AKI YERUSHALAYIM #83

RABI HAYIM PALACHI
Ye’huda ‘Hazvi

Kuanto tiempo mos tomaria a meldar i estudiar al fondo 72 livros? I komo es ke alkanso una persona komo el Rav Hayim Palachi a eskrivir todos sus 72 livros?

En la metad del siglo 17, la djuderia de Izmir estava en la sima de su floresimiento. El ambiente en las kayes de la sivdad era totalmente djudio, i las 16 keilot eran el sentro de la vida de kada djudio en la komunidad.

Indemas, el Hahambashi tinia no solo la influensa espirituala, sino ke tambien toda la autoridad, dada por el sultan turko, para dirijir su komunidad segun los mandamientos de la Tora, ma segun las leyes del estado tambien.

Uno de los filantropos de la komunidad, el senyor Yaakov Ben-Rabi ke, entre otras ovras, avia fraguado una grande yeshiva  a su nombre, en los ultimos anyos de su vida, avia pasado a bivir en Yerushalayim, deshando la yeshiva en manos de su yerno, el gran rabino de Izmir, rabi Refael Yosef Hazan, renomado por su importante livro "Hikre Lev".
En 1815, el Rav Refael Hazan  aksepto de tomar sovre si el posto de Gran Rabino sefaradi en Erets Israel, i ansi fue, ke el tambien desho la yeshiva en manos de su yerno, Rabi Yaakov Palachi, i partio para Yerushalayim.

En este ogar, yeno de santedad i atmosfera de Ley, les nasio a Yaakov i Kaden Palachi, en 1788, sus ijo Hayim, yamado al nombre de su nono paternel, ainda en vida, segun la kostumbre de los sefaradis de dar al rezin nasido el nombre de su avuelo.

El ninio Hayim fue un elevo sovresaliente i muy dedikado a sus estudios en la yeshiva. Su maestro fue el rav Yitzhak Gatenyo (el autor del livro "Bet Yitzhak" sovre el Rambam), ma Hayim resivio la mayoria de  su saveduria de su nono maternel, Rabi Refael Hazan.

No fue maraviya, entonses, ke muchas famiyas rikas i de la "elite" de la komunidad kijeron konsuegrarsen kon la famiya Palachi, i tener a este mansevo briyante, a Hayim, por marido a una de sus ijas.  A la edad de 20 anyos, ya topamos a H.Palachi kazado kon Esterula, de la famiya de Ben-Rabi, los patrones de la yeshiva. Talvez i este fato mos puede senyalar ke muchas vezes el mazal se topa en muestro derredor, i no siempre ay ke bushkarlo a la fin del mundo.

Rabi Hayim Palachi fue kazado kon Esterula mas de 30 anyos, i les nasieron tres ijos i dos ijas, ma afilu en estando kazado, padre de famiya, i okupado kon su servisio rabiniko en la komunidad, el no desho de estudiar dia i noche, segun uzo azerlo desde su chikez.

Aki, me parese, ke es tambien el lugar de apresiar a akeyas madres i mujeres sefaradis ke tomavan sovre si la karga de la famiya para dar a los ombres la posibilidad i las kondisiones de estudiar o de okuparsen de las tareas de la komunidad.

En 1813, Hayim Palachi resivio el titolo de Haham, ma todos los anyos mientres bivia su padre Yaakov, el refuzo de tener kualker posto rabiniko. Fue solo en 1828, despues de la muerte de su padre ke aksepto el posto de dayan de la komunidad de Izmir i de direktor de la yeshiva "Bet Yaakov". 

La muerte de su mujer Esterula, en 1823,  fue un golpe amargo para Rabi Hayim, i en la Akdama (el prefasio) de unos de los livros ke eskrivio en akeya epoka el inkluyo su endecha i apresiasion a su mujer.  Es solo despues de tres anyos ke se konorto kon su segunda mujer, Vida, la ija de Rabi Avraam Ben Ezra, uno de los rabinos de Izmir. 
En 1823, Rabi Palachi resivio un "Nishan", una dekorasion en sinyo de apresiasion, del sultan Abdul Madjid, ke le dio al Hahambashi toda la autoridad de servir de djuzgador de su komunidad. Este mizmo "Nishan" fue renovado anyos despues i por el sultan Abdul Aziz.

