LA PAJINA DJUDEO-ESPANYOLA
AKI YERUSHALAYIM
Revista Kulturala Djudeo-espanyola

PAJINA DE ENTRADA

AUTORIDAD NASIONALA DEL LADINO

SEFARAD

INSTITUTO MAALE ADUMIM

AKI YERUSHALAYIM

ULTIMO NUMERO

TODOS LOS NUMEROS

LIBRERIA SEFARAD

PERIODIKOS

ASOSIASIONES I ORGANIZASIONES

JENEALOJIA SEFARADI

AKI YERUSHALAYIM #81

EL RABINO HAYIM ABULAFIA
I LA ALIYA DE LOS DJUDIOS DE IZMIR A TIVERIA
Gad Nassi

Aspirasiones mesianikas fueron el manadero de la aliya de los djudios de Izmir a Tiveria, en 1740. Giado por el Rabino Hayim Abulafia, el aresentamiento de estos pionieros en Tiveria i sus konsekuensas son, en mizmo tiempo, uno de los exemplos de la kolaborasion ke tuvo lugar entre los djudios de la Tierra de Israel i su povlasion araba.

Nasido en Hevron, Hayim ben Moshe Abulafia (c.1660-1744) estudio en Yerushalayim. En 1699, estuvo en Saloniko i en 1712, sirvio komo rabino en Izmir. Entre 1718 i 1721 fue rabino en Safed. En 1721, estando una segunda vez, por un kurto tyempo en Saloniko, se aresento de muevo en Izmir, sivdad en la kuala sirvio komo rabino, durante serka de 20 anyos, asta ke arivo a Tiveria.

La Aliansa kon ElAmar

Asigun una leyenda el sheyh beduino Taher ElAmar, governador de la Galilea, se avia sonyado durante tres noches konsekutivas ke devia azer retornar los djudios a Tiveria. Sigiendo el konsejo del gran rabino de Safed, rabi Shlomo Malki, ke avia konsultado, ElAmar se adreso a la komunidad djudia de Estambol, propozando de fraguar en Tiveria kazas, una sinagoga i un Bet Midrash, ansi ke otras fasilidades mas, para ke djudios de la Turkia se aresenten en esta sivdad. Abulafia, ke estava en Izmir, fue el solo a akseptar la invitasion de ElAmar ke le avia eskrito, en una de sus letras "Ven, alevantate i abolta a Tiveria, la tierra de tus avuelos…"


Tiveria, asegun H. W. Barlett,
gravado por R. Brandart, c. 1850

El papu de Hayim Abulafia fue el rabino de Tiveria. Kon su muerte 40 anyos antes, i la vida djudia en Tiveria se avia amatado i la sivdad avia kayido en un estado de letarjia kompleta.

Abulafia de su parte, estava konvensido ke la era mesianika era iminente i ke la restorasion de Tiveria era una kondision para aserkar la Salvasion. En repuesta a la invitasion de ElAmar, Abulafia, akompanyado de su mujer, sus ijos i diez de sus elevos i kon un Sefer Tora, partio de Izmir en el anyo 1740 i arivo a Tiveria onde fue aresivido kon grande onor por ElAmar. Aun ke ya tenia la edad de 80 anyos, Abulafia se konsakro a fraguar la sivdad ke estava en ruinas, i mando a sus ijos i yernos al estranjero para prokurar un ayudo finansiario ke devia servir a la restorasion de la sivdad.

Fraguo la sinagoga Etz Hayim kon su Bet Midrash, yamada al nombre de una de sus ovras. Esta fue la mas manyifika sinagoga en la Tierra de Israel en su tiempo. De mizmo fueron fraguados kaminos, kazas, butikas, un mikve, una empreza para la produksion de azete, i fueron plantadas vinyas.

La komunidad djudia de Tiveria ke kontava 15 famiyas djudias kuando Abulafia arivo a la sivdad, yego a tener 150 famiyas en el interval de 30 anyos.

Tiveria Atakada i los Miraklos

En 1742, kuando la fragua de la sivdad se estava kontinuando ainda kon fervor, el Rabino Abulafia resivio un mesaje de Damasko, firmado por dos de sus konosidos, Hayim Farhi i Yosef Lusati. En este mesaje, Farhi i Lusati estavan akavidando ke Suleyman Pasha de Damasko, el governador otomano de la rejion, se avia desidado de konkistar la sivdad de Tiveria de manos del Sheyh ElAmar, para meter una fin a su posto de governador de Galilea. Pos esto, estavan konsejando a Abulafia de salir de Tiveria kon todos los djudios i fuyirse a Safed, ande Suleyman Pasha iva mandar soldados para protejarlos.

Kuando Abulafia amostro a ElAmar el mesaje, este no se konvensio i no tomo dinguna mizura para la defensa de Tiveria. De mizmo kuando fue resivido un segundo mesaje de las mizmas personas. Es solo kuando los moradores de dos kazales vizinos, se adresaron a el, avizandolo ke las fuersas de Suleyman Pasha se estavan aserkando i demandandole de vinir a Tiveria para partisipar a su defensa ke ElAmar empeso a aprontarse a azer frente al perikolo ke se estava aserkando.

