AKI YERUSHALAYIM #81

ANUSIM I BENE ANUSIM
Moshe Shaul

Uno de los kapitolos mas trajikos i dolorozos de la istoria djudia es seguramente el ke toka a los "kripto-djudios" (djudios sekretos), konosidos tambien kon los nombres de marranos, konversos i kristianos muevos. Son estos nombres ke tienen una konnotasion negativa, sovretodo para "marranos" ke los desendientes de estos djudios en muestros dias konsideran komo un insulto i preferan uzar en su lugar el termino de "anusim", adjustando otro termino mas, "bene anusim", para los ke rekonosen aviertamente los atadijos familiales kon sus antepasados djudios i kripto-djudios.

Sea kual sea el nombre uzado para los djudios de Espanya i Portugal ke fueron forsados a renunsiar a sus relijion i konvertirsen al kristianismo ma bushkaron ainda a kedar fideles a la relijion djudia, sus istoria es estudiada i investigada agora muncho mas seriozamente ke antes, sovre todo despues ke en Espanya i Iberoamerika los archivos de la Inkizision fueron aviertos a los investigadores i ke de otra parte, esta indo i kresiendo el numero de los desendientes de anusim en Espanya, Mexico, Brasil i otros paizes mas ke estan rekonosiendo sus rayizes familiales.

La verdad es ke en este kampo ya fue echo un lavoro muy seriozo en el korso de los ultimos anyos i fueron publikados munchos livros, estudios i artikolos ke aklaran muy bien aspektos de este tema ke asta agora eran deskonosidos o muy poko konosidos.
En primer lugar kale apuntar ke el fenomeno de la konversion forsada de los djudios en Espanya no empeso en los reynados katolikos, en los siglos 14 i 15. Muncho antes de esto, los djudios fueron oprimidos ainda por los reyes vizigodos ke reynaron en Espanya entre los siglos 5 i 8. Al prinsipio no los molestaron tanto ma en el anyo 616 el rey Sisebuto kito una ley ovligando a los djudios a konvertirsen. Algunos de eyos lo izieron ma eyos o sus desendientes tornaron a sus relijion a la primera okazion, sovre todo kuando Espanya fue konkistada por los arabos ke konsideraron a los djudios komo sus aliados, permetiendoles de exersar sus relijion libremente i mizmo de okupar algunos de los postos mas importantes en el governo i en la administrasion.

Ma en los reynos arabos tambien, despues de una epoka de toleransia vino un fanatismo relijiozo i en siertos lugares, fue echa presion sovre personas o komunidades djudias para ke se konvertan al islam. El kavzo mas konosido es del padre de Arambam ke duvo konvertirse (por la forma, kedando djudio al interior de su kaza) i emigro de Cordova a Maroko, de onde el djoven Moshe ben Maimon emigro a Erets Israel i despues a Ejipto onde se aresento definitivamente

Es klaro djuntos kon esto ke el fenomeno de konversion forsada de los djudios de Espanya tomo su forma mas aguda i mas kruela en los siglos 14 i 15, en los reynos kristianos de Castilla, Catalonia i Aragon, kon konsekuensas de las mas graves no solo para los djudios sino ke para Espanya  tambien.

Las persekusiones ke forsaron a munchos djudios a konvertirsen, mizmo si fuera por la forma solo, empesaron en 1391 kon el masakro de los djudios de Sevilla. La onda de aborresimiento a los djudios se espandio muy presto i arrasto djuderias enteras del Sud al Norte de Espanya, destruyendo munchas komunidades i deshando las otras flakas i dezmamparadas. Muy grave fue tambien el echo ke milarias de djudios, espantandosen por sus almas i las de sus famiyas se konvertieron al kristianismo, kon konsekuensas ke no avian sido previstas por los sirkolos relijiozos kristianos ke avian demandado estas konversiones.  En efekto, agora ke eran kristianos no se podia refuzar a los konversos, komo les era refuzada kuando eran djudios, la entrada a los rangos de la armada i de la iglezia, a la korte i mizmo a las famiyas nobles, munchas de las kualas estando en difisil situasion finansiaria bushkavan rikos partidos para sus ijas i ijos.
Aun ke uvo un sierto numero de estos konversos ke despues de sus konversion se komportaron komo kristianos sinseros i fideles, uvo tambien munchos ke no podian o no kijeron renunsiar a sus relijion ansestrala, a los uzos i kostumbres transmetidos durante siglos, de una jenerasion a la otra. Todo en komportandosen komo kristianos, en sus kontaktos kon la djente, en el interior de sus kazas eyos se konsentian djudios i bushkavan a kumplir en la mas grande mizura posible los mandamientos de la relijion djudia.

