AKI YERUSHALAYIM #83

LETRA DEL REDAKTOR
Moshe Shaul

Keridos lektores,

No son munchos los ke, en los tristes dias de la II Gerra Mundiala i de la Shoa, kuando milarias de djudios bushkavan dezesperadamente a fuir  del lugar onde estavan para salvar de la deportasion a los kampos de eksterminasion, les ayudavan a traversar frontieras i yegar a porto salvo, munchas vezes al peligro de sus propia vida.
El puevlo djudio bushka a ekspresar su gratitud a estas personas, i a todos los ke ayudaron a salvar djudios de manos de los nazis,  en rekonosiendolos komo “Djustos entre las Nasiones”. En el Memorial de Yad veShem, en Yerushalayim, ay sienes de arvoles i de plakas a la memoria de estas personas; i djuntos kon esto, ainda ay munchos ke ayudaron a salvar djudios, ma lo izieron tan diskretamente ke savemos muy poko sovre eyos.

Agradesemos a este sujeto al prezidente del Sentro de Estudios Medievales de Ribadavia, el Sr. Luis Chao Rey, ke mos embio un artikolo de la Sra Lolin Lira Pousa, sovre tres ermanas de esta sivdad ke en los dias de la II Gerra Mundiala ayudaron a munchos sienes de djudios a traversar la frontiera de Fransia a Espanya i pasar despues a Portugal.  Aun ke ya pasaron desde entonses munchos anyos,  este artikolo ke traemos aki en traduksion al ladino, es un omenaje al koraje i umanidad de estas tres ermanas, ke ya no biven mas, i tambien de munchas personas mas ke komo eyas, ayudaron a salvar sienes i miles de muestros ermanos, sin ruido i barana i sin demandar ninguna rekompensa  por lo ke izieron.

Komo de uzo vos prezentamos en este numero de Aki Yerushalayim, una seleksion de artikolos sovre muestra istoria i erensia kulturala, ansi ke los problemas ke enkontramos, en los esforsos  para mantener i promover esta kultura.  En el primer artikolo de la revista mos detadramos mas partikularmente sovre uno de estos problemas, lo ke fue echo para toparle solusion i las perspektivas para el futuro de muestra kultura.

Aprovechamos tambien la okazion del 60en aniversario del jurnal Şalom, i del treser aniversario de la revista mensual El Amaneser, para felisitarlos, azer sovresalir la importansia de sus kontribusion al periodismo djudeo-espanyol i embiarles muestros mijores dezeos “Para munchos anyos mas”.

Tomando en konsiderasion ke este numero de la revista vos yegara unos kuantos dias antes de Pesah, inkluimos tambien un artikolo ansi ke dos tekstos ke tokan a aspektos interesantes de esta fiesta, i dedikimos enteramente la rubrika “Gastronomia Sefaradi” a komidas de Pesah.

Moadim leSimha i Fiesta Alegre para vozotros todos.

Volver