Los djudios de Tiveria se adresaron entonses al Rabino Abulafia para tomar su konsejo, demandandole si devian kedarsen en Tiveria, o fuyirsen a Safed o a Ako. Abulafia de una manera muy firme i konvensiente les respondio ke no deven fuyirsen de la gerra i ke no deven azer traision a ElAmar, sus protektor.

Un dia de Shabat, en el mez de Elul del anyo 1742, Suleyman Pasha asiejo a Tiveria i la atako kon una grande fuersa militar, bombardeando la sivdad i sus murayas kon fuego de kanones, i kavakando tuneles debasho de tierra para konkistarla de adientro. Durante todo este periodo, los djudios defendieron la sivdad i, todas las inisiativas de las fuersas de Suleyman Pasha siendo en vano, eyas empesaron a kreersen ke la maldision de los djudios avia kayido sovre eyos.

A la fin, arivo un emisario de alto grado del Sultan otomano, ordenando a Suleyman Pasha de meter fin al atako, para asigurar la proteksion de los pelegrinos muzulmanes ke se estavan aparajendo a partir de Siria a Meka.


Etz ‘haHayim, la ovra de Abulafia. Izmir, 1729

El abandono del atako fue selebrado kon grande fiesta por los djudios de Tiveria en la Sinagoga Etz haHayim, i este dia fue deklarado komo Yom Tov - Dia de fiesta por el miraklo ke les akontesio.

Ocho mezes despues, Abulafia resivio un segundo mesaje de Farhi i Lusato, avizandole de muevo ke Suleyman Pasha estava en kamino para Tiveria kon su armada, esta vez kon armas mas pezgadas i mas muevas. Sovre esto, los djudios de Tiveria se adresaron de muevo a Abulafia, ke les respondio diziendo ke el ke kere puede partir, i el ke kere puede kedar. El apunto ke el mizmo no se ira de la sivdad i en kavzo ke sera matado, prefera ser enterrado en Tiveria… La mayoria de los djudios, preferaron fuyirsen, deshando detras de eyos sus kazas i sus bienes. Ma kuando la armada de Suleyman Pasha arivo al kazal Lubya, serka de Tiveria, un dia de Elul del anyo 1743, Suleyman Pasha se murio subitamente de una dizanteria. Al dia sigiente su armada se arekojo i torno a Damasko i este dia tambien fue deklarado Yom Tov, por el Rabino Abulafia.

Sovre la Istoria de Tiveria i la Aliya de Izmir

Tiveria fue fondada por Herod Antipas, Rey de Yeuda i Tetrarko de Galilea entre los anyos 14 i 18 i fue yamada al nombre del Imperador Romano Tiberius, ke reynava en este epoka. Fina ke fue transferado a Yerushalayim en el siglo VII, fue la rezidensia del Sanhedrin, el Konsilio Relijiozo i Supremo de los djudios. En 1562, su administrasion fue akordada por el Sultan Suleyman el Manyifiko a Yosef Nasi i en konsekuensa, la vida djudia de la sivdad se arebivio por un sierto de tiempo, ma en el siglo XVII la prezensia djudia deskayo enteramente i, fina ke el Rabino Abulafia se aresento ayi en 1740, no existio un largo tiempo, ni una alma djudia en esta sivdad.

Tiveria, djuntos kon Yerushalayim, Safed i Hevron, es konsiderada komo una de las sivdades santas de la Tierra de Israel. Aunke despues de la Aliya de los djudios de Izmir a Tiveria, uvo periodos ke la prezensia djudia en esta sivdad menguo i otros periodos en los kualos pujo, esta prezensia no desparesio nunka por entero. De este punto de vista, la kontribusion de esta aliya al dezvelopamiento de la komunidad djudia de Tiveria, es konsiderada komo uno de los epizodos mas sinyifikantes de su istoria.

* * *

Aparte de su ovra en Tiveria, el Rabino Hayim Abulafia fue un ombre de letras i de kreatividad espirituala. La Enciclopedia Judaica nota una lista de sesh de sus ovras publikadas en Izmir. Entre estas, Etz ‘haHayim, ke a su nombre fue fondada en Tiveria una sinagoga kon su Bet Midrash.

---------------------------------------------------

Bibliografia:

  • Zimrat ‘haAretz. Por Rav Yaakov Beirav, el yerno de Rabino Hayim Abulafia. Este livro konta la vida de Abulafia i su ovra. Fue publikado por la primera vez en Mantova, en 1745.
  • Sefer Tverya. Por Oded Avisar, Keter, Yerushalayim, 1973.
  • Tiverias. Por Helga Dudman kon Elisheva Ballhorn, Carta, Yerushalayim, 1988.
  • Encyclopaedia Judaica. Artikolos sovre Hayim Abulafia i Tiveria.

Volver