AKI YERUSHALAYIM #77

FILATELIA SEFARADI
Mordehay Arbell

En Ecuador, Amerika del Sud, ay una komunidad djudia relativamente chika, de serka de 1000 almas, entre los kualos ay unos pokos sefaradis.
Sovre dos de las mas eminentes figuras de entre eyos fueron emetidos ultimamente unos kuantos timbros por el servisio postal de este paiz.

Jose Abel Castillo y Alboronoz (1854-1940)

Seria de 7 timbros, del anyo 1955, konmemorando 35 anyos del primer bolo de posta aerea, i un timbro del anyo 1959, konmemorando los 55 anyos del periodiko El Telegrafo.

Jose Abel Castillo y Alboronoz nasio en Ambato, Ecuador, en una famiya orijinaria de Toledo. Siendo djoven militar lucho kontra diktadores, yegando al grado de kolonel, asta ke fue ferido.
El fondo el primer jurnal ekuatoriano, El Telegrafo, ke apoyava las kavzas liberales. Merko un avion al nombre de su jurnal, fondando ansi el servisio de posta aerea en la kosta oksidentala de Amerika del Sud.
Kon la suvida del nazismo el izo esforsos para salvar a los djudios de Evropa. Murio en Guayaquil en 1940.

Dr. Marcel Laniado de Wind (1927-1998)

Dr. Marcel Laniado de Wind nasio en Machala, Ecuador. Estudio en Ecuador i Estados Unidos. Dediko su vida a la modernizasion i al dezvelopa- miento de su paiz. Segun los periodikos del Ecuador el era “…un briyante talento, kon una klara vizion del mundo moderno, administrador publiko i inovador de la vida bankaria”.

El se interesava desde los proyektos mas grandes i asta los mas chikos, de los kazalinos; fondo su propia banka privada i kon eya kreo la Fondasion Fundagro, para el dezvelopamiento de la agrikultura; fue mayor de Machala, ministro de agrikultura i prezidente de CONAM, el Consejo Nacional para la Modernisacion del Estado.
El realizo tambien grandes proyektos en el kampo de la sensia i teknolojia i entre otras una grande sentrala idroelektrika ke fue yamada a su nombre.

Volver