|
AKI
YERUSHALAYIM #76
ARTIKOLOS I ESTUDIOS
MORE THAN A LANGUAGE, A TRAVEL AGENCY
Ideology and Performance in Israeli Judeo-spanish Revitalisation Movement
Jill Kushner Bishop
University of California, Los Angeles
En esta teza ke prezento komo parte de su doktorato en antropolojia, en la Universidad de Los Angeles, Jill Kushner Bishop bushka a ver ke son las perspektivas del ladino en el futuro en examinando su pasado i su prezente. Eya analiza la ideolojia linguistika de los ladinoavlantes en Israel, konsentran- dose en aktividades onde la lengua tiene el rolo sentral. Su lavoro es bazado sovre entrevistas ke tuvo kon numerozos sefaradis de Israel, entre otras en el kurso para aktivistas de la Autoridad Nasionala del Ladino.
Munchos, apunta eya en este estudio, le demandaron ke era su opinion sovre las shanses del ladino de kontinuar a ser una lengua biva, sovretodo tomando en konsiderasion presedentes lavoros ke preveiyan la “muerte” de esta lengua adientro de pokos anyos. Su repuesta fue ke eya no kere examinar este tema del punto de vista linguistiko sino ke del punto de vista sosiolojiko, o sea del dezeo de un sierto grupo de personas de mantener i promover esta lengua komo parte de sus identidad, de sus kultura partikulara, i de este punto de vista los alkanses en Israel son bastante pozitivos.
No podemos saver, dize eya en su konkluzion, ke sera la situasion del ladino despues de una jenerasion, ma lo ke es seguro es ke los esforsos echos estos ultimos anyos para la revitalizasion de esta lengua estan teniendo una influensa pozitiva sovre los ke partisipan en estos esforsos i ke empesaron a dezvelopar un sintimiento de identidad sefaradi mas fuerte ke antes ansi ke una mas grande apresiasion de sus istoria, lengua i kultura.
No importa si a la baza de estos esforsos se topa una nostaljia o orgolio o kuriozidad akademika enverso la erensia kulturala djudoe-espanyola. Es muy posible ke esto ayude a krear una situasion en la kuala el ladino ayudara a los ke lo avlan no solo a tornar al pasado sino ke los akompanyara tambien de manera sinyifikativa en le futuro.
|