|
AKI
YERUSHALAYIM #78
KURSOS DE ENVERANO EN ESTAMBOL
SOVRE EL LADINO I SU KULTURA
El dezvelopamiento del estudio del ladino i de su kultura en las universidades de Israel, ansi ke la kreasion de 2 sentros akademikos (el Sentro Naime i Yehoshua Salti i el Sentro Moshe David Gaon) ke se dedikan a este kampo de aktividad, empeso a dar frutos afuera de Israel tambien, sigun puede ser visto de los kursos de enverano ke tuvieron lugar en Estambol, grasias a la kolaborasion del Sentro Moshe D. Gaon, del Sentro de Kultura Sefaradi Otomano-Turka, de la Universidad Bilgi i del Instituto Cervantes de Estambol.
Dos grupos de estudiantes, kada uno de 10 personas, de la Universidad Ben-Gurion del Negev tomaron parte en este proyekto.
El primer grupo ambezo kon la Prof. Tamar Alexander sovre la kultura i la literatura oral de los Sefaradim, aziendo lavoros de kampo i entrevistando personas diversas de la komunidad djudia de Estambol sovre sus uzos i kostumbres, komo parte de las tezas ke estan aprontando.
El otro grupo, estudiantes adelantados del Djudeo-Espanyol, profundizaron sus konosimientos de la lengua.
Los dos kursos tuvieron lugar del 1 al 15 de Septembre, en la Universidad Bilgi de Estambol. Estos kursos fueron una verdadera reushidad i permeten de esperar ke este proyekto se kontinuara i se espandira ainda mas, en el futuro.
El Sr Eliezer Papo, profesor en el kurso de ladino, mos ekspliko ke el buto del kurso era de dar la posibilidad, a un grupo de los ke estudian ladino en la Universidad Ben Gurion, de pratikar lo ke embezaron durante el anyo, tomando kontakto kon los djudios de Estambol ke avlan ladino. A eyos se djuntaron 15 djovenes djudios de Estambol, ke no estudiaron en ningun kurso sovre esta lengua, i no la avlan korientemente, ma a lo menos la oyeron en sus kazas, i tienen un avantaje sovre los estudiantes de Israel, la mayoria de los kualos no vienen de famiyas onde se avla el ladino.
Munchos de los djovenes de Estambol ke partisiparon al kurso no estavan siguros ke podrian entender lo ke seria dicho ayi, ma a penas un dia o dos despues del empesijo ya se les dezato la alguenga i pudieron entender i darsen a entender; a tal punto ke eyos ya ekspresaron sus dezeo de kontinuar a estudiar el ladino, si son organizados kursos en Estambol - lo ke puedra ser echo kon el ayudo del Instituto Cervantes en esta sivdad, sigun lo fue asigurado por su direktor el Sr Pablo Martin Asuero.
La reushidad de este kurso es muy importante, no solo del punto de vista akademiko, sino ke tambien porke amostra kuanto puede ser provechoza la kolaborasion de todos los faktores ke estan lavorando en este kampo.
Volver |