AKI YERUSHALAYIM #80

CESARE LOMBROSO
Rabbi Mitchell Serels

Cesare Lombroso nasio en Verona , Italia, en 1835. Sus djenitores eran Aronne i Zefora Levi. La famiya Lombroso, orijinaria de Espanya, tiene sus rayizes en Tunisia i Libia ansi ke en Italia, kon un ramo ke vino mas tadre de Maroko.

Cesare estudio la medisina i la shirurjia en Pavia, i tambien psikolojia i psikiatria en las Universidades de Viena i de Paris.

En su servisio en la armada italiana remarko las diferensias fizikas de italianos de diferentes rejiones ansi komo las diferensias fizikas de elementos kriminales en la armada, i esto lo pusho a examinar el faktor jenetiko en la kriminolojia. Su primer livro en este kampo, L'uomo delinquente, era, en su primera edision un volum de 252 pajinas; la sinkena edision ya tenia 1203.

En 1876 Lombroso devino profesor de medisina en la Universidad de Torino, onde era mas fasil para los djudios de Italia de ser admetidos komo profesores ke en la Universidad de Viena. La komunidad djudia de Torino era muy bien integrada en la vida sosiala de esta sivdad i la vida ayi era muy komoda. 20 anyos mas tadre el fue nominado al posto de profesor de psikiatria. Tres anyos antes ke muriera, en 1909, el fue nominado a la katedra de antropolojia kriminal.

Durante todo este periodo el manifesto un grande intereso en las kavzas djudias. En 1894 el eskrivio un artikolo sovre el antisemitizmo ke segun el era un "atavizmo", una regresion en la evolusion del ombre.

Kuando el kavzo Dreyfus desperto las pasiones Lombroso se intereso mas en el Sionizmo , del kual trato favorablamente en un artikolo ke eskrivio en 1900. El tuvo relasiones de estrecha amistad kon Max Nordau, un sionista ardiente, kon el kual interkambio letras.

Lombroso pensava ke los djudios modernos son desendientes direktos de los antiguos ebreos i trusheron una reforma morala al mundo. El pensava tambien ke los djudios tienen siertas karakteristikas de komportamiento bazadas sovre las relasiones ke tuvieron, a lo largo de la istoria, kon los puevlos a sus deredor. Segun el, los djudios tienen una kuriozidad naturala i el menester de deskuvrir faktos sovre el mundo ke los entorna.

El lamenta el fakto ke en su epoka los djudios ke biven en Erets Israel tienen menester del ayudo de los djudios de Evropa i en konsekuensa el pensa ke deven gozar de independensia en la Tierra Santa.

El admiro el echo ke los djudios en la Diaspora mantuvieron sus uzos i kostumbres i mizmo sus lengua i manera de vistir; djuntos kon esto el remarko tambien ke los djudios son atrayidos por lo ke ay de muevo. Los djudios, segun el, son atados a sus rayizes i no les agrada trokar ma eyos son fasinados por las inovasiones.

Mas tadre el troko su opinion sovre el elemento jenetiko en los kriminales i empeso a bushkar los faktores environamentales, yegando a la konkluzion ke los kriminales pueden ser edukados de manera ke tornen al kamino derecho. Sus ideas fueron aplikadas en el sentro de reedukasion de Elvira, en el estado de New York .

El empeso tambien a mostrar un grande intereso en el espiritualizmo i la posibilidad de la alma de los muertos de komunikar kon los bivos, lo ke era kontrario a sus prinsipios rasionalistas, en la primera parte de su vida. La nombradia de Lombroso pusho a otras personas tambien a interesarsen en este tema. Es muy posible ke Arthur Conan Doyle, ke aprovecho las teorias kriminolojikas de Lombroso en eskriviendo sus livros sovre Sherlock Holmes, se intereso el tambien en el espiritualizmo por influensa de Lombroso, ke sus ovras en este kampo son estudiadas asta oy.

Volver