AKI YERUSHALAYIM #82

LETRA DEL REDAKTOR
Moshe Shaul

Keridos lektores,

Examinando los esforsos para mantener i promover el ladino i su kultura devemos rekonoser ke esto fue echo prinsipalmente en el kampo linguistiko i literario.

Desdel prinsipio del siglo 20 kuando sea los sefaradis ansi komo los ispanistas se dieron kuento del peligro ke enfrentava la kultura djudeo-espanyola i empesaron en proyektos para su konservasion, fueron publikados sienes de livros i artikolos en los kualos fueron arekojidos, analizados i komparados miles de kantes, kuentos i refranes ansi ke sienes de livros kon kreasiones literarias komo romansos, poezias, teatro etc., sin kontar los jurnales kon sus miles de artikolos.

En komparasion kon este esforso de largos anyos para la investigasion de muestra literatura orala i eskrita, es ultimamente solo ke empesimos a okuparmos de la kultura materiala de los sefaradis: sus djoyas i vistimienta, sus kazas, mobles i atuendos de kuzina, los objetos de arte ritual uzados en sus servisios relijiozos i mas. Kuando empesimos a entender la valor de este aspekto de muestra kultura ya era tadre. La gran parte de este trezoro kultural ya se avia pedrido en los fuegos i terretemblos, en las gerras i en las numerozas migrasiones de los sefaradis, de un paiz al otro, en el siglo 20.

Aun kon esto, grasias a los esforsos ke empesaron a ser echos estos ultimos anyos, pudimos salvar una parte a lo menos de este patrimonio ke esta ekspozado agora en unos kuantos muzeos, de los kualos tratamos en muestro artikolo sovre la Muzeolojia Sefaradi.

De entre los artikolos sovre otros temas merese una mension espesiala el ke trata de la konstitusion de la Hevra Kedosha de Bucarest, bazado sovre una broshura de mizmo nombre del Haham Isaac Jerusalmi, del Hebrew Union College en Estados Unidos.
Es este un dokumento impresionante ke mos permete de mijor konoser i apresiar una de las institusiones djudias mas importantes, ma sovre las kualas se eskrivio muy poko, siendo ke su tarea es atada a los ultimos ritos dados en kavzo de muerte, tema del kual se uza avlar lo menos posible.

En desparte de esto ay tambien artikolos ke tratan de kapitolos interesantes de muestra istoria ansi ke de temas diversos de muestra kultura i tambien las rubrikas regolares komo Filatelia Sefaradi, Antolojia Djudeo-espanyola, Kantes, Kuentos, Gastronomia Sefaradi i mas. Lo ke no vash a topar es el boletin El Pregonero, publikado asta agora komo suplemento gratis de Aki Yerushalayim. Despues de munchas ezitasiones duvimos serrarlo por razones finansiarias i tambien porke siendo publikado solo dos vezes al anyo, kon un interval de 6 mezes entre kada numero, munchas de las informasiones ke trayemos ayi ya son “bayat” kuando sale la revista.

Aun kon esto i komo servisio a los lektores de Aki Yerushalayim, adjustimos a la fin de la revista kuatro pajinas kon informasion sovre el adreso postal i elektroniko de los faktores aktivos en el kampo de la kultura djudeo-espanyola, i muestra Libreria Sefaradi en la kuala propozamos diskos i livros sovre muestra kultura.

Volver