AKI YERUSHALAYIM #80

REVISTAS

SEFARDICA No. 16 / Anyo 2006
El djudeoespanol/2 Djudezmo y Jaquetia
Direktor: Mario E. Cohen
Ed. CIDICSEF web - e-mail
ISBN 950-99447-09-9

Despues de la reushidad del No. 15 de Sefardica, ke inkluyo por primera vez una seleksion de artikolos en ladino, el CIDICSEF mos prezenta agora otro numero de esta revista kon artikolos en kastiliano, por Mario E. Cohen, Jose Menasce, Esther Cohen, Amor Ayala i Ricardo Djaen, Beatrice Schmid, Jose M. Pedrosa i Aldina Quintana i en ladino por Yehuda Hatsvi, Moshe Shaul, Matilda Koen Sarano i Zelda Ovadia.

Ay tambien un muy interesante Dossier sovre los djudios de Maroko i la Haketia kon artikolos de Mario E. Cohen, Diana Epstein, Solly Levi, i Moises Garzon Sarfati.

Una inovasion muy interesante de Sefardica es la inkluzion, djuntos kon la revista, de un disko kompakto produsido por Maria Cherro de Azar i Graciela Ryba, kon kantes, lektura de kuentos i de refranes en ladino, lo ke da a los lektores una idea de la literatura orala en ladino, en la fonetika espesiala de los djudios de Amerika Latina, ke siendo yenamente integrados en la lengua espanyola avlada ayi, ya no pueden -o pueden difisilmente- prononsar los sonos karakteristikos del ladino ke se konservaron al seno de los djudios de Turkia, Gresia i otros paizes ke fueron parte, un tiempo, del Imperio Otomano.

SEFARAires No. 52, Agosto 2006
Aires de Sefarad desde Buenos Aires
Revista dijital e-mail - web

En el primer Kolokio Internasional sovre la grafia del ladino, organizado en Yerushalayim, en 1999, por la Autoridad Nasionala del Ladino, aviamos apuntado ke la Internet , ke permete una komunikasion fasil i efikas entre personas ke se topan en las 4 partes del mundo, podria ayudar muncho a la lucha para el futuro del ladino i de su kultura.

No paso un anyo i esta previzion ya fue provada korrekta, kon la kreasion de LadinoKomunita, un sitio de Internet para la konversasion en ladino, ke tuvo una reushidad verdaderamente impresionante.

Esto fue segido, pokos anyos despues, por otro proyekto, el tambien muy importante: la revista dijital Sefar Aires , publikada en Buenos Aires por un grupo de amantes de la kultura sefaradi i a sus kavesa el arkitekto Luis Leon i la Lic. Maria Cherro de Azar.

Esta revista, publikada mensualmente kon artikolos sovre la istoria i la kultura del djudaizmo sefaradi, puede ser meldada por todo el ke tiene akseso a la Internet , mizmo si esta en el lugar mas aleshado i izolado del mundo.

Sefar Aires esta adjustando ansi una mueva dimension, kon un grande potensial en el futuro, a la lucha ke es echa aktualmente en munchas partes del mundo para la konservasion, promosion i difuzion de la erensia kulturala del djudaizmo sefaradi i no podemos ke felisitar a su ekipo de kolaboradores por la inisiativa ke tuvieron i sus kontribusion a esta lucha.

EXPRESIONES DE LA IDENTIDAD
DE LAS TRES CULTURAS
Murcia, 2005
Koordinasion: Prof. Juana Castaño Ruiz
Ed. Ayuntamiento de Murcia, Consejeria de Cultura y Festejos
ISBN 84-96005-78-X

El Sejen Festival de las Tres Kulturas ke tuvo lugar en Murcia el anyo pasado mos trusho una vez mas, a traves su kurso universitario "Expresiones de la Identidad de las Tres Kulturas", una evokasion de la fruchiguoza kolaborasion ke tuvo lugar en la Espanya medievala entre las 3 kulturas ke enfloresieron entonses en este paiz: la kristiana, la araba i la djudia, deshando a muestra karga la repuesta a la demanda kuanto podia ser provechoza, en muestros dias, una mueva kolaborasion entre estas 3 kulturas.

Los tekstos de las konferensias dadas en este kurso, ansi ke de 5 poemas en ladino ke fueron reunidos en este livro reflektan el esforso echo ayi por una dodjena de profesores, investigadores i ekspertos para ayudarmos a konoser la verdadera identidad de estas 3 kulturas: desde la influensa araba sovre la sensia espanyola en la Edad Media , pasando por la kolaborasion kristiana-araba-djudia en los kampos de la istoria, lengua i literatura, i asta el komer, el amor i las orasiones en estas 3 kulturas.

Partikularmente interesante del punto de vista de los ke estudian la istoria i la kultura de los sefaradis son: el teksto de la konferensia del direktor del Instituto Cervantes en Estambol, Pablo M. Asuero, sovre "El re-enkuentro de los espanyoles kon los sefaradis de Estambol (1789-1915), i la konferensia de la direktora del programa de radio en ladino de Radio Eksterior de Espanya, Matilde Gini de Barnatan, sovre el tema "El universo djudeo-espanyol desde la perspektiva de ayer i de oy" - konferensia ke fue ilustrada kon 3 poemas en ladino de su ija, Rahel Barnatan, ke sus tekstos son trayidos a la fin del livro.

Volver