AUTORIDAD NASIONALA DEL LADINO
|
AKI YERUSHALAYIM #81 FILATELIA SEFARADI
La Posta de Mexico viene de emitir el timbro de “100 anyos de Prezensia Djudia en Mexico”, ma la verdad es ke la prezensia djudia en este paiz data de munchos anyos atras. Segun los istoriadores la istoria de los djudios de Mexico empeso kon la konkista del paiz por Hernan Cortes, en 1521. Uno de los kompanyeros de Cortes, Hernando Alonso, de los fondadores de la sivdad de Mexico, fue akuzado de ser djudaizante i en el 1528 fue kemado bivo, djuntos kon su amigo Manuel deMorales. Todo esto, anyos antes de la institusion ofisial del Ofisio de la Inkizision en Mexico, en 1571, por el rey Felipe II ke keria “limpiar a Mexico de estos portugezes ke son kontra la kreensia en Jesus”, (portugez era entonses un sinonimo uzado para los konversos djudios ke vinian de Portugal a Mexico i otros paizes de Amerika de Latina.) Estos konversos, yamados tambien “muevos kristianos” puedian vinir de Evropa solamente por los portos de Vera Cruz i Campeche, mientres ke al porto de Acapulco, en el Oseano Pasifiko, yegavan konversos de Brasil, Chile i Peru. Segun la Ensiklopedia Judaika, en el siglo 17 avia en Mexico mas konversos ke espanyoles katolikos.
La Inkizision persigio duramente a estos konversos i en el auto-da-fe del 11 Avril 1649 uvo 109 akuzados, solo 19 de entre los kualos no fueron matados. De entre las viktimas mas konosidas de la Inkizision merese una mension espesial la famiya de Carvajal. La mujer del governador del Nuevo Reyno de Leon, en el Nord-Este de Mexico, Luis de Carvajal i de la Cueva, era konversa i su ermana ansi ke su marido fueron akuzados de ser djudaizantes. Su sovrino, Luis de Carvajal el Mozo, empeso a organizar los konversos de Mexico i darles lisiones de djudaizmo. En 1596 el fue kemado bivo djuntos kon su madre i tres de sus ermanas. La Inkizision fue abolida en el primer tersio del siglo 19 i solo la iglezia katolika kontinuo kon su pozision anti-djudia. Esta fue la razon ke en 1889 el konverso Francisco Rivas Puigcerver empeso a publikar la revista “El Sabado Secreto” ke yamo tambien “Periodico judaizante" i ande publiko dokumentos de la Inkizision en Mexico i sus aktividades kontra los djudios.
En 1901 sefaradis de Evropa ansi ke djudios orientales de Alepo i Damasko emigraron a Mexico onde yegaron mas tadre djudios eshkenazis tambien. En 1905 los djudios empesaron a formar sus komunidades. El prezidente de orijin djudia Francisco Madero (1901-19013) dio la otorizasion para avrir el primer simeterio djudio. La primera sinagoga fue fondada en la sivdad en 1919. En Mexico ay oy dia kuatro komunidades djudias: sefaradi, alepina, damaskina i eshkenazi ke kontan en total mas de 40.000 almas, i todas las kuatro son organizadas en el kuadro del Komite Sentral Israelita. |
Mexico
