LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AUTORIDAD NASIONALA DEL LADINO

SEFARAD

INSTITUTO MAALE ADUMIM

AKI YERUSHALAYIM

ULTIMO NUMERO

TODOS LOS NUMEROS

LIBRERIA SEFARAD

PERIODIKOS

ASOSIASIONES I ORGANIZASIONES

JENEALOJIA SEFARADI

AKI YERUSHALAYIM #82

EL INKIZIDOR ASASINADO: PEDRO DE ARBUÉS
Gad Nassi

Pedro de Arbués nasio serka de 1441 en Epila, Aragon. Despues de aver estudiado la filozofia en Espanya, fue graduado en teolojia i en ley en el kolejio espanyol San Clemente en Bolonya. Ensenyo la filozofia moral en la Universidad de Bolonya i a su retorno a Espanya en 1474, fue admetido al kuerpo relijiozo de Zaragoza. En 1484, fue nominado por Torquemada al posto de inkizitor de Aragon (1).

En este mizmo periodo, el rey Fernando i la reyna Isabela avian obtenido una bula del Papa Sixtus IV, akordandoles el dirito de estableser un tribunal para djuzgar los eretikos, i partikularmente los konversos ke avian aviertamente o sekretamente retornado al djudaizmo.

Las informasiones sovre la manera ke Arbues aktuo en tanto ke inkizitor, partikularmente en la kondanasion de los ke fueron  topados  kulpables, no son  konsistentes. (2)

Asigun  siertos  tekstos, Arbues avia segido el exemplo de  Torquemada,  en  kondanando, ainda durante el primer mez de su tarea, a munchos marranos a ser kemados en las ogeras. Aunke no existen rejistros, es probable ke el kontinuo en las persekusiones despues tambien.

Durante este periodo sumas enormes de moneda, ofresidas a Fernando i Isabela para limitar la aktividad de la Inkizision, no avian aprovechado i, despues de una konsultasion entre eyos, algunos lideres de los konversos, kon el apoyo de siertos kristianos de alto grado, avian desidido de matar a Arbues.

En una de las ultimas reuniones sekretas, Juan de la Abadia fue eskojido para dirijir el asasinato i Mateo Ram kon Juan de Esperandeu fueron eskojidos para exekutirlo.  Estos dos ivan a ser ayudados por sus mosos, i entre eyos, Vidal de Urango, el servidor fransez de Esperandeu.

Aparte de Abadia i de Esperandeu, algunos konversos famozos komo los Sánchez, los Montesa, los Patemoy, los de la Caballería, los de Santa Fé, los de Santa María, los de Santa Cruz,  i los de Santángel – para sitar solo una partida de eyos –  fueron eyos tambien akuzados de aver partisipado a esta konspirasion.

Arbués estava konvensido ke sus enemigos avian desidido de matarlo, i por esto uzava apareser en publiko akompanyado de un guardian armado para ser protejado. 
Segun siertos manaderos, al prinsipio avian fayitado dos atentatos para matar a Arbués: el primer en su kamareta de echar i el segundo en la katedrala La Seo en Zaragoza, ande iva ser matado mas tadre.

Fue en una noche de Septiembre 1485, ke los konjurados parvinieron a atakar a Arbues ke murio dos dias despues de sus feridas.

Tristanico de Leonis ke avia reushido a salvarse de ser kemado en fuyendose de Zaragoza, se ekprime ansi sovre este evenimiento:

"Esta noche, entre las onze i las dodje, Juan de Esperandeu, fue a la kaza de Juan de la Abadía… ke salio bien armado de su  morada… i se adjuntaron a Mateo Ram i a mi, akompanyados de Vidalico, moso de Juan de Esperandeu, i de dos personas, ke insistieron a tapar sus karas kon maskas, i ke no nombrare porke no fueron djuzgados… Solo dire, para ke se sepa bien, ke akeyas dos personas no eran djudias ni konversas, sino ke eran kristianas, i de alta i noble famiya…

 Juan de Esperandeu, Mateo Ram i los dos mosos, entrimos por una de las puertas de detras de la katedrala… Juan de la Abadía se kedo en la puerta, kon los dos enmaskarados, para kuvrir la retirada…

Al  yegar serka del altar major, ya vimos a Pedro de Arbués ke estava arodiyado al lado de un pilar, debasho del pulpito…

Juan de la Abadia, impasiente, se aserko de mozotros i le disho a Vidal Durango:

 Dale al traidor, ke es este!

Entonses, Vidalico Durango dio a de Epila (Arbues) una kuchiyada ke lo transperso del piskueso asta la barva, kortandole la vena. Maestro Pedro de Arbues kijo alevantarse i ir al koro, ma Juan de Esperandeu le dio un otro golpe ke le traverso el braso de un lado al otro. Ya no se alevanto, i todos mos fuyimos de ayi…" (3)

La reaksion de los sivdadinos de Zaragoza fue muy fuerte. El puevlo se revolto kontra las minorias relijiozas, i partikularmente kontra los konversos, en provokando un grande tumulto en la sivdad.  Es klaro ke sin la intervension del arkibishop Alfonso de Aragon, ke kavalgo kon su kavayo por las kayes de Zaragoza, akavidando al puevlo de mantener el kalmo i prometiendo ke los kulpables serian kastigados, todos los konversos de la sivdad estavan en perikolo de ser masakrados.

