AUTORIDAD NASIONALA DEL LADINO
|
AKI YERUSHALAYIM #81 EL PROYEKTO IZMIR La komunidad djudia de Izmir, ke oy konta apenas 2000 almas, fue en los siglos pasados una de las mas grandes i famozas del Imperio Otomano yegando a tener asta 50.000 almas i mas. Ma empesando de la fin del siglo 19 i durante todo el siglo 20, esta komunidad fue aflakandose mas i mas, komo konsekuensa de la kriza ekonomika ke paso i de la emigrasion de una gran parte de su povlasion a otros paizes, entre otros, a Israel tambien, despues de la fondasion del Estado. En su epoka de mas grande prosperidad esta komunidad tenia mas de 25 kales, algunos de eyos fraguados uno al lado del otro, afin de poder responder a los menesteres de la povlasion djudia ke estava konsentrada en uno de los kuartieres mas antiguos de la sivdad. Desgrasiadamente la mayoria de estos kales estan oy vazios. En el mijor de los kavzos los avren una vez o dos al mez, para azer ayi orasiones i asegurar ke sean konsiderados komo lugares de orasion aktivos; ma ay tambien ke no funksionan mas komo lugar de orasion porke ya estan en muy negro estado, en ruinas, o porke el edifisio fue vendido i es aprovechado para otros menesteres. La mizma situasion de eskayimiento karakteriza tambien a los viejos bedahemes de la komunidad, a los kortijos tipikos de las komunidades sefaradis ande bivian de antes munchas de muestras famiyas, i mizmo a numerozos edifisios ke servian de antes komo eskolas, yeshivot i mas. Ma oy se esta notando un sierto trokamiento ke da esperansa ke este patrimonio djudio puedra ser salvado de las ruinas, grasias a una inisiativa ke salio de Israel i gozo de una muy buena kolaborasion en Izmir. Mos referamos al “Proyekto Izmir”, en el kuadro del kual una delegasion de estudiantes i profesores israelis fue a Izmir en Agosto 2002 i estuvo ayi tres semanas, examino de serka todos los kales, bedahemes i otras institusiones komunitarias djudias, los dokumento tomando videos i fotografias i apronto un raporto sovre lo ke puede ser echo para restorar, sino todos a lo menos los ke son mas importantes i se topan en mijor estado. En una entrevista kon el djoven arkitekta Mimar Naor Inbar, ke partisipo a esta delegasion, el mos ekspliko ke la inisiativa de este proyekto vino en el anyo 2002, de parte de “ICOMOS” i del Fondo "Avihay", en Israel, ke finanso kaje todos los gastes de la delegasion israeli - formada por unos 15 estudiantes i lisensiados de universidad kon kuatro profesores i investigadores de diversas disiplinas: istoria, jeografia urbana, arkitektura, etc.
En Izmir la delegasion gozo de una estrecha kolaborasion de parte de la komunidad djudia. Tambien kolaboro en este proyekto la "Universidad Dokuz Eylül" i mas partikularmente el Prof. Tayfun Taner, el responsable de un proyekto de esta universidad para la konservasion i restorasion del sentro istoriko de Izmir, ke es djustamente el lugar onde bivio una gran parte de la komunidad djudia i onde se topan munchas de sus sinagogas mas antiguas i nombradas. Antes de empesar el proyekto la delegasion israeli tuvo unos kuantos enkontros en los kualos profondizo sus konosensias sovre la istoria de los djudios de Izmir ansi ke sus uzos i kostumbres, lo ke le fasilito muncho el kontakto kon la komunidad djudia i su lavoro de kampo. En las tres semanas ke la delegasion estuvo en Izmir, sus miembros examinaron i dokumentaron a los diversos kales de la komunidad: los ke funksionan ainda i los ke ya no son mas ke salas vazias o fraguas medio derrokadas; los "kortijos" onde anyos atras bivian sienes de famiyas djudias, los bedahemes i otros lugares atados a la istoria de la komunidad.. Eyos fotografiaron, tomaron videos, i mizmo aprontaron planos arkitekturales de los kales “Shalom”,"Algazi"," Senyora" i otros ke se pensa restorar, kon las mizuras exaktas de kada pared, puerta i ventana ansi ke de la teva i del aron akodesh, etc.
Esto i mas; tambien fueron examinados, mizmo si fue superfisialmente solo, los serka de 2000 livros ke se topan en una de las salas del ospital djudio de Karatash, i en la sigunda vijita de la delegasion ke fue echa en 2004, esta vez tambien kon el ayudo del Fondo Avihay, fueron deskuviertos otros 2000, yegando ansi a serka de 4000 livros. Es esto komo una “geniza” de livros ke ya no son mas meldados ni konsultados desde largos anyos aun ke son siguramente de grande valor para el estudio i el konosimiento de la istoria i kultura de los djudios de Izmir. Por las oras estos livros no fueron katalogados sigun lo merese una tala koleksion, ma un primer paso en este senso ya fue echo por la Sra Dina Elazar, de Estados Unidos, i la Sra Rahel Wolfe, de Israel, ke tienen en komun el intereso en el patrimonio kultural de esta komunidad. Para empidir esto se deve empesar, sin tadrar mas, en una seria de proyektos de konservasion i restorasion. Esto no sera fasil i demandara en desparte del arekojimiento de una suma konsiderable tambien el esforso de un ekipo ke pueda dedikarse a este proyekto no solo por unas kuantas semanas sino ke por periodos mas largos i a lo largo de unos kuantos anyos. La suerte es ke un tal ekipo, o el nukleo de un ekipo, ya existe en Israel, ke el esta pronto a kontinuar en este proyekto i puede tambien kontar sovre la kolaborasion de la komunidad djudia de Izmir i de la Universidad Dokuz Eylül. Kale esperar ke sera topada en serka tiempo una solusion al problema finansiario tambien de este proyekto siendo ke ya yegimos kaje asta la ultima ora en la kuala este patrimonio puede ainda ser salvado, i si tadramos mas es posible ke esto ya no puedra ser echo i pedreremos uno de los mas ermozos trezoros de muestra kultura. |
ya estan en negro estado i tienen menester de reparasiones; ke las tombas antiguas en los bedahemes ke ya no son mas uzados sean kuviertas por yervas i pinchones i ke los livros en la geniza sean komidos por guzanos i puliyas.