AKI YERUSHALAYIM #78

ANGEL PULIDO
EL APOSTOLO DE LOS SEFARADIS
Aliza Meyuhas Ginio

Oganyo kumplieron 100 anyos de la publikasion del livro Españoles sin Patria y la Raza Sefardí , del senador Angel Pulido Fernández, konosido por su lucha para azer konoser en Espanya la existensia de los sefaradis i el menester de renovar las relasiones entre las dos partes, brutalmente kortadas kon la ekspulsion de 1492.

Pulido ke avia empesado esta lucha un anyo antes, en 1904, kon su livro Los israelitas españoles y el idioma castellano, trusho en su segundo livro el rezultado de su korespondensia kon los dirijentes de las komunidades sefaradis del Sud-Este de Evropa i del Oriente Medio - korespondensia ke tiene grande valor por la rikeza i diversidad de informasion ke trae sovre la situasion de estas komunidades al prinsipio del siglo 20.

En la epoka en la kuala eskrivio estos livros Angel Pulido ya se avia ganado una buena pozision en la vida publika i en la politika espanyola. El nasio en Madrid en 1852, fue mediko i lider politiko i ainda djoven, en sus anyos 30, fue elijido a la Akademia Real de Medisina, siendo el mas djoven miembro de esta institusion. El se dediko a la medisina asta ke entro en la politika en los anyos 80 del siglo 19. Era un erudito, kon profondos konosimientos de literatura i istoria. Tenia la pluma fasil i la prensa katolika liberala le servia de tribuna para la difuzion de sus ideas.

Pulido eskrivio ke el buto de su aserkamiento a los sefaradis era en primer lugar nasional i espanyol. Estava konvensido ke los serka de dos milyones de sefaradis djudeo- espanyol avlantes, al prinsipio del siglo 20, podian kontribuir a los interesos i a la pozision de Espanya en el mundo, ke avian sufrido muncho en la kriza de 1898 kuando, kon el tratado de Paris del 10.12.1898, pedrio sus ultimas kolonias (Cuba, Puerto Rico i las Filipinas).

La aktitud de Pulido enverso las komunidades sefaradis era romantika. El estava maraviyado de la vida familial de los sefaradis ke segun el eran todos ermozos (espesialmente las mujeres), nobles i rikos i sovresalian por sus talento ekonomiko, sigun puede ser visto entre otras, de sus palavras, dirijidas a las Camaras de Comercio:

Las Camaras de Comercio deben advertir la transcendencia que puede tener reconquistar la amistad de la raza mas comercial y mejor diseminada que existe en el mundo.

De la Real Akademia de la Lengua i de la Asosiasion de Eskritores i Artistas, el demando ke ayuden a la kreasion de eskolas i a la institusion de premios literarios ke estimulen la lengua djudeo-espanyola i la aserken al kastiliano.

Pulido no pensava del todo en la posibilidad de un retorno en masa de los djudios a Espanya. A la kontra el dezeava ke kontinuen a bivir en la Diaspora afin de ayudar de ayi a los interesos de Espanya en el mundo. Si tuvo la idea de retorno de un numero limitado de djudios fue prinsipalmente pensando en la djente rika i imprezarios i no en los modestos chikos komersantes de los merkados orientales.

La aktitud de los sefaradis, de sus parte, frente a la posibilidad de una rekonsiliasion kon Espanya, fue ambivalente. De una parte, munchos konservavan el temor istoriko de la Inkizision i no konsideravan komo djusto i razonable de renunsiar a sus atadijos kon el Imperiuo Otomano ke les avia dado azilo en sus ora de apreto, kuando avian sido arondjados de Espanya.

Otra razon era ke la ekonomia espanyola no estava tan dezvelopada komo la de otros paizes en Evropa Oksidentala i en konsekuensa era menos atraktiva para los djovenes sefaradis ke bushkavan paizes onde puedan topar lavoro i azersen una buena pozision.

De otra parte, en la mayoria de las letras embiadas al senador Pulido por eminentes personalidades publikas en las komunidades sefaradis, se reflekta una aktitud de simpatia a Espanya i de prontitud, se podria mizmo dizir un fuerte dezeo de lograr un reenkontro kon el puevlo espanyol, para el provecho de las dos partes.

En fin de kuento, los sefaradis no fueron enfrentados kon el menester de desidir si podian akseptar o devian rempushar las propozisiones del Dr. Angel Pulido. Malgrado todos los esforsos ke izo, su kampanya no logro el apoyo nesesario de parte de los faktores governamentales espanyoles i no fue echo nada de konkreto para la realizasion de sus proyektos. Djuntos kon esto, kale rekonoser ke esta kampanya kontribuyo muncho a krear en Espanya una atmosfera de amistad i simpatia a los sefaradis i a sus kultura – por lo kualo munchos lo konsideran komo “el Apostolo de los Sefaradis”.

Volver