La Inkizision, de otra parte, bushkando a konfirmar  su otoridad, konvoko un tribunal ke akuzo a varios konversos djudios de komplotar kontra el Santo Ofisio i de aver matado a Arbues.

Sienes de sospechados fueron enkarselados en las preziones de la Inkizision para ser djuzgados. Los ke fueron topados kulpavles de aver partisipado  en el asasinato fueron kruelmente kastigados para kalmar al puevlo i intimidar a otros ke puedrian imitarlos.

El asasino prinsipal fue deklarado "djudio konsumado i sirkonsizado". Sus manos fueron kortadas i enklavadas a la puerta del palasio de la Diputasion. Su puerpo fue despues transportado a la Plasa del Merkado, ande fue dekapitado i despedasado. Esperandeu i Ram fueron kemados despues ke fueron despedesados. Abadía se suisido en komiendo los pedados de vidro de una lampa en el Kastilio de la Aljaferia, ande estava asperando para ser exekutido. Su puerpo fue despedasado i kemado en la ogera.  Luis de Santangel, Garcia de Moros, Alonso Sanchez i Jaime de Montesa fueron dekapitados i kemados mientres ke Francisco de Santa Fe se suisido en echandose de la Torre Aljaferia. Su puerpo fue kemado.

Pedro de Arbués era de linyaje kristiano viejo, sin antepasados konversos ni moros, eretikos o rekonsiliados. Por esto, i siendo ijo lejitimo i graduado en estudios superiores, era un kandidato ideal para ser admetido al kuerpo relijiozo.

Despues de su muerte empesaron a espandirsen entre el puevlo kreensias sovre su poder majiko. La djente empeso a vijitar el lugar ande fue matado, i a kreerse ke su sangre kontinuava a apareser ande fue vertida. Una konversa se avia mizmo salvado de la muerte, en afirmando ke, achakes de su fervor katoliko avia mojado su rida kon esta sangre.

Ay un testimonio sovre la aparision de Arbués entre los esplandores selestes, anunsiando las futures reushidades de la Inkizision i la urjensia ke Fernando el Katoliko kontinue en la konkista de Granada i ke mantenga al Santo Ofisio, ajustando  ke estas dos tareas le akordaran la vida eternela.

Despues de su muerte, Arbues fue aklamado i venerado por el puevlo komo martiro i santo. Mas tadre, en 1867, fue kanonizado komo santo.

Su kanonizasion provoko indinyasion no solo en  el mundo djudio, sino ke en sirkolos  kristianos tambien. La reprezentasion de Arbues komo una persona vieja, tomando un plazer malisiozo en las sufriensas de sus viktimas, probablamente maranos, asigun aparese en una pintura de Kaulbach, puede ser interpretada komo la ilustrasion de esta indinyasion. (4)

 
* * *

El asasinato de Arbues es un kavzo uniko en la istoria de la Inkizision en Espanya, i el primero de dos kavzos de asasinato de un inkizitor. (5)

Durante munchos anyos, los aktos de vengansa por la matansa de Arbués kontinuaron a tomar almas i sembrar el teror entre los  konversos. Los nombres de munchas famiyas ilustras de  konversos aparesen entre los ke fueron kemados, en atadijo kon esta matansa.

Kontrariamente a las ekspektasiones de sus partizanes, este akto en lugar de servir el intereso de los konversos, akselero i intensifiko el proseso de enfuertesimiento de la Inkizision, kontribuyendo  a aparejar el terreno para el Edikto de la Ekspulsion, ke iva ser promulgado en manko de una dekada.

 

__________________________________________________________
 
(1) Djuntos kon Arbues, fue nominado a este posto Gaspar Juglar tambien  .

(2) Sovre esto la Ensiklopedia Katolika afirma: Pedro performo los doveres  kon fervor i djustisia. Aunke los enemigos de la Inkizision lo akuzan de krueldad, es siguro ke no se le puede atribuirni una simple sentensia de muerte.

(3) Sangre en la Catedral, La Conjura de todo un Pueblo.  Carmen Espada Giner, 2a  Edicion,  Manuscritos de Inquisicion, Libros Certeza, Zaragoza 2000, 111-113.

(4) La kemasion de los eretikos, pintura por Wilhelm von Kaulbach, 1805-1874. Asigun fue notado por Richard Gottheil, Meyer Kayserling i William Milwitzky, en sus artikolo Pedro Arbues, en la Jewish Encyclopedia, esta pintura reprezenta a Arbues aprontandose  a kondanar una famiya, probablamente marana, a ser kemada en la ogera.

(5) El segundo kavzo de asasinato akontesio en Sicilia, en 1657, kuando el kleriko Diego LaMattina, akuzado de erezia,  mato al inkizitor Juan López Cisneros.

.

Volver