Rabi Hayim era una persona muy modesta, ke resivia kada persona kon kara alegre, i se okupava mucho del ayudo dado a  los menesterozos, ma en lo ke konsernava el rejimiento de la vida djudia en la sivdad,  el  tenia una pozision muy firme. El respektava kada uno i uno de los Talmidei Hahamim komo si fueran  ijos de rey. 

Rabi Hayim tenia un talento espesial de no piedrer tiempo en nada. En kada punto libre ke tenia de sus doveres publikos, ya se topava eskriviendo algun “hidush” o algun paragrafo mas para inkluirlo en uno de sus livros.

Desde su chikez, siendo okupado todo el tiempo en sus estudios, ya estava akostumbrado a no dar mucha importansia a lo ke komia siendo ke para el era piedrita de tiempo. Es solo en dias de Shabat o de moed ke se oyia dizir: "Apronta la meza en onor del Shabat !"

Rabi Palachi tuvo el zahut, ke todos sus livros fueron imprimidos en su vida, i lo mas de eyos halis por su mano. Eyos fueron despartidos gratis, sin ninguna paga, a kualker persona ke le demandava, sea djente de Izmir o de otras partes del mundo djudio.

Naturalmente, ke "Si no ay arina, no ay Tora". Siempre se topavan filantropos rikos ke admiravan al Rav Palachi, i le finansiavan la publikasion de sus livros. Todos meresen ser nombrados aki, ma mensionare solamente al senyor Elazar Hilel de Bucarest, para akodrarmos ke en akeya epoka ainda existian komunidades sefaradis en Romania.

Los livros de Rabi Palachi inkluyen kaji todo lo ke konserna la literatura rabinika: 24 livros de ‘Halaha (derecho relijiozo), 15 livros sovre Derush (sermones), 9 livros en kestiones de orasion, 9 livros sovre kestiones de Talmud i de Mishna, 7 livros de Perush (komentarios sovre la Biblia), tres livro de Musar (morala), i otros mas.

El grande numero de livros ke alkanso a eskrivir Rabi Hayim Palachi  en su vida, izo kreser una lejenda en la komunidad de Izmir, i muchos kreian ke eyos fueron eskritos kon el ayudo majiko de los "Nombres Santos" en la Kabala.  Su ijo Avraam, en uno de sus livros, trata de anular esta lejenda, i dize ke todos los livros fueron eskritos solamente por la grande veluntad i saviduria de su padre, djuntos kon su feuzia en el Dio.

Mi enkanto i admirasion enverso el Rav Hayim Palachi es ainda mas grande saviendo ke en el fuego ke akontesio, en 1820, en Izmir se kemaron muchos de sus livros i livros de su ijo Avraam. Tambien se kemaron eskritos de Rabi Yaakov Palachi. Mos podemos solo imajinar ke esforsos fueron echos  para restaurar  una tala destruksion.

Lo mas de los livros de Rabi Hayim Palachi tienen los titolos formados de dos biervos sitados en la Biblia i ke inkluyen en el nombre "Hayim".  Por exemplo: "Kaf aHayim", "Shenot Hayim", "Hayim veShalom", "Lev Hayim", etc.

Estos livros son asta oy, livros fundamentales para todos los ke se interesan en la Tora i en estudios de la relijion djudia.

Djuntos kon el Rambam, Rabi Yosef Karo i otros savios sefaradis, Rabi Palachi es muy renomado i respektado en todas partes del puevlo djudio, i  muchas vezes, en djuzgos siviles tambien, en Israel, los avokatos i los djuzgadores se apoyan sovre sus verdiktos i desiziones.

Rabi Haim Palachi tuvo el grande zahut ke sus tres ijos, Avraam, Yitzhak i Yosef sigieron su kamino, okupandosen en kestiones de la komunidad i tambien eskriviendo livros de ‘Halaha i Musar,  i kada uno de los tres tienen su meritos alavados.
Rabi Palachi tuvo el dezeo de bivir sus ultimos anyos en Erets Israel, ma no parvino a esto. El murio en Izmir, su sivdad natal, en 1868.

Uno de los Pesukim sovre su tomba, mos dize: "Su alma repozara en bien; i su desendensia eredara la tierra" (Tehilim 25, 13).

Volver