina en ladino, son los prinsipales faktores de reushidad del Şalom, ke oy ya tiene asegurado su futuro. En efekto el ya tiene mas de 3500 abonados en Turkia i otros 500 en el estranjero, lo ke le da una baza finansiaria bien rezia, i ademas de esto tiene un buen numero de kolaboradores ke eskriven regolarmente i kuvren todos los aspektos de la aktividad jurnalistika. El ekipo jurnalistiko del Şalom, enkavesado por su direktora de publikasion Tilda Levi i el koordinador de publikasion, el avokato Yakup Barokas, konta 40 personas, todas volontarias, ke eskriven sovre temas de politika i ekonomia, djudaizmo, kestiones komunitarias, kultura djudeo-espanyola, arte i spor ets. No solo esto, sino ke en desparte del periodiko ke aparese una vez a la semana, el Şalom tiene una seria de otras aktividades jurnalistikas i kulturales komo konferensias i tadradas sovre aspektos diversos de la kultura djudeo-espanyola, ekspozisiones, publikasion de livros en ladino, turko, i otras lenguas sovre temas de muestra istoria i kultura, i enfin una seria de suplementos publikados regolarmente para los chikos i djovenes, una revista bibliografika i lo mas importante, un suplemento mensual, El Amaneser, ke fue kreado djusto tres anyos atras, en Marso 2005 i es
Este suplemento es seguramente uno de los frutos mas importantes de la aktividad jurnalistika del Şalom. Viniendo despues de largos anyos en los kualos se pensava ke el ladino i su kultura estan agonizando i ke no ay mas esperansa para sus futuro, El Amaneser es una prova muy konvensiente ke esta lengua tiene ainda bastante fuersa para kontinuar en vida. Esto i mas, El Amaneser se esta djuntando agora a Aki Yerushalayim i la pajina en ladino del Şalom para servir de tribuna a todos los ladinoavlantes ke tienen ainda a koro la kontinuasion de muestra kultura i keren partisipar al renovamiento de su kreasion literaria i jurnalistika. Si asta pokos anyos atras el Şalom tenia difikultad a topar mas personas ke eskrivan para su unika pajina en ladino, El Amaneser ya esta saliendo agora kon 24 pajinas kada mez, todas en ladino. Es verdad ke no todos sus kolaboradores son en Estambol. lgunos de eyos embian sus artikolos de otras partes del mundo, ma esto djustamente es ainda mas importante siendo ke mos prova ke el renasimiento del intereso enverso la kultura djudeo-espanyola no se limita a Estambol solamente, en desparte de Israel onde ya ay una grande aktividad en este kampo, sino ke ya esta espandiendose a munchas otras partes del mundo. El Şalom viene de kumplir 60 anyos i El Amaneser kumplio sus tres anyos de aktividad, kon alkanses ke mos permeten de ser optimistos para el futuro. Les embiamos de aki muestros mijores dezeos “Para munchos anyos mas”, en los kualos ayegemos a ver un verdadero renasimiento i enfloresimiento en el kampo de la prensa i de la kultura djudeo-espanyola en Estambol, en Israel i en todos los otros lugares en el mundo onde ay personas ke aman al ladino i su kultura i keren ke kontinuen a bivir.
|
Este ultimo jurnal empeso en su publikasion grasias a la inisiativa de Avraam Leyon, un jurnalista djudio de Estambol ke ya avia echo sus provas en el jurnal turko Cumhuriyet. El Şalom, ke su deviz, estampada a la kavesera de su primera pajina era “A lo tuerto, tuerto - a lo derecho, derecho”, fue enfrentado desdel prinsipio por graves difikultades, prinsipalmente de karakter ekonomiko ma tambien a kavza de sus kritikas en kestiones de la komunidad. El pudo mantenerse solamente grasias a la dedikasion de Avraam Leyon i a su prontitud a azer grandes sakrifisios personales, segun lo apunto en un artikolo ke publiko en 1977, al kumplir los 30 anyos del jurnal: “No kero repetar las sufriensas ke pasimos mientres los anyos pasados. Malgrado las presiones ke mos fueron echas no mos desviyimos del kamino ke mos trasimos, mizmo en los momentos mas eskuros. Es el amor por servir muestra komunidad ke mos dio la fuersa de kontinuar la mision ke empesimos antes 30 anyos.”