Para esto gozavan del ayudo i kolaborasion de los ke avian kedado fideles a sus relijion i tenian rabinos ke podian dizirles las datas de las fiestas i los uzos ke devian ser segidos.

Esta situasion de djudios konversos ke de una parte kedavan fideles a sus vieja  relijion i de la otra tenian los mizmos derechos ke los kristianos antiguos i gozavan de todos sus avantajes, no tadro a kavzar selo i aborresimiento de parte de los kristianos viejos i sovre todo de la iglezia ke en fin de kuento obtuvo la autorizasion de introdusir la Inkizision a Espanya.

El problema de los konversos  i de los kripto-djudios devino ainda mas grave en 1492 kuando en segito al Edikto de Ekspulsion de los Reyes Katolikos, munchos de los djudios ke bivian entonses en Espanya akseptaron de konvertirsen afin de no tener ke salir al exilo, abandonando sus kazas i todos sus bienes. Ma otra vez, una proporsion muy importante de entre estos konversos kontinuo a mantener en el sekreto de sus kazas los mandamientos de la relijion djudia, malgrado ke savian muy bien kualos eran los peligros a los kualos se ekspozavan i la dura suerte ke los asperava si eran deskuviertos i djuzgados por la Inkizision.

El espanto ke tenian de la Inkizision no los izo renunsiar a sus fe sino ke pusho a munchos de entre eyos a bushkar un paiz onde pudieran bivir en paz. Diezenas de miles de entre estos "anusim" emigraron de Espanya i Portugal a Fransia, Holanda, Almania, Italia, el Imperio Otomano i tambien a los paizes muevamente konkistados en el kontinente amerikano.

En algunos lugares komo en las sivdades del Imperio Otomano, eyos pudieron bivir aviertamente komo djudios; en otros lugares komo Bordeaux, Amsterdam i mas,  tuvieron ke bivir un sierto tiempo komo kristianos i es despues de un sierto periodo solo ke les fue permetido de bivir aviertamente komo djudios; i uvo tambien lugares, sovre todo en Amerika Latina, onde tuvieron ke kontinuar a observar la relijion djudia en el sekreto de sus kazas. Durante unas kuantas diezenas de anyos pudieron azer esto sin ke los molesten, ma en fin de kuento la Inkizision yego ayi tambien i empesaron las arestasiones i las torturas a las kualas la mas parte no podian rezistir; eyos rekonosian ser kulpavles del terrible "krimen" de "djudaizar", kumplir algunos de los mandamientos de la relijion djudia - i sigun la severidad del kavzo eran kondanados a la konfiskasion de todos sus bienes, a penas de prezo mas o menos duras, o a ser kemados en los  estremesientes autos-da-fe.

De entre los sienes de tales kavzos ke estan dokumentados en los archivos de la Inkizision en Espanya i en Amerika Latina, ay dos ke son tristemente famozos i uno de eyos sirvio mizmo de tema al livro "La gesta del marrano" del eskritor djudio arjentino Marcos Aguinis.  El livro trata de la vida de Francisco Maldonado da Silva, un djoven mediko kripto-djudio de Chile ke es deskuvierto i arestado por la Inkizision; ma a la kontra de los otros arestados, ke nyegavan ser "djudaizantes" para no ser torturados o matados, el rekonosio imediatamente ke era djudio i ke se konsentia orgoliozo de serlo.  Esta fue una sorpreza a la kuala los inkizitores no se asperavan. En lugar de kondanarlo imediatamente, eyos lo tuvieron en prezo unos kuantos anyos, esperando de konvenserlo a renunsiar a su fe, i es solo kuando vieron ke estava firmemente determinado a kedar djudio ke en 1639 lo mandaron a la ogera.

