AKI YERUSHALAYIM #77

GASTONIMIA SEFARADI
Zelda Ovadia

Dedikaremos muestra rubrika de esta vez a rechetas ke tomimos del livro Izmir Sefarad Mutfaği ke aparesio ultimamente en Izmir i en el kual ay una seleksion de las mas savrozas komidas i dulserias tipikas del gizado sefaradi de esta sivdad. Para una mas ancha informasion sovre el livro ver muestra rubrika “Livros” en paj 88.

KAPAMA DE PISHKADO

Materiales:

1 kg. de sardela o de otro pishkado
1 kg. de tomates
5-6 sevoyas
1 ½ vazo de prishil pikado
¼ de vazo de azeyte
sumo de un limon
sal i pimienta a gusto

Preparasion:

Alimpiar i lavar los pishkados i deshar eskurrir. Entremientres kitar las pipitas de los tomates i kortarlos en chikos kubos. Pikar la sevoya. Meter la azeyte en una sarten i sofriyir los tomates, sevoya pikada i prishil, adjustar sal i pimienta todo en mesklando de vez en kuando. Deshar kozer unos kuantos minutos asta ke el likido se embeve un poko. Abashar de la lumbre.

Vaziar la metad de esta meskla a un pyrex o otro resipiente ke va al orno, meter por ensima los pishkados, kuvrirlos kon la otra metad i por fin adjustar el sumo de limon. Kozer unos 20-25 minutos en orno ke fue kaentado a 200 C.

IGADO KON VINAGRE

Materiales:

1 kg de igado kortado en kubos

para la sos:

2 vazos de agua
½ vazo de vinagre de uvas
3 tomates rayidos
1 kucharika de sal
2 kucharas de asukar
3 kucharas de arina
azeyte para friyir

Preparasion:

Friyir los kubos de igado en la azeyte. Kitar de la sarten i meterlos en una kaldera.

Preparasion de la sos:

Mesklar la agua, el vinagre, los tomates rayidos (el ken kere puede uzar tambien salsa de tomat), sal i asukar. Adjustar la arina a esta meskla i embeverla en los tomates rayidos. Meter tino a no deshar bultikos arina.

Esta sos se deve aprontar muy kurto tiempo antes de komer.
Para servir: meter los igados en un plato, echar por ensima la sos i garnizar kon ojikas de prishil.

BURMAS DE TAHINA

Materiales:

½ kg de fila (yufka) ke se puede merkar konjelada
¼ vazo de azeyte
asukar pudra
Para el gomo:
400 gr de tahina
1 kuchara de asukar
1 findjaniko de kave de agua tivia
un poko de kanela

Preparasion:

Meter la tahina en un resipiente, azer en medio un foyo, i adjustar la kanela ila asukar. Mesklar este material i gostar si esta bien dulse para vuestro gusto.

Adjustar la agua, avagar avagar, a la tahina. Kontinuar en esta operasion asta ke la tahina se espesea.

Kortar kada oja de fila en dos i untarlas kon azeyte. Duvlar 3 a 4 sms de kada media fila afin de obtener una banda doble, meter una kucharika yena del gomo de tahina en la punta de kada banda i arodear en forma de rulo. Meter kada uno de estos rulos sovre un tefsin ke fue untado kon azeyte i ornarlos en orno ke fue kaentado de antes a 200 C. Kozer unos 10 minutos asta ke las burmas toman una kolor rosha. Antes de servir echar por ensima polvo de asukar.

SALADIKOS DE ALMENDRA AMARGA

En Izmir se uza komer saladikos de almendra amarga prinsipalmente en la fiesta de Pesah.

Materiales:

½ kg. de almendras amargas
2 kucharas yenas de sal
agua

Preparasion:

Lavar bien las almendras, echarlas a una kaldera kon agua buyendo i kozerlas unos 5 minutos. Abashar de la lumbre, vaziar la agua kaente i enshaguarlas kon agua yelada. Mundar el kuero, meterlas en un bokal i kuvrirlas de agua. Durante 3 dias trokar la agua de la redoma 3-4 vezes al dia. Esta operasion mengua la amargura de las almendras. En fin kuvrir de muevo las almendras kon agua limpia, adjustar la sal i mesklar bien asta ke la sal se dirrite. Asperar un dia i komer las almendras kon savor.

Volver