AKI YERUSHALAYIM #80

ESTUDIOS I ARTIKOLOS

SUR LES TRACES DES OUVRAGES
JUDEO-ESPAGNOLS DE BULGARIE
Gaelle Collin i Michael Studemund-Halevy
En: Etudes Balkaniques 2005
Institut d'Etudes Balkaniques,
Academie des Sciences de Bulgarie

Despues de aver bushkado los livros en ladino publikados en Bulgaria i ke se topan aktualmente en diversas bibliotekas i archivos, los autores de este artikolo yegan a la konkluzion ke entre los anyos 1887 i 1936, los intelektuales djudios bulgaros publikaron mas de 350 livros en bulgaro, ebreo, ladino, fransez, alman i rumano. De entre estos se estima ke unas 250 publikasiones -livros, pamfletos, broshuras, etc.- fueron eskritas en ladino, ma es muy difisil de enkontrar estas ovras en las bibliotekas publikas o koleksiones privadas. Solo las grandes bibliotekas komo las de Yerushalayim, Copenhag, Harvard, Washington, Plovdiv i Sofia tienen en sus poder mas de unas kuantas diezenas de estos livros.

Esto puede ser eksplikado, en desparte del tiraje limitado ke tuvieron estos livros, por algunos faktores komo: la destruksion de bibliotekas i koleksiones privadas de las komunidades djudias en Bulgaria en los bombardeamientos de la II Gerra Mundiala; el rovo de lo ke avia en las kazas djudias abandonadas por sus moradores, embiados a kampos de lavoros forsados; i tambien la emigrasion de los djudios de Bulgaria a Israel ke los ovligo a deshar en este paiz una grande parte del kontenido de sus kazas, inkluzo livros i dokumentos familiales.

Collin i Halevy empesaron en un proyekto ke tiene por buto la redaksion de un katalogo de las publikasiones djudeo-espanyolas en Bulgaria i para esto vijitaron las bibliotekas i archivos de Sofia i Plovdiv , en los anyos 2004 i 2005, aziendo un inventario sistematiko de los livros en ladino ke se topan ayi. A partir de estas informasiones eyos bushkan en este artikolo a trasar la istoria de los livros djudios ke pudieron konservarsen en Sofia i en Plovdiv.

Volver