Otro kavzo ke tuvo lugar muncho antes, es el de Luis de Carvajal el Mozo, suvrino de Luis de Carvajal ke era el governador del Nuevo Reino de Leon, un ancho teritorio ke se espandia del este de Mexico asta el sud-este de Estados Unidos.   Arestado 2 vezes, despues ke perkuro de konvenser a otras personas ke se konvertan al djudaismo, i yevado al tribunal de la Inkizision, Luis de Carvajal el Mozo tambien rekonosio aviertamente su djudaismo i malgrado todas las torturas a las kualas fue sometido no aksepto de renunsiar a su fe, asta ke en 1596 fue kemado djuntos kon su madre i sus 3 ermanas.

Despues de unas kuantas diezenas de anyos  de vida en una atmosfera de espanto de estos autos-da-fe i sovre todo de las torturas a las kualas eran sometidos los ke eran arestados por la Inkizision, los anusim duvieron renunsiar a los enkontros en los kualos azian sus orasiones i mizmo al kumplimiento de los uzos i kostumbres djudios en el sekreto de sus kazas, siendo ke siempre korrian el peligro de ser malsinados por uno de sus vizinos, sirvientes o mizmo por uno de los miembros de la famiya ke era aferrado i  kontava todo lo ke savia en tal de salvar de las torturas.

Lo mizmo paso en Brasil onde yegaron miles de anusim de Portugal.  Ayi tambien, al prinsipio no avian sido molestados. Esto i mas, en la rejion de Recife les fue permetido de bivir aviertamente komo djudios, durante el kurto periodo ke el lugar estuvo basho el poder de Holanda. Ma kuando la sivdad fue konkistada por Portugal eyos duvieron irsen de ayi: una parte yego al porto de New Amsterdam, oy New York, i el resto torno a Holanda o fue a bivir en una de las izlas del Caribe.  Los anusim ke kedaron en Brasil bushkaron durante un sierto tiempo de kedar fideles a la relijion djudia, ma la Inkizision reusho a deskuvrir algunos de entre eyos i kondanarlos a fuertes penas de prezo o a la muerte,  impozando ayi tambien una atmosfera de terror i espanto.

Kon el tiempo el fenomeno de djudios konversos ke en el sekreto de sus kazas kontinuavan a observar los ritos i mandamientos de la relijion djudia fue menguando asta despareser kaje kompletamente, kon la sola eksepsion de unos pokos lugares izolados i difisilmenmte aksesibles, komo Belmonte en Portugal.  Djuntos kon esto, munchos de los desendientes de estos anusim mantuvieron kaje asta muestros dias uzos i kostumbres ke son ajenos a la relijion kristiana i ke en munchos kavzos eyos mizmos no saven ke es sus sinyifikasion.  Ay mujeres, por enshemplo, ke kada viernes a la tadre uzan ensender kandelas en sus kazas, sin konoser la razon de este uzo. Kuando se demando a algunas de eyas, por ke razon azen esto, respondieron ke es algo ke uzavan azer sus madres, i ke eyas kontinuan la tradision...  Una mujer konto ke su nono uzava, una vez al anyo, emburujarse kon un shal blanko kon varas pretas, murmureando de si para si palavras ke ninguno entendia... rekuerdo, a la vista, de las orasiones del Dia de Kipur ke uzavan azer sus antepasados...

En los siglos 18 i 19 no se oyo mas avlar de anusim ma es kuriozo ke empesando de la sigunda meta del siglo 20, ay un numero kada vez mas grande de personas, en los paizes ibero-amerikanos, ke  no keren mas inyorar la sinyifikasion de estos uzos i de los rekuerdos familiales ke tienen i ke son indikasiones mas o menos konvensientes de sus rayizes djudias, del echo ke sus avuelos fueron anusim.  En paizes komo Mexico, Brasil, Ecuador i mizmo Estados Unidos, Espanya, Portugal i mas, munchos ke se konsideran "bene anusim" (ijos de anusim), ya izieron el paso desizivo i se konvertieron al djudaismo formalmente, reafirmando sus atadijos kon el puevlo djudio;  i ay munchos mas ke, mizmo si no azen este paso, ya no se espantan mas de dizir ke son desendientes de anusim i azen lo posible para deskuvrir i dokumentar sus verdaderas rayizes familiales..

Volver