|
AKI
YERUSHALAYIM #76
ARTIKOLOS I ESTUDIOS
MATEO I ODOKSIA
Lectura sobre una novela y un refranero sefardi desconosidos
Michael Studemund-Halevy
En: Romanistik in Geschichte und Gegenwart Heft 10, 1
Pokos solo de los sienes de romanes en ladino, publikados en letras rashi o latinas fueron estudiados i publikados en edisiones kritikas ke permeten al lektor moderno de apresiar sus aspektos linguistikos, literarios i mas.
Ya es ora, apunta el Dr. Michael Studemud-Halevy, en su introduksion a este estudio, de anchear la informasion sovre este kampo de la kultura djudeo- espanyola, i el mizmo se djunta a este esforso kon un artikolo sovre un roman del kual tiene lo ke es a la vista el uniko exemplar ke se konose.
Despues de unos kuantos kurtos kapitolos sovre el livro, su autor i su editor, Studemund-Halevy dedika la mayor parte del artikolo a un examen de las palavras emprestadas de otras lenguas, mas espesialmente del fransez, del italiano i del turko.
El estudio se termina kon una koleksion de 12 refranes divertientes i instruktivos, ke fueron inkluidos siendo ke en el ultimo fasikulo del livro avia unas kuantas pajinas vazias ke el editor kijo inchir kon algo en ladino.
|