AKI YERUSHALAYIM #82

SENTENARIO DEL KAL “BET ISRAEL” EN IZMIR

El kal Bet Israel ke su sentenario fue selebrado en el mez de Djunio por la komunidad djudia de Izmir, okupa un lugar muy espesial entre los sentros relijiozos de esta komunidad. Aun ke se topa aktualmente en un kuartier ke su povlasion djudia paso a bivir estos ultimos anyos en otros lugares de la sivdad, i ke, komo konsekuensa de esto, la mayoria del tiempo no tiene minyan para los servisios relijiozos, el es konsiderado ainda komo el kal mas ermozo i prestijiozo de la komunidad i es ayi ke son echas la mayoria de las bodas i otras festividades.

La komunidad djudia de Izmir no es de las mas veteranas de Turkia. Eya no fue fondada en los primeros anyos despues de la ekspulsion de Espanya sino ke bastante mas tadre, verso la fin del siglo 16, kuando el governo otomano dio a los merkaderes djenovezes la konsesion de dezvelopar el porto de Izmir para los menesteres de sus komersio maritimo.

La konstruksion de un porto en esta sivdad, ke tiene uno de los mijores golfos de la kosta turka, i el dezvelopamiento del komersio atiraron a esta sivdad personas de munchos otros lugares i entre eyos de las komunidades djudias ke avia en las sivdades del entorno komo Manisa, Tirya, Bergama i mas. Kon el tiempo se djuntaron a esta komunidad munchos de los djudios portugezes tambien, de los konversos de Portugal i Espanya ke reushian a salir de estos paizes i tornar aviertamente al djudaizmo.
Estos djudios se aresentaron al prinsipio en lo ke oy es el sentro de la sivdad, kon sus kazas de dos estajes a lo mas, kalejikas estrechas i un numero relativamente grande de kales, pokos solo de entre los kualos kedaron asta muestros dias. Estas eran kazas sin muncho konfor, onde bivian famiyas en kondisiones de estrechura, munchas vezes en una kamareta para kada famiya, al deredor de kurtijos ke servian a todos los moradores. Kon el tiempo, i a mizura ke la komunidad empeso a prosperar ekonomikamente, munchos de los ke tenian una mijor situasion empesaron a pasarsen a otras partes de la sivdad, prinsipalmente al kuartier de Karatash por onde pasava una de las kayes prinsipales de la sivdad. Ayi fraguaron kazas mas anchas, kon balkones ke davan a la kaye, i en las kazas ke estavan al bodre de la mar “eskalas” tambien” por onde podian abashar i tomar banyos en la mar.

Es interesante ke el kal Bet Israel, fondado para responder a los menesteres relijiozos de estos djudios, no fue fraguado en el estilo klasiko de los otros kales ke ya existian desde anyos,: kon los bankos al deredor de la teva en medio del kal, frente al Aron Akodesh. Parese ke los ke tomaron la inisiativa de fraguar este kal i entre eyos el Sr. Aron de Hazan, fondador i direktor del jurnal “La Buena Esperansa”, kerian tener un kal diferente de los otros, en un estilo mas konforme a la mueva kultura ke se estava dezvelopando entre eyos, komo konsekuensa de sus edukasion en las eskolas de la Aliansa. El Bet Israel es uno de los pokos kales sefaradis onde los bankos para el publiko estan ordenados rangos rangos, i en lugar de una teva ay dos, ke se topan frente a los bankos, de las dos partes del Aron Akodesh.

Segun puede ser visto de la fotografia ke traemos aki la sala sentrala del kal, kon sus azarot, es aklarada kon un grande lustro de kristal ke da a este lugar una atmosfera de solemnidad muy espesiala.

En desparte de las orasiones ke eran echas regolarmente durante la semana ansi ke en los dias de Shabat i de fiesta, Bet Israel kumplia tambien una funksion muy importante komo sentro sosial i edukativo de la komunidad. En primer lugar, en los dias de Shabat, despues de medio dia o a la tadre, se arekojian ayi grupos de ninyos para oyer de boka de rabinos i profesores de la eskola Benei Berit, lisiones sovre aspektos diversos de la relijion djudia i para embezar kantes en ebreo i ladino atados a las fiestas i dias espesiales komo Rosh Ashana, Kipur i Tish’a Be’Av i tambien kantes de Selihot. Es grasias a estos enkontros ke los ninyos djudios de Izmir, ke en sus eskolas ya no se embezava mas el ebreo i no avia lisiones sovre el djudaizmo, tuvieron aun kon esto unas nosiones sovre los prinsipios de sus relijion i pudieron kontinuar a konsiderarsen djudios.
No kale olvidar tambien, de este punto de vista, los sermones en ebreo i sovre todo en ladino ke eran dados kada semana sovre aspektos diversos de la Tora i ke kontribuyeron eyos tambien a mantener bivas muestras tradisiones.

Despues de largos anyos durante los kualos este kal fue el sentro de la vida relijioza de los djudios de Karatash i otros kuartieres serkanos, en los anyos 60 del siglo pasado el empeso a eskayer komo konsekuensa de un otro proseso sosiolojiko ke yevo a la mayoria de la povlasion djudia del lugar a trezladarse a otros kuartieres mas muevos i modernos. Oy dia de los miles de djudios ke bivian de antes serka de este kal kedaron apenas una o dos famiyas.

Naturalmente no es kestion de tener el kal avierto la semana entera para las orasiones de shahrit, minha i arvit, ma aun kon esto el kal es bien mirado siendo ke ainda es el lugar preferado para las bodas, segun fue durante anyos en los kualos se kazaron ayi sienes de pares al uzo de los djudios de Turkia: kon las novyas entrando al kal presedadas por las “demoiselles d’honneur” i despues de la seremonia kon distribusion de konfites i masapanes.

Estos rekuerdos del Bet Israel fueron evokados el dia 20.6.2007, kon una seria de aktos ke inkluyo una orasion espesial en el kal, un simpozio al kual partisiparon el prezidente de la komunidad djudia de Izmir Sr. Jak Kaya, el vise prezidente de la Fondasion del V Sentenario, Sr. Naim Güleryüz, de Estambol i el Sr. Selim Amado de Israel, ke trataron de la istoria de los djudios de Izmir i de este kal. Uvo tambien un kokteyl despues del kual tuvo lugar un konserto de kantes en ebreo i en ladino por Yeoram Gaon ke es atado intimamente a esta komunidad siendo ke su madre nasio ayi.

El enkontro fue muy esmoviente para todos los ke apartienen ainda a esta komunidad ma la kestion ke se poza es komo se puede aprovechar este evenimiento para mantener ainda muestras tradisiones malgrado las difikultades enkontradas aktualmente. Kale esperar, segun lo apunto el Sr. Selim Amado a la fin de sus palavras en el simpozio, ke el ermozo lokal de Bet Israel kontinuara a ser aprovechado no solo para bodas i fiestas sino ke tambien para tener ayi aktividades sosiales i kulturales ke ayuden a transmeter a la mueva jenerasion de esta komunidad los valores relijiozos i spirituales del djudaizmo sefaradi.

Volver