AKI YERUSHALAYIM #80

IAACOB M. HASSAN k.e.p.d.
Moshe Shaul

La muerte del Prof. Iacob Hassan, de los mas eminentes i prestijiozos investigadores de la kultura djudeo-espanyola, es una grande piedrita para todos los ke se okupan de este tema, en el kampo akademiko ansi ke de la difuzion kulturala.

Iacob Hassan en su ofisina en el CSIC
(Consejo Superior de Investigaciones Cientificas), Madrid

Desde los primeros anyos de su lavoro en el Instituto Arias Montano, oy dia Departamento de Filolojia Sefaradi en el CSIC (Consejo Superior de Investigaciones Cientificas), Madrid, el sovresalio komo uno de los mijores ekspertos i investigadores del ladino i de su kreasion literaria, eskrita ansi ke orala

Sus artikolos, sus konferensias en numerozos kongresos i simpozios, en Espanya i otras partes del mundo, sus kursos en la Universidad Autonoma i en la Complutense , i mas ke todo, su intenso lavoro de investigasion en el kampo del sefaradizmo le valieron un lugar de onor en el primer rango de los ke luchan para azer mijor konoser i apresiar la kultura sefaradi.

Lo konosi por primera vez, unos 50 anyos atras, kuando los dos estavamos estudiando en la Universidad Ebrea de Yerushalayim, kada uno en una fakultad diferente, ma mos enkontravamos en el Instituto Ben Zvi, onde yo lavorava en el proyekto de Diksionario Ladino-Ebreo, ke fue abandonado despues de un sierto tiempo, i el venia para bushkar livros i dokumentos atados al ladino.

Kontinuimos en muestros kontaktos despues ke el torno a Espanya i empeso a lavorar en el Instituto Arias Montano, i kada vez ke el venia a Israel o yo iva a Espanya, mos enkontravamos i teniamos diskusiones sin fin sovre muestro lavoro i muestros proyektos en el kampo de la kultura djudeo-espanyola. Muestra kolaborasion se intensifiko ainda mas en los anyos 80, kuando Kol Israel i el Instituto Arias Montano firmaron un akordo para el katalogamiento de la koleksion de kantes en ladino del Proyekto Folklor en el kual avia empesado en 1978, en el kuadro de mi lavoro en la Emision Djudeo-espanyola. Kon el ayudo finansiario de los Ministerios de Eksterior de Israel i Espanya, i kon el apoyo akademiko del Instituto Arias Montano, kompletimos en pokos anyos un katalogo detaliado de los mas de 2700 kantes ke enrejistrimos en el kuadro de este proyekto - lo ke metio esta koleksion al alkanse de todos los investigadores, kantadores, folkloristas i kompozitores ke lavoran en el kampo de los kantes djudeo-espanyoles.

Esta amistad i kolaborasion fueron metidas a prova kuando se revelaron diferensias entre mozotros en lo ke toka la manera de eskrivir en ladino. Iacob Hassan estava konvensido ke esto devia ser echo, kon siertas diferensias, sigun la grafia espanyola, lo ke permeteria a los miliones de espanyol-avlantes en el mundo de meldar fasilmente lo ke seria publikado en ladino, mientres ke yo i mis kolaboradores, en Israel i despues en otras partes tambien del mundo, pensamos ke la grafia espanyola no puede reflektar fidelmente las partikularidades fonetikas del ladino, ke mozotros keremos mantener komo lengua biva, ke es ainda avlada. Djuntos kon esto, i malgrado los debates animados ke tuvimos a este sujeto, en muestros enkontros ansi ke en kongresos i simpozios, no kedi de admirar su ekstraordinario konosimiento de la kultura djudeo-espanyola i apresiar la grande importansia de su kontribusion a la rekuperasion, estudio i promosion de la kultura djudeo-espanyola.

Su desparision es un fuerte golpe a los esforsos echos en este kampo, entre otras por su mujer, Elena Romero, ke lo akompanyo en su lavoro, kon distinksion, durante mas de 40 anyos.

Ke su alma deskanse en paz i su dedikasion a la kavza de la kultura djudeo-espanyola sierva de modelo i enshemplo a todos los amantes de esta kultura i a los ke luchan para mantenerla, promoverla i azerla mijor konoser i apresiar..

Volver