AKI YERUSHALAYIM #80

UNA ERMOZA AVENTURA

Pokos mezes atras resivimos de la revista La Lettre Sepharade una letra sirkularia titulada "Une Belle Aventure.", informandomos ke 15 anyos despues de la aparision de su primer numero, esta revista ya no sera ma publikada, aun ke en Estados Unidos se kontinuara a publikar su edision ingleza.

Los 56 numeros de la revista publikados entre los anyos 1991-2006, por el redaktor de la revista, Jean Carasso, i sus kolaboradores, son una kontribusion de grande valor a los esforsos para azer mijor konoser muestra kultura i ayudar a mantenerla. La interumpsion de su publikasion es seguramente un golpe muy duro para los ke luchamos por el mantenimiento de la kultura djudeo-espanyola.

Viniendo despues de la informasion ke otra revista sefaradi, "Ke Haber" de Miami, esta interumpiendo eya tambien su publikasion, la sirkularia de " La Sepharade " mos atrista i mos kavza preokupasion por la suerte de las dos otras revistas en este kampo, Los Muestros, de Bruxelles i Aki Yerushalayim de Israel, enpenyadas las dos en una dura lucha para poder kontinuar a publikar malgrado las difikultades ekonomikas ke enfrentan, i "El Amaneser", mas djoven i dinamika, ke por las oras a lo menos no parese tener este djenero de problemas.

Esta es tambien una okazion para akodrar a todos los amantes de la kultura djudeo-espanyola ke, apresiando el manyifiko lavoro echo por la "Lettre Sepharade" i "Ke Haber", i agradesiendo a Jean Carasso i David Siman ansi ke sus kolaboradores por sus kontribusion a la lucha para el futuro del ladino, agora devemos azer un esforso ainda mas grande para la kontinuidad de muestra kultura.

Devemos aunar muestras fuersas i intensifikar muestras aktividades afin ke muestros esforsos no sean simplemente una ermoza aventura sino ke un proyekto ke se esta engrandesiendo i ancheando kada dia mas, doblando i tresdoblando el numero de los ke estan prontos a luchar kon perseveransia para el futuro del ladino.